ବିବାହ ପାଇଁ ଇଣ୍ଟରଭିୟୁ । କେବେ ଶୁଣିଛନ୍ତି କି? କଥାଟି ନିଶ୍ଚୟ ଆଶ୍ଚର୍ଯ୍ୟ ଲାଗୁଥିବ। ଏ ଅଜବ ଘଟଣା ରାଜସ୍ଥାନରେ ଦେଖିବାକୁ ମିଳିଛି। ଯାହା ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ୧୯୦୦ ଯୁବକ ୧୧ ଜଣ ଝିଅଙ୍କ ସହିତ ବିବାହ ପାଇଁ ଆବେଦନ କରିଥିଲେ, ସେମାନଙ୍କର ସାକ୍ଷାତକାର ନିଆଯାଇଥିଲା। ଯୁବକମାନଙ୍କ ପରିବାର ଏବଂ ବ୍ୟବସାୟ ଦେଖାଯାଇଥିଲା। ମନୋନୀତ ପୁଅମାନଙ୍କ ବିଷୟରେ ଝିଅମାନଙ୍କ ମତାମତ ନିଆଯାଇଥିଲା ଏବଂ ସେମାନଙ୍କ ସମ୍ମତି ପରେ ସମ୍ପର୍କ ସ୍ଥିର କରାଯାଇଥିଲା।

ଜୟପୁର, ଡିଡ଼ୱାନା, ଝୁନ୍ଝୁନୁ କୋଟା ଓ ବାରନରୁ ୧୯ ଶହରୁ ଅଧିକ ଯୁବକ ପ୍ରମାଣପତ୍ର ଆଣିବା ସହ ବର ହେବା ପାଇଁ ଦାବି କରିଥିଲେ। ପ୍ରଥମେ ସେମାନଙ୍କର ପରିବାରର ତଦନ୍ତ କରାଯାଇଥିଲା। ପରେ ସେମାନଙ୍କର ସରକାରୀ ଚାକିରୀ କି ନୁହେଁ  ଓ କେତେ ଟଙ୍କା ରୋଜଗାର କରୁଛନ୍ତି ଯାଞ୍ଚ କରାଯାଇଥିଲା । ତା'ପରେ ହେଲା ''ଲଭ-କମ୍-ସରକାରୀ ବିବାହ''।

ଶୁକ୍ରବାର ରାଜ୍ୟ ମହିଳା ସଦନରେ ସେହି ଝିଅମାନଙ୍କର ବିବାହ ହୋଇଥିଲା। ମୁଖ୍ୟମନ୍ତ୍ରୀ ଭଜନଲାଲ ଶର୍ମା ମଧ୍ୟ ସେଠାରେ ପହଞ୍ଚି କନ୍ୟା ଏବଂ ବରଙ୍କୁ ଆଶୀର୍ବାଦ ଦେଇଥିଲେ। ଏହି ଝିଅମାନଙ୍କ ବିବାହ ପାଇଁ ସରକାରଙ୍କ ପକ୍ଷରୁ ଯୋଗ୍ୟ ଯୁବକମାନଙ୍କଠାରୁ ଆବେଦନ ପତ୍ର ମଗାଯାଇଥିଲା।

ସାମାଜିକ ନ୍ୟାୟ ଏବଂ ସଶକ୍ତିକରଣ ବିଭାଗ ସୂଚନା ଦେଇଛି ଯେ ଝିଅମାନେ ସମାଜ ଦ୍ୱାରା ଅବହେଳିତ ଏବଂ ସରକାର ସେମାନଙ୍କ ବିବାହର ଦାୟିତ୍ୱ ନେଇଥିଲେ। ୧୧ ଜଣ ଝିଅଙ୍କ ପାଇଁ ଜୟପୁର ଜିଲାରୁ ଛଅ ଜଣ ଯୁବକଙ୍କୁ ଚୟନ କରାଯାଇଥିଲା। ଏମାନଙ୍କ ବ୍ୟତୀତ ଝୁନଝୁନୁ, ବାରନ ଏବଂ କୋଟାରୁ ଜଣେ ଲେଖାଏଁ ଯୁବକ ଅଛନ୍ତି। ଦିଦୱାନା-କୁଚାମନ ଜିଲାର ଦୁଇଜଣ ଯୁବକ ଅଛନ୍ତି।

ଏହା ବିବାହ ନୁହେଁ, ଏହା ଏକ ନୂଆ ଆରମ୍ଭ ...ରାଜ୍ୟ ସରକାର ଏହି ସବୁ କାର୍ଯ୍ୟକ୍ରମକୁ 'ଜୀବନ ପୁନର୍ବାସ' ବୋଲି କହିଛନ୍ତି।

Powered by Froala Editor