ପଶ୍ଚିମବଙ୍ଗରେ ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଆଉ ଏକ ଝଟ୍‌କା ଲାଗିଛି । ତାଙ୍କର ଘନିଷ୍ଠ ସହଯୋଗୀ ଭାବେ ପରିଚିତ ଟିଏମ୍‌ସିର ରାଜ୍ୟ ସଭାପତି ଚନ୍ଦ୍ରିମା ଭଟ୍ଟାଚାର୍ଯ୍ୟ ସମସ୍ତ ଦଳୀୟ ପଦରୁ ଇସ୍ତଫା ଦେଇଛନ୍ତି । ଚନ୍ଦ୍ରିମା ଦର୍ଶାଇଛନ୍ତି ଯେ, ମମତାଜୀଙ୍କର ଯେଉଁ ବିଶ୍ୱାସ ତାଙ୍କ ଉପରେ ଥିଲା ତାହା ଦୁର୍ବଳ ହୋଇଥିବା ଭଳି ଲାଗୁଛି । ଯେତେବେଳେ ବିଶ୍ୱାସ ଏବଂ ଭରସା ନଥାଏ ସେତେବେଳେ ଦଳୀୟ କର୍ମୀ ଭାବେ କାମ କରିବା କଷ୍ଟକର ହୋଇଥାଏ ।  ଏ ସଂପର୍କରେ ସେ ମମତାଙ୍କୁ ଏକ ଚିଠି ଲେଖି ଅବଗତ କରିଛନ୍ତି ।

ତାଙ୍କ ଇସ୍ତଫା ପତ୍ରରେ, ଭଟ୍ଟାଚାର୍ଯ୍ୟ କହିଛନ୍ତି ଯେ ସେ ଅଖିଳ ଭାରତ ତୃଣମୂଳ କଂଗ୍ରେସର ରାଜ୍ୟ ସଭାପତି ପଦରୁ ଇସ୍ତଫା ଦେଉଛନ୍ତି, ଯାହା ତାଙ୍କୁ ଜୁନ ୩, ୨୦୨୬ରେ କାଲିଘାଟରେ ଏକ ବୈଠକ ସମୟରେ ଦିଆଯାଇଥିଲା। ସେ ବର୍ତ୍ତମାନ ଦଳ ମଧ୍ୟରେ ଥିବା ଅନ୍ୟ ସମସ୍ତ ପଦବୀରୁ ମଧ୍ୟ ଇସ୍ତଫା ଘୋଷଣା କରିଛନ୍ତି।

ଇସ୍ତଫା ପରେ ଚନ୍ଦ୍ରିମା ରାଜ୍ୟ ବିଧାନସଭାରେ ଋତବ୍ରତ ବାନାର୍ଜୀଙ୍କ ନେତୃତ୍ୱାଧୀନ ବିଦ୍ରୋହୀ ଗୋଷ୍ଠୀକୁ ଭେଟିଥିଲେ । ଏହାକୁ ନେଇ ମମତାଙ୍କ କ୍ୟାମ୍ପର ବିଧାୟକ କୁନାଲ ଘୋଷ ତାଙ୍କୁ ଜୋରଦାର୍‌ ଟାର୍ଗେଟ କରିଛନ୍ତି । ଚନ୍ଦ୍ରିମାଙ୍କ ଇସ୍ତଫାକୁ ସେ ଯୋଜନାବଦ୍ଧ ବୋଲି ଦର୍ଶାଇଛନ୍ତି । ଇତିମଧ୍ୟରେ ମମତା ବିଦ୍ରୋହୀ ନେତାଙ୍କୁ ‘ଧୋକ୍କାବାଜ’ ଆଖ୍ୟା ଦେଇଛନ୍ତି । ଦଳୀୟ କର୍ମୀଙ୍କୁ ସମ୍ବୋଧନ କରି ସେ କହିଛନ୍ତି ଯେ, ୨୦୨୬ ବିଧାନସଭା ନିର୍ବାଚନରେ ବିଦ୍ରୋହୀ ବିଧାୟକମାନେ ଟିଏମ୍‌ସି ଟିକଟରେ ଲଢ଼ିଥିଲେ । କିଛି ମାସ ମଧ୍ୟରେ ସେମାନେ କିଭଳି ଦଳରେ ସବୁ କିଛି ଠିକ୍‌ ନଥିବା ଅଭିଯୋଗ ଆଣୁଛନ୍ତି । 

ଚନ୍ଦ୍ରିମା ଭଟ୍ଟାଚାର୍ଯ୍ୟ ତାଙ୍କ ଇସ୍ତଫାର କୌଣସି ନିର୍ଦ୍ଦିଷ୍ଟ କାରଣ ଉଲ୍ଲେଖ କରି ନାହାଁନ୍ତି। ସମସ୍ତ ପଦବୀରୁ ଇସ୍ତଫା ଦେବାର ତାଙ୍କର ହଠାତ ନିଷ୍ପତ୍ତି ପଶ୍ଚିମବଙ୍ଗ ରାଜନୀତିକୁ ହଇଚଇ କରି ଦେଇଛି। 

ବିଧାନସଭା ନିର୍ବାଚନରେ ପରାଜିତ ହେବା ପରଠାରୁ ତୃଣମୂଳ କଂଗ୍ରେସରେ ସଙ୍କଟ ଜାରି ରହିଛି । ଋତବ୍ରତ ବାନାର୍ଜୀଙ୍କ ନେତୃତ୍ୱରେ ୮୦ ଜଣ ବିଧାୟକ ମମତାଙ୍କ ବିରୋଧରେ ବିଦ୍ରୋହ କରି ନିଜର ଅଲଗା ଗୋଷ୍ଠୀ ଗଠନ କରିଛନ୍ତି । ଦଳର ୨୦ ଜଣ ସାଂସଦ ମଧ୍ୟ ବିଦ୍ରୋହ କରି ଏନ୍‌ଡିଏକୁ ସମର୍ଥନ ଘୋଷଣା କରିଛନ୍ତି । 

Powered by Froala Editor