ସାତକୋଶିଆରେ ହେବ ବିଶ୍ବସ୍ତରୀୟ ଇକୋ ଟୁରିଜିମ୍ ହବ୍, ୧୦୦ କୋଟି ଟଙ୍କାର ପ୍ରକଳ୍ପକୁ ମଞ୍ଜୁରୀ
ଭୁବନେଶ୍ୱର: ସାତକୋଶିଆରେ ବିଶ୍ବସ୍ତରୀୟ ଇକୋ ଟୁରିଜିମ୍ ହବ୍ କରିବା ପାଇଁ ୧୦୦ କୋଟି ଟଙ୍କାର ବିସ୍ତୃତ ପ୍ରକଳ୍ପ ରିପୋର୍ଟ (ଡିପିଆର)କୁ ମଞ୍ଜୁରୀ ମିଳିଛି। ପର୍ଯ୍ୟଟନର ବିକାଶ ପାଇଁ କେନ୍ଦ୍ର ସରକାରଙ୍କ ପର୍ଯ୍ୟଟନ ବିଭାଗର ସ୍ପେଶାଲ ଆସିଷ୍ଟାନ୍ସ ଟୁ ଷ୍ଟେଟ୍ସ ଫର୍ କ୍ୟାପିଟାଲ ଇନଭେଷ୍ଟମେଣ୍ଟ (ଏସଏଏସସିଆଇ) ଯୋଜନାରେ ସାତକୋଶିଆ ପାଇଁ ସମୁଦାୟ ୯୯,୭୫,୮୮,୯୨୦ ଟଙ୍କାର ଡିପିଆରକୁ ମଞ୍ଜୁରୀ ମିଳିଛି।
ଏଥିପାଇଁ ରାଜ୍ୟ ବନ ବିଭାଗ ଗତବର୍ଷ ନଭେମ୍ବରରେ କେନ୍ଦ୍ର ସରକାରଙ୍କ ନିକଟରେ ପ୍ରସ୍ତାବ ଦାଖଲ କରିଥିଲା। ଏବେ ଏହାକୁ ମଞ୍ଜୁରୀ ମିଳିଥିବାରୁ ଅନୁଗୋଳ, କଟକ, ନୟାଗଡ଼ ଓ ବୌଦ୍ଧ ଜିଲାରେ ପରିବ୍ୟାପ୍ତ ସାତକୋଶିଆ ବ୍ୟାଘ୍ର ଅଭୟାରଣ୍ୟ, ସାତକୋଶିଆ ଗଣ୍ଡ ଓ ବାଇସିପାଲ୍ଲି ବନ୍ୟପ୍ରାଣୀ ଅଭୟାରଣ୍ୟରେ ପର୍ଯ୍ୟଟନ ଭିତ୍ତିଭୂମିର ବିକାଶ କରାଯିବ। ସାତକୋଶିଆରେ ପର୍ଯ୍ୟଟନ ଶିଳ୍ପର ବିକାଶ ପାଇଁ ବ୍ୟାପକ ସମ୍ଭାବନା ରହିଥିବାରୁ ଏହି ଅଞ୍ଚଳରେ ଇକୋ ଟୁରିଜିମ୍ ଭିତ୍ତିଭୂମି ନିର୍ମାଣ ପାଇଁ ବିଭିନ୍ନ ମହଲରୁ ଦାବି ହୋଇ ଆସୁଥିଲା। ଏଠାରେ ଉନ୍ନତ ସୁବିଧା ସୁଯୋଗ ଉପଲବ୍ଧ ହେଲେ ଦେଶ ବିଦେଶରୁ ବହୁ ସଂଖ୍ୟକ ପର୍ଯ୍ୟଟକ ଓ ପ୍ରକୃତିପ୍ରେମୀ ଏଠାକୁ ଆସିବା ପାଇଁ ଆଗ୍ରହ ପ୍ରକାଶ କରିବେ।
Powered by Froala Editor
