ବିଜୟ ସରକାରଙ୍କ ଠାରୁ ସମର୍ଥନ ପ୍ରତ୍ୟାହାର ପାଇଁ ଧମକ ଦେଲା ସିପିଆଇ(ଏମ୍)
ତାମିଲନାଡ଼ୁ ନୂଆ ମୁଖ୍ୟମନ୍ତ୍ରୀ ଭାବେ ଶପଥ ନେଇଥିବା ସୁପରଷ୍ଟାର ଥଲାପତି ବିଜୟଙ୍କ ସରକାର ଉପରେ ସଙ୍କଟର କଳାବାଦଲ ମାଡ଼ି ଆସିଛି । ତାମିଲନାଡୁରେ ଜୋସେଫ୍ ବିଜୟଙ୍କ ସରକାର ୧୦ ଦିନ ପୂରଣ କରି ନ ଥିବାବେଳେ ସହଯୋଗୀ ଦଳ ସିପିଆଇ(ଏମ୍) ସମର୍ଥନ ପ୍ରତ୍ୟାହାର ଧମକ ଦେଇଛି। ଫଳରେ ଟିଭିକେ ସରକାରର ସ୍ଥାୟିତ୍ୱକୁ ନେଇ ପ୍ରଶ୍ନ ଉଠିଛି।
ଶାସକ ମେଣ୍ଟରେ ଏଆଇଏଡିଏମ୍କେର ଗୋଟିଏ ଗୋଷ୍ଠୀ ବିଧାୟକ ସାମିଲ ହୋଇଥିବାରୁ ସମର୍ଥନର ପୁନର୍ବିଚାର କରିବ ବୋଲି ସିପିଏମ୍ କହିଛି। ଏଆଇଏଡିଏମ୍କେ ସାମିଲ ହେବା ଜନାଦେଶ ବିରୋଧୀ, କାରଣ ଭୋଟରମାନେ ଏହି ଦଳକୁ ପ୍ରତ୍ୟାଖ୍ୟାନ କରିଥିଲେ। ମେଣ୍ଟରେ ଏଆଇଏଡିଏମ୍କେର ଉପସ୍ଥିତି ଟିଭିକେ ଦେଇଥିବା ସ୍ବଚ୍ଛ ଶାସନ ପ୍ରତିଶ୍ରୁତି ବିରୋଧରେ ଯାଉଥିବା ସିପିଏମ୍ କହିଛି।
ସରକାରରେ ସାମିଲ ଥିବା ବାମପନ୍ଥୀ ଦଳ ମାକପା (CPI-M) ମୁଖ୍ୟମନ୍ତ୍ରୀ ବିଜୟଙ୍କୁ ଅତି କଡ଼ା ଭାଷାରେ ଚେତାବନୀ ଦେଇଛି । ଏହି ଚେତାବନୀ ପରେ ରାଜ୍ୟର ରାଜନୈତିକ କରିଡରରେ ଗୋଟିଏ ପ୍ରଶ୍ନ ଉଠୁଛି- ବିଜୟ ନିଜ ମୁଖ୍ୟମନ୍ତ୍ରୀ ଚେୟାର ବଞ୍ଚାଇ ପାରିବେ ତ ?
ମିଳିଥିବା ସୂଚନା ଅନୁଯାୟୀ, ଏହି ସମଗ୍ର ବିବାଦର ମୂଳ କାରଣ ହେଉଛି ବିରୋଧୀ ଦଳ AIADMK କୁ କ୍ୟାବିନେଟ୍ରେ ସାମିଲ କରିବା ନେଇ ଚାଲିଥିବା ଚର୍ଚ୍ଚା । ବିଧାନସଭା ନିର୍ବାଚନରେ ବିଜୟଙ୍କ ଦଳ ଟିଭିକେ ୧୦୮ଟି ଆସନ ଜିତିଥିଲା, ଯାହା ବହୁମତ ସଂଖ୍ୟା (୧୧୭) ଠାରୁ ୧୦ଟି କମ୍ ଥିଲା । ଏହା ପରେ କଂଗ୍ରେସ, ବାମପନ୍ଥୀ ଏବଂ ଅନ୍ୟାନ୍ୟ ଦଳର ସହଯୋଗରେ ସରକାର ଗଠନ ହୋଇଥିଲା । କିନ୍ତୁ ଏବେ ଖବର ଆସୁଛି ଯେ AIADMK ର ଗୋଟିଏ ଗୋଷ୍ଠୀକୁ ସରକାରରେ ମନ୍ତ୍ରୀ ପଦ ଦିଆଯାଇପାରେ, ଯାହାକୁ ନେଇ ବାମପନ୍ଥୀ ଦଳଗୁଡ଼ିକ ପ୍ରତିବାଦର ନିଆଁ ବର୍ଷୁଛନ୍ତି ।
Powered by Froala Editor
