ସୁନ୍ଦରଗଡ଼: ‌ଗୋ-ମାଂସକୁ କେନ୍ଦ୍ରକରି ସୃଷ୍ଟି ହୋଇଥିବା ଗଣ୍ଡଗୋଳ ଯୋଗୁଁ ଅଶାନ୍ତ ସୁନ୍ଦରଗଡ଼ର ପରିସ୍ଥିତି ନିୟନ୍ତ୍ରଣାଧୀନ ରହିଛି। ଶାନ୍ତି ଫେରୁଛି। ଜନଜୀବନ ସ୍ବାଭାବିକ ହେଉଛି। ପରିସ୍ଥିତିରେ ସ୍ବାଭାବିକତା ଫେରୁଥିବାରୁ ସନ୍ଧ୍ୟାରେ ପ୍ରଶାସନିକ କଟକଣାକୁ ଉଠାଇ ନିଆଯାଇଛି ଓ ଇଣ୍ଟରନେଟ ସେବା ଚାଲୁ କରି ଦିଆଯାଇଛି। ଦୁଇଟି ଗୋଷ୍ଠୀ ମଧ୍ୟରେ ସଂଘର୍ଷ, ପଥରମାଡ଼, ଭଙ୍ଗାରୁଜା, ଜଳାପୋଡ଼ା ଯୋଗୁଁ ଆଶାନ୍ତ ହୋଇ ପଡ଼ିଥିବା ସୁନ୍ଦରଗଡ଼ ସହରକୁ ଗତକାଲି ପୁଲିସ ଛାଉଣୀରେ ପରିଣତ କରି ଦିଆଯାଇଥିଲା। ସହରାଞ୍ଚଳରେ କର୍ଫ୍ୟୁ ଜାରି କରାଯିବା ସହ ଇଣ୍ଟରନେଟ୍‌ ସେବା ବନ୍ଦ କରାଯାଇଥିଲା। ୧୯ ପ୍ଲାଟୁନ୍‌ ପୁଲିସ ବଳ ସହିତ ବରିଷ୍ଠ ପୁଲିସ ଓ ପ୍ରଶାସନିକ ଅଧିକାରୀମା‌େନ ଗୁରୁବାର ରାତିସାରା ସହରକୁ ଜଗି ରହିଥିଲେ।

ରାତି ୧୨.୪୫ରୁ ଆଜି ସକାଳ ୧୦.୪୫ ପର୍ଯ୍ୟନ୍ତ ରାଉରକେଲା, ରାଜଗାଙ୍ଗପୁର ଓ କୁତ୍ରା ଅଞ୍ଚଳରେ ମଧ୍ୟ ଇଣ୍ଟରନେଟ ସେବାକୁ ବନ୍ଦ ରଖାଯାଇଥିଲା। ଗତକାଲି ରାତିରେ ଆଉ କୌଣସି ପ୍ରକାର ଗଣ୍ଡଗୋଳ ଘଟି ନ ଥିଲା। ଦିନସାରା ସହରରେ ଦୋକାନ ବଜାର, ଶିକ୍ଷାନୁଷ୍ଠାନ ଓ ଯାନବାହାନ ଚଳାଚଳ ବନ୍ଦ ରଖାଯାଇଥିଲା। ପଶ୍ଚିମାଞ୍ଚଳ ଡିଆଇଜି ବ୍ରିଜେଶ ରାଏ ଦିନସାରା ସହରସାରା ବୁଲି ବୁଲି ସ୍ଥିିତି ତଦାରଖ କରିଥିଲେ। ଗଣ୍ଡଗୋଳରେ ସମ୍ପୃକ୍ତ ଥିବା ବ୍ୟକ୍ତିମାନଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ଚଢ଼ଉ ଚାଲିିଥିଲା। ଉଭୟ ଗୋଷ୍ଠୀର ୩ ଜଣଙ୍କୁ ପୁଲିସ ଅଟକ ରଖିଛି।

କାର୍ଯ୍ୟାନୁଷ୍ଠାନ ସହିତ ଶାନ୍ତି ଫେରାଇ ଆଣିବାକୁ ମଧ୍ୟ ସମାନ୍ତରାଳ ଉଦ୍ୟମ ଚାଲିଥିଲା। ଅପରାହ୍ନ ୩ ସମୟରେ ସ୍ଥାନୀୟ ସଦଭାବନା ଭବନରେ ଉଭୟ ପକ୍ଷକୁ ନେଇ ଶାନ୍ତି କମିଟି ବୈଠକ ଆୟୋଜିତ ହୋଇଥିଲା। ଜିଲାପାଳ ଡ. ଶୁଭଙ୍କର ମହାପାତ୍ରଙ୍କ ସଭାପତିତ୍ବରେ ଅନୁଷ୍ଠିତ ବୈଠକରେ ରାଜନୈତିକ ବ୍ୟକ୍ତିବିଶେଷ, ବିଭିନ୍ନ ସଂଗଠନର କର୍ମକର୍ତ୍ତା, ପ୍ରଶାସନିକ ଓ ପୁଲିସ ଅଧିକାରୀ ପ୍ରମୁଖ ଶାନ୍ତି କମିଟି ବୈଠକରେ ଯୋଗ ଦେଇଥିଲେ। ଉଭୟ ପକ୍ଷ ମଧ୍ୟରେ ଆପୋଷ ଆଲୋଚନା ପରେ ସହରରେ ଶାନ୍ତି ପ୍ରତିଷ୍ଠା ପାଇଁ ଉଭୟ ପକ୍ଷ ସମ୍ମତି ପ୍ରକାଶ କରିଥିଲେ। ଏହା ପରେ ପ୍ରଶାସନ ଜାରି କରିଥିବା ସମସ୍ତ ପ୍ରକାର କଟକଣାକୁ ଉଠାଇ ନେବାକୁ ନିଷ୍ପତ୍ତି ଗ୍ରହଣ କରିଥିଲା।

ଭାରତୀୟ ନ୍ୟାୟ ସଂହିତାର ଧାରା ୧୬୩ ପ୍ରତ୍ୟାହାର କରି ନିଆଯିବା ସହ ସନ୍ଧ୍ୟାରୁ ଇଣ୍ଟରନେଟ ସେବା ସ୍ବାଭାବିକ କରାଯାଇଛି। ଆଜିଠୁ ସ୍କୁଲ କଲେଜ ଖୋଲା ରହିବ ବୋଲି ପ୍ରଶାସନିକ ସୂତ୍ରରୁ ସୂଚନା ମିଳିଛି। 

Powered by Froala Editor