ଭୁବନେଶ୍ୱର:ଲୋକଙ୍କୁ ବାଧୁଛି ଦରଦାମ ବୃଦ୍ଧି। ହୁ ହୁ ହୋଇ ବଢିଚାଲିଛି ଦୈନନ୍ଦିନ ବ୍ୟବହାର ହେଉଥିବା ଅତ୍ୟାବଶ୍ୟକ ସାମଗ୍ରୀର ଦାମ । ଡାଲି, ଚାଉଳ, ପରିବା ଏପରିକି ଆଳୁ ପିଆଜ ଭଳି ନିହାତି ଆବଶ୍ୟକ ଖାଉଟି ସାମଗ୍ରୀ ଦର ବୃଦ୍ଧିକୁ ନେଇ ଅତିଷ୍ଠ ହେଲେଣି ସାଧାରଣ ଲୋକେ। ଆଳୁ ୪୦ ଟଙ୍କାକୁ ପିଆଜ ୪୫। ୫୦ ଟଙ୍କା ତଳେ ନାହିଁ କୌଣସି ପରିବା ଦର। ଅଧିକାଂଶ ପରିବା ଦର ଶହେ ଉପରେ। ବଜାର ଗଲେ ପୁରୁନି ବ୍ୟାଗ। ଦାମ ଶୁଣି ଚମକି ପଡୁଛନ୍ତି ଗ୍ରାହକ। କଣ ଖାଇବେ, କଣ କିଣିବେ। ପ୍ରତିଦିନ ବଢ଼ି ଚାଲିଛି ଅତ୍ୟାବଶ୍ୟକ ସାମଗ୍ରୀ ଦର। ଯାହାକୁ ନେଇ ଛଟପଟ ହେଲେଣି ଗରିବ ଓ ମଧ୍ୟବିତ୍ତ ପରିବାର। ପରିବା ଦର ବଢ଼ୁଥିବା ବେଳେ, ଆଳୁ ପିଆଜରେ କାମ ଚଳାଇ ଦେଉଥିଲେ ଅନେକ ପରିବାର। ହେଲେ ସେତକ ବି କିଣିବା ସମ୍ଭବ ହେଉନି। ବେଶି ନୁହେଁ, ବରଂ ଆବଶ୍ୟକତା ଠାରୁ କମ କିଣି ପରିବାର ଚଳାଇବାକୁ ପଡୁଛି। ଦରଦାମ ଆକାଶଛୁଆଁ ହୋଇଥିବା ବେଳେ, ଅସନ୍ତୋଷ ଝାଡିଲେଣି ଖାଉଟି।

ସେପଟେ ଦରଦାମ ବୃଦ୍ଧିକୁ ନେଇ ବିଜେଡି ଅନେ୍ଦାଳନ କରିବାକୁ ଚେତାବନୀ ଦେଇଛି । ଏନେଇ ଆଜି ଶଙ୍ଖଭବନରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଦଳ ପକ୍ଷରୁ ପ୍ରମିଳା ମଲ୍ଲିକ ଓ ଲେଖାଶ୍ରୀ ସାମନ୍ତସିଂହାର ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଉପରେ ବର୍ଷିଛନ୍ତି । ଦରଦାମ ନିୟନ୍ତ୍ରଣ କରିବାକୁ ବିଜେଡି ପକ୍ଷରୁ ଦାବି କରାଯାଇଛି । ଦରଦାମ ବୃଦ୍ଧି ସାଧାରଣ ଲୋକଙ୍କୁ ବେଶ ବାଧୁଥିବାବେଳେ ଲୋକେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ତେବେ ଦରଦାମ ନିୟନ୍ତ୍ରଣ ନହେଲେ ଆନ୍ଦୋଳନକୁ ଓହ୍ଲାଇବ ବିଜେଡି । ସେପଟେ ଦରଦାମ ନିୟନ୍ତ୍ରଣକୁ ନେଇ ମନ୍ତ୍ରୀଙ୍କ ଦାୟିତ୍ବହୀନ ମନ୍ତବ୍ୟକୁ ନିନ୍ଦା କରଯାଇଛି । ଦରଦାମ ବୃଦ୍ଧି ପାଇଁ ପିଲାଙ୍କ ମଧ୍ୟାହ୍ନ ଭୋଜନ ଉପରେ ମଧ୍ୟ ପଡ଼ୁଛି ।

ପ୍ରମିଳା ମଲ୍ଲିକ କହିଛନ୍ତି  ରାଜ୍ୟରେ ପରିବର୍ତନ ଓ ସୁଶାସନ ନାରା ଦେଇ ଦରଦାମ ଆକାଶଛୁଆଁ କରିଛନ୍ତି । ସାଧାରଣ ଲୋକ ଆଶା କରୁଛନ୍ତି ଭଲ ଖାଇବେ ଓ ଶସ୍ତାରେ ପାଇବେ, ତେଣୁ ଚାଉଳ, ଡାଲି, ପନିପରିବା ଦର ବୃଦ୍ଧି ରାଜ୍ୟ ସରକାର ନିୟନ୍ତ୍ରଣ କରି ଲୋକଙ୍କୁ ନ୍ୟାୟ ଦିଅନ୍ତୁ । ତେବେ ମନ୍ତୀ କହୁଛନ୍ତି ଦରଦାମରେ ସରକାରଙ୍କ ନିୟନ୍ତ୍ରଣ ନାହିଁ, ଏହା ଅତ୍ୟନ୍ତ ଦୁର୍ଭାଗ୍ୟଜନକ । ସାଧାରଣ ଲୋକ ଶସ୍ତାରେ କେମିତି ଜିନିଷ ପାଇବେ, ସେ ବ୍ୟବସ୍ଥା ରାଜ୍ୟ ସରକାର କରନ୍ତୁ ବୋଲି ପ୍ରମିଳା ମଲ୍ଲିକ କହିଛନ୍ତି ।
ଅନ୍ୟପଟେ ଲେଖାଶ୍ରୀ କହିଛନ୍ତି, ଯଦି ବିଜେପିର ବିଜୟ ଉତ୍ସବ ସରିଲାଣି, ତା ହେଲେ ଯେଉଁ ଭୋଟରେ ଜିତିଛନ୍ତି ସେ ଓଡ଼ିଶାବାସୀଙ୍କ ହିତ କଥା ଚିନ୍ତା କରନ୍ତୁ । ଦରଦାମ ହୁ ହୁ ହୋଇ ବଢୁଛି, ଆଉ ଦାୟିତ୍ୱହୀନ ମନ୍ତବ୍ୟ ଦେଇଛନ୍ତି ମନ୍ତ୍ରୀ । ସରକାରଙ୍କ ଦାୟିତ୍ୱ ହେଉଛି, ଦରଦାମ ନିୟନ୍ତ୍ରଣରେ ରଖିବା । ଯାହା ଫଳରେ ଲୋକେ ଜିନିଷ କିଣି ବ୍ୟବହାର କରି ପାରିବେ । କିନ୍ତୁ ରାଜ୍ୟ ସରକାର ହାତ ଟେକି ଦେବା ଦୁର୍ଭାଗ୍ୟଜନକ ବୋଲି ଲେଖାଶ୍ରୀ କହିଛନ୍ତି ।

Powered by Froala Editor