ସୁନ୍ଦରଗଡ଼ : କୋଇଲା ପରିବହନ ବିବାଦ କ୍ରମରେ ସୁନ୍ଦରଗଡ଼ର ବିଶିଷ୍ଟ ବ୍ୟବସାୟୀ ତଥା ଟ୍ରାନ୍ସପୋର୍ଟର ସଞ୍ଜୟ ନନ୍ଦଙ୍କ ଘର ଉପରକୁ ଗୁଳିମାଡ଼ ହୋଇଛି। ଏହି ଘଟଣା ସୁନ୍ଦରଗଡ଼ରେ ଚାଞ୍ଚଲ୍ୟ ସୃଷ୍ଟି କରିଛି। ଏମସିଏଲ କୋଇଲା ଖଣିକୁ ୯୬ ଟ୍ରେଲରର ବେଆଇନ ପ୍ରବେଶ ବନ୍ଦ କରାଯିବା ପଛରେ ଶ୍ରୀ ନନ୍ଦଙ୍କ ସଂପୃକ୍ତି ସନ୍ଦେହ କରି ଦୁର୍ବୃତ୍ତମାନେ ଶ୍ରୀ ନନ୍ଦଙ୍କ ଘର ଉପରକୁ ଗୁଳିମାଡ଼ କରିଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି।
ରବିବାର ରାତି ପ୍ରାୟ ସାଢ଼େ ୧୨ ସମୟରେ ଏକ କାରରେ ତିନି ଚାରି ଜଣ ଦୁର୍ବୃତ୍ତ ଆସି ବ୍ୟବସାୟୀ ଶ୍ରୀ ନନ୍ଦଙ୍କ ଘର ସମ୍ମୁଖରେ ହିନ୍ଦୀ ଭାଷାରେ ଅଶ୍ରାବ୍ୟ ଭାଷାରେ ଗାଳିଗୁଲଜ କରିଥିଲେ। ସେମାନଙ୍କ ଗାଡ଼ିଗୁଡ଼ିକୁ କଳା ତାଲିକାରୁ ନ ହଟାଇଲେ ଯେଉଁଠି ଦେଖିବୁ ଗୁଳି ମାରିବୁ ବୋଲି ସୁରକ୍ଷାକର୍ମୀଙ୍କୁ କହି ସେଠାରୁ ଚାଲି ଯାଇଥିଲେ। ପ୍ରାୟ ଘଣ୍ଟାଏ ପରେ ମହମ୍ମଦ ରାହିଲ ନାମକ ଜଣେ ଯୁବକ ମୋଟର ସାଇକଲରେ ସେଠାକୁ ଆସି ଘର ଉପରକୁ ଗୁଳିମାରି ପଳାଇଥିଲା ବୋଲି ସଞ୍ଜୟଙ୍କ ଘର ଆଗରେ ଡ୍ୟୁଟି କରୁଥିବା ବ୍ୟକ୍ତିଗତ ସୁରକ୍ଷାକର୍ମୀ ପ୍ରଫୁଲ୍ଲ କୁମାର ମାଝୀ ପୁଲିସ ପାଖରେ ଲିଖିତ ବୟାନ ଦେଇଛନ୍ତି। ରାତିରେ ପୁଲିସ ଘଟଣାସ୍ଥଳକୁ ଆସି ଗୋଟିଏ ଖୋକା ଜବତ କରିଛି। ରାହିଲ ଘରେ ଚଢ଼ଉ କରି ବ୍ୟବହାର ହୋଇଥିବା କାର ଓ ବାଇକକୁ ଜବତ କରିଛି। ରାହିଲ ସହ ଆଉ କେଉଁମାନେ ଥିଲେ ଚିହ୍ନଟ କରିବା ପାଇଁ ପୁଲିସ ବିଭିନ୍ନ ସ୍ଥାନର ସିସିଟିଭି ଯାଞ୍ଚ କରୁଛି।
ଏପ୍ରିଲ ୬ ତାରିଖ ରାତିରେ କେତେକ ଗାଡ଼ିର ଚାଳକ ବିଳମ୍ବରେ ଏମସିଏଲ ଖଣିକୁ ଆସି ଶୀଘ୍ର କୋଇଲା ବୋଝେଇ କରିବାକୁ ଗଣ୍ଡଗୋଳ କରିଥିଲେ। ଖଣି ଭିତରକୁ ଯିଏ ଆଗ ଆସିବ ସେ ଆଗ କୋଇଲା ବୋଝେଇ କରିବା ନିୟମ ଥିବାବେଳେ ଏକ ନିର୍ଦିଷ୍ଟ ଟ୍ରାନ୍ସପୋର୍ଟର ଅଧୀନରେ କାମ କରୁଥିବା ଏହି ଗାଡ଼ି ଚାଳକମାନେ ତାକୁ ବେଖାତିର କରି ବିଳମ୍ବରେ ଆସି ମଧ୍ୟ ଆଗ କୋଇଲା ନେଉଥିଲେ। ଏହାକୁ କେନ୍ଦ୍ରକରି ବଡ଼ ଧରଣର ଗଣ୍ଡଗୋଳ ହୋଇଥିଲା।

Powered by Froala Editor