ବାଂଲାଦେଶରେ ମା’ ଦୁର୍ଗାଙ୍କ ନବ ନିର୍ମିତ ପ୍ରତିମାକୁ ଭାଙ୍ଗି ଦିଆଯାଇଛି। ମାଆ ଦୁର୍ଗାଙ୍କ ସମେତ ୭ଟି ପ୍ରତିମାଙ୍କ ମୁଣ୍ଡ ଭାଙ୍ଗି ଦିଆଯାଇଛି। ଏହାକୁ ନେଇ ବଂଲାଦେଶରେ ରହୁଥିବା ହିନ୍ଦୁଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି। 

ବୁଧବାର ରାତିରୁ ଗୁରୁବାର ସକାଳ ମଧ୍ୟରେ ଘଟିଥିବା ଏହି ଦୁଃଖଦ ଘଟଣା ସ୍ଥାନୀୟ ହିନ୍ଦୁ ସମ୍ପ୍ରଦାୟକୁ ଗଭୀର ଶୋକ ଏବଂ ଅସୁରକ୍ଷା ଭାବନାରେ ଡୁବାଇ ଦେଇଛି। ଜାମୁରକି ଆର୍ଯ୍ୟ ସମିତିର ସଭାପତି ପ୍ରକାଶ ବାକାଲିଙ୍କ ଅନୁଯାୟୀ, ମୂର୍ତ୍ତିଗୁଡ଼ିକ ପ୍ରାୟ ସମ୍ପୂର୍ଣ୍ଣ ହୋଇସାରିଥିଲା, କେବଳ ଚିତ୍ର ବାକି ଥିଲା। ବୁଧବାର ରାତି ପର୍ଯ୍ୟନ୍ତ ସମସ୍ତେ ମନ୍ଦିରରେ ଥିଲେ। କିନ୍ତୁ ଗୁରୁବାର ସକାଳେ ପହଞ୍ଚିବା ପରେ ସେମାନେ ମୂର୍ତ୍ତିଗୁଡ଼ିକ ଭଙ୍ଗା ହୋଇଥିବା ଦେଖିଲେ। ଏହି ଘଟଣା ଭକ୍ତଙ୍କ ଭାବନାକୁ ଆଘାତ ଦେଇଛି।

ଟାଙ୍ଗାଇଲ ଜିଲ୍ଲା ମିର୍ଜାପୁର ଉପଜିଲ୍ଲା ଅନ୍ତର୍ଗତ ଜମୁର୍କି ପଶ୍ଚିମପଡ଼ାରେ ଦୀର୍ଘ ୮୫ ବର୍ଷ ହେଲା ମାଆ ଦୁର୍ଗାଙ୍କ ପୂଜା ଆୟୋଜନ କରାଯାଉଛି। ଚଳିତବର୍ଷ ଏଠାରେ ପୂଜା ଆଗରୁ ମନ୍ଦିରରେ ଜୋରସୋରରେ ଚାଲିଥିଲା ପ୍ରସ୍ତୁତି। ମା’ ଦୁର୍ଗାଙ୍କ ସମେତ ୭ଟି ମୂର୍ତ୍ତି ନିର୍ମାଣ ପ୍ରାୟ ଶେଷ ହୋଇଥିଲା। କେବଳ ରଙ୍ଗ ଦିଆଯିବା ବାକି ରହିଥିଲା। ହେଲେ ରାତିର ଅନ୍ଧକାରରେ ଦୁର୍ବୃତ୍ତମାନେ ମନ୍ଦିରରେ ପଶି ମୂର୍ତ୍ତିଗୁଡ଼ିକୁ ଭାଙ୍ଗି ଦେଇଥିବା ଅଭିଯୋଗ ହୋଇଛି।

ଏନେଇ ଥାନାରେ ଲିଖିତ ଅଭିଯୋଗ ହୋଇଛି। ଅଭିଯୁକ୍ତଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି। ପ୍ରଶାସନ ଘଟଣାକୁ ଗୁରୁତ୍ୱର ସହ ନେଇଛି। ଏଥିସହ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି। ମନ୍ଦିର ଓ ଆଖପାଖ ଅଞ୍ଚଳରେ କଡ଼ା ସୁରକ୍ଷା ବ୍ୟବସ୍ଥା କରିବାକୁ ପ୍ରଶାସନ ନିଷ୍ପତ୍ତି ନେଇଛି।

Powered by Froala Editor