ପୂର୍ବତନ ସାମ୍ବାଦିକା ରିନି ଆନ୍ ଜର୍ଜ କେରଳର ଏକ ପ୍ରମୁଖ ରାଜନୈତିକ ଦଳର ଯୁବ ନେତାଙ୍କ ବିରୋଧରେ ଗୁରୁତର ଅଭିଯୋଗ ଆଣିଛନ୍ତି। ସେ ଅଭିଯୋଗ କରିଛନ୍ତି ଯେ, ଉକ୍ତ ନେତା ତାଙ୍କୁ ହୋଟେଲକୁ ଡାକିବା ସହ ବାରମ୍ବାର ଅଶାଳୀନ ବାର୍ତ୍ତା ପଠାଇଛନ୍ତି। କିନ୍ତୁ ନେତା କିମ୍ବା ତାଙ୍କ ଦଳର ନାମ ପ୍ରକାଶ କରି ନାହାଁନ୍ତି।

ରିନି କହିଛନ୍ତି, ସେ ଏହି ଘଟଣା ସମ୍ପର୍କରେ ଦଳୀୟ ନେତୃବୃନ୍ଦଙ୍କୁ ଅବଗତ କରାଇଥିଲେ, କିନ୍ତୁ କୌଣସି କାର୍ଯ୍ୟାନୁଷ୍ଠାନ ହୋଇ ନଥିଲା। ଏହି ନେତାଙ୍କ ଦ୍ବାରା ଅନେକ ରାଜନେତାଙ୍କ ପତ୍ନୀ ଓ ଝିଅମାନେ ମଧ୍ୟ ସମାନ ଉତ୍ପୀଡ଼ନର ଶିକାର ହୋଇଛନ୍ତି। ସେ ପ୍ରଶ୍ନ ଉଠାଇଛନ୍ତି, “ନିଜ ପରିବାରର ମହିଳାଙ୍କୁ ସୁରକ୍ଷା ଦେଇ ନ ପାରୁଥିବା ରାଜନେତାମାନେ କେଉଁ ମହିଳାଙ୍କୁ ସୁରକ୍ଷା ଦେବେ?”

ବିରୋଧୀ ଦଳ ନେତା ଭି.ଡି. ସତୀଶନ ଏହି ଅଭିଯୋଗ ସମ୍ପର୍କରେ କହିଛନ୍ତି ଯେ, ଦଳକୁ ନିକଟରେ ଏକ ଅଭିଯୋଗ ମିଳିଛି ଏବଂ ଅଭିଯୁକ୍ତ ଯିଏ ହେଉ ନା କାହିଁକି, ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।

ଅନ୍ୟପକ୍ଷରେ ଯଦିଓ ରିନି ନେତାଙ୍କ ନାମ ପ୍ରକାଶ କରି ନାହାଁନ୍ତି, ଭାଜପା କଂଗ୍ରେସ ବିଧାୟକ ତଥା ଯୁବ କଂଗ୍ରେସ ରାଜ୍ୟ ସଭାପତି ରାହୁଲ ମାମକୁଟାଥିଲଙ୍କ ବିରୋଧରେ ପାଲାକ୍କଡ଼ରେ ବିକ୍ଷୋଭ ପ୍ରଦର୍ଶନ କରି ତାଙ୍କ ଇସ୍ତଫା ଦାବି କରିଛନ୍ତି। ଏହା ପରେ ଲେଖିକା ହନି ଭାସ୍କରନ ମଧ୍ୟ ରାହୁଲଙ୍କ ବିରୋଧରେ ସୋସିଆଲ ମିଡିଆରେ ଅଶାଳୀନ ବାର୍ତ୍ତା ପଠାଇଥିବା ଅଭିଯୋଗ ଆଣିଛନ୍ତି। 

Powered by Froala Editor