ବାରିପଦା: ବାରିପଦା ବନଖଣ୍ଡରେ ପକ୍ଷୀ ଗଣନା ଶେଷ ହୋଇଥିବା ବେଳେ ଗତବର୍ଷଠାରୁ ଚଳିତବର୍ଷ ପକ୍ଷୀସଂଖ୍ୟା କମ୍ ରହିଛି। ବନଖଣ୍ଡର ୭ଟି ରେଞ୍ଜରେ ୭୩ ପ୍ରଜାତିର ପକ୍ଷୀ ରହିଛନ୍ତି। ଚଳିତବର୍ଷ ୧୧ ହଜାର ୯୬୫ଟି ପକ୍ଷୀ ଥିବା ଗଣନାରୁ ଜଣାପଡ଼ିଛି। ସେଥିମଧ୍ୟରୁ ବାରିପଦା ରେଞ୍ଜରେ ସର୍ବାଧିକ ୫ ହଜାର ୧୩୫ଟି ପକ୍ଷୀ ଅଛନ୍ତି। ଦେଉଳି ରେଞ୍ଜରେ ୨ ହଜାର ୮୧୦ ଓ ବେତନଟୀ ରେଞ୍ଜରେ ୯୮୯ଟି ପକ୍ଷୀ ରହିଛନ୍ତି। ଅବଶିଷ୍ଟ ୪ଟି ରେଞ୍ଜରେ ୩ ହଜାର ୩୧ଟି ପକ୍ଷୀ ଅଛନ୍ତି।

ଗତବର୍ଷ ବାରିପଦା ବନଖଣ୍ଡରେ ୧୨୪୯୯ ପକ୍ଷୀ ଥିଲେ। ଚଳିତବର୍ଷ ୫୩୪ଟି ପକ୍ଷୀ କମ୍ ରହିଥିବା ଗଣନାରୁ ଜଣାଯାଇଛି। ପକ୍ଷୀସଂଖ୍ୟା କମିବା ନେଇ ବାରିପଦା ବନଖଣ୍ଡ ଅଧିକାରୀ ସନ୍ତୋଷ କୁମାର ଯୋଶୀ କହିଛନ୍ତି, ଜମ୍ଭୀରା ଓ ହଳଦିଆ ଡ୍ୟାମ୍‌ରେ ଜଳସମ୍ପଦ ବିଭାଗ ପକ୍ଷରୁ ଜଳସେଚନ ପ୍ରକଳ୍ପ କାମ ଚାଲିଛି। ଯାହାଫଳରେ ଏହି ଦୁଇ ଡ୍ୟାମ୍‌କୁ ଚଳିତବର୍ଷ ପକ୍ଷୀ ଆସିନାହାନ୍ତି। ତେବେ ପକ୍ଷୀ ସଂଖ୍ୟା କମିଥିଲେ ବି ଏବର୍ଷ ୭୩ ପ୍ରଜାତିରୁ ଅଧିକାଂଶ ବିଦେଶାଗତ ପକ୍ଷୀ ଆସିଛନ୍ତି। ଯାହାକି ଅନ୍ୟବର୍ଷମାନଙ୍କଠାରୁ ଅଧିକ। ତେଣୁ ଏହା ନିଶ୍ଚିତ ଖୁସି ଖବର। ଆସନ୍ତାବର୍ଷମାନଙ୍କରେ ଅଧିକରୁ ଅଧିକ ବିଦେଶାଗତ ପକ୍ଷୀ ଆସିବେ ବୋଲି ସେ ଆଶାବାଦୀ ଥିବା କହିଛନ୍ତି।

ପ୍ରକାଶଥାଉକି, ଗତ ୧୦ ତାରିଖରୁ ବାରିପଦା ବନଖଣ୍ଡର ବେତନଟୀ, ଉଦଳା, ଦେଉଳି, ବାଙ୍ଗିରିପୋଷି ଆଦି ୭ଟି ରେଞ୍ଜର ୪୬ଟି ଆଦ୍ରଭୂମିରେ ପକ୍ଷୀଗଣନା ହୋଇଥିଲା। ରେଞ୍ଜର, ଫରେଷ୍ଟର ଓ ପକ୍ଷୀ ଗବେଷକ ଗଣନା କାର୍ଯ୍ୟରେ ସାମିଲ ହୋଇଥିଲେ। ଶୀତ ଋତୁରେ ସାଇବେରିଆନ ଅଞ୍ଚଳରେ ପ୍ରବଳ ବରଫପାତ ହେଉଥିବାରୁ ଖାଦ୍ୟ ଅନ୍ୱେଷଣରେ ପକ୍ଷୀମାନେ ହଜାର ହଜାର କିଲୋମିଟର ଅତିକ୍ରମ କରି ଓଡ଼ିଶାର ବିଭିନ୍ନ ଅଞ୍ଚଳକୁ ଆସିଥାନ୍ତି ଏବଂ ମୟୂରଭଞ୍ଜ ଜିଲ୍ଲାର ଶିମିଳିପାଳ ପାଦ‌ଦେଶର ଆଦ୍ରଭୂମି, ନଦୀବନ୍ଧ, ବୃହତ ଜଳାଶୟରେ ରହିଥାନ୍ତି।

Powered by Froala Editor