ତାମିଲନାଡୁ ରାଜନୀତିରେ ଏବେ ଜଣେ ଯୁବ ନେତ୍ରୀଙ୍କୁ ନେଇ ଜୋରଦାର ଚର୍ଚ୍ଚା। ସେ ହେଉଛନ୍ତି ୨୯ ବର୍ଷୀୟା ଏସ୍. କିର୍ତ୍ତନା। ମାତ୍ର ୨୯ବର୍ଷ ବୟସରେ ସେ କ୍ୟାବିନେଟ ମନ୍ତ୍ରୀ ହୋଇଛନ୍ତି। ମୁଖ୍ୟମନ୍ତ୍ରୀ ସି ଜୋସେଫ ବିଜୟଙ୍କ ପ୍ରଥମ କ୍ୟାବିନେଟରେ ସେ ଜଣେ ପ୍ରମୁଖ ନୂତନ ଚେହେରା ଭାବରେ ଉଭା ହୋଇଛନ୍ତି। ବିରୁଧୁନଗର ଜିଲ୍ଲାର ଶିବକାଶୀ ନିର୍ବାଚନମଣ୍ଡଳୀରୁ ବିଜୟ ହୋଇଛନ୍ତି କୀର୍ତ୍ତନା। ଶିବକାଶୀ ଆସନରେ ସେ କଂଗ୍ରେସ ପ୍ରାର୍ଥୀଙ୍କୁ ୧୧ ହଜାରରୁ ଅଧିକ ଭୋଟରେ ହରାଇଛନ୍ତି। ଗତ ୭୦ ବର୍ଷ ମଧ୍ୟରେ ଏହି ଆସନରୁ ଜିତିଥିବା ସେ ହେଉଛନ୍ତି ପ୍ରଥମ ମହିଳା ବିଧାୟିକା।

ସୁପରଷ୍ଟାର ବିଜୟଙ୍କ ନେତୃତ୍ୱାଧୀନ ‘ତାମିଲଗା ଭେଟ୍ରି କାଝାଗାମ’ ବା TVK ଦଳର ଏହି ଯୁବ ଚେହେରା ଏବେ ତାମିଲନାଡୁ କ୍ୟାବିନେଟ୍‌ର ସବୁଠାରୁ କନିଷ୍ଠ ମନ୍ତ୍ରୀ ଭାବେ ଶପଥ ନେଇଛନ୍ତି।  

କୌଣସି ରାଜନୈତିକ ପରିବାର କିମ୍ବା ବଡ଼ ଆର୍ଥିକ ପୃଷ୍ଠଭୂମି ନଥାଇ ମଧ୍ୟ ସେ ନିଜ ଦକ୍ଷତା ବଳରେ ଆଜି ଏହି ସଫଳତା ପାଇଛନ୍ତି ଏସ୍. କିର୍ତ୍ତନା। ସରକାରୀ ସ୍କୁଲରୁ ପାଠପଢ଼ା ଆରମ୍ଭ କରିଥିବା କିର୍ତ୍ତନା ପରେ ପଣ୍ଡିଚେରୀ ବିଶ୍ୱବିଦ୍ୟାଳୟରୁ ପରିସଂଖ୍ୟାନରେ ସ୍ନାତକୋତ୍ତର ହାସଲ କରିଛନ୍ତି।

ରାଜନୀତିକୁ ଆସିବା ପୂର୍ବରୁ ସେ ଜଣେ 'ପଲିଟିକାଲ ଷ୍ଟ୍ରାଟେଜିଷ୍ଟ' ଭାବେ କାମ କରୁଥିଲେ। ସେ ମମତା ବାନାର୍ଜୀ, ଚନ୍ଦ୍ରବାବୁ ନାଇଡୁ ଏବଂ ଏମ.କେ. ଷ୍ଟାଲିନଙ୍କ ପରି ବଡ଼ ନେତାଙ୍କ ନିର୍ବାଚନୀ ପ୍ରଚାର ରଣନୀତି ପ୍ରସ୍ତୁତ କରିବାରେ ଆଇ-ପାକ୍ (I-PAC) ସହ ମିଶି କାମ କରିଛନ୍ତି।

କିର୍ତ୍ତନା ତାମିଲ, ଇଂରାଜୀ, ହିନ୍ଦୀ ଏବଂ ତେଲୁଗୁ ସମେତ ୫ଟି ଭାଷାରେ ସ୍ପଷ୍ଟ ଭାବେ କଥା ହୋଇପାରନ୍ତି। ତାଙ୍କ ମତରେ, ହିନ୍ଦୀ ଭାଷା ଜାଣିବା ଦ୍ୱାରା ସେ ବିଜୟଙ୍କ ବାର୍ତ୍ତାକୁ ସାରା ଦେଶରେ ପହଞ୍ଚାଇ ପାରିବେ।

ଟିଭିକେର ବିପୁଳ ବିଜୟ ପରେ, ଏସ୍ କୀର୍ତ୍ତନା ହିନ୍ଦୀରେ ଭାଷଣ ଦେଇ ଦୃଷ୍ଟି ଆକର୍ଷଣ କରିଥିଲେ। ସେ କହିଛନ୍ତି ଯେ ସେ ତାଙ୍କ ନେତାଙ୍କ ବାର୍ତ୍ତାକୁ ଦର୍ଶକଙ୍କୁ ବୁଝାଇବା ପାଇଁ ଏହି ଭାଷା ବାଛିଥିଲେ। ସେଲଭି ଏସ୍. କୀର୍ତ୍ତନା ଚେନ୍ନାଇର ଏକ ଅତ୍ୟନ୍ତ ସାଧାରଣ ମଧ୍ୟବିତ୍ତ ପରିବାରରେ ଜନ୍ମଗ୍ରହଣ କରିଥିଲେ। ତାଙ୍କ ବାପା ଏକ ଘରୋଇ କମ୍ପାନୀରେ କାମ କରନ୍ତି, ଏବଂ ମାଆ ଜଣେ ଗୃହିଣୀ। 

Powered by Froala Editor