ରାଜ୍ୟରେ ବିଜେପି ସରକାର ନିଜର ସଂକଳ୍ପପତ୍ର ଆଧାରରେ ମାସକୁ ୩ହଜାର ଟଙ୍କାର ସାମାଜିକ ସୁରକ୍ଷା ଭତ୍ତା ଯୋଗାଇ ଦେବେ। ଏଥିପାଇଁ ବ୍ୟୟ ଅଟକଳ ସଂପର୍କରେ ବିଭିନ୍ନ ବିଭାଗର ଅଧିକାରୀଙ୍କ ସହିତ ଆଲୋଚନା ଜାରି ରହିଛି। ଅର୍ଥ ବିଭାଗର ଅନୁମୋଦନ ପରେ ଏହାକୁ କାର୍ଯ୍ୟକାରୀ କରାଯିବ ବୋଲି ସୂଚନା ଦେଇଛନ୍ତି ରାଜ୍ୟ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତୀକରଣ ମନ୍ତ୍ରୀ ନିତ୍ୟାନନ୍ଦ ଗଣ୍ଡ। 

ଅକ୍ଟୋବର ୨ ଗାନ୍ଧୀ ଜୟନ୍ତୀରୁ ରାଜ୍ୟର ହିତାଧିକାରୀମାନଙ୍କୁ ମାସିକ ଭତ୍ତା ପ୍ରଦାନ ପାଇଁ ସରକାର ଯୋଜନା କରିଛନ୍ତି । ନିର୍ବାଚନରେ ଦିଆଯାଇଥିବା ପ୍ରତିଶ୍ରୁତି ଆଧାରରେ ବିଜେପି ସରକାର ଏହି ବର୍ଦ୍ଧିତ ଭତ୍ତା ଯୋଗାଇ ଦେବେ ।

ସୂଚନାଯୋଗ୍ୟ, ରାଜ୍ୟରେ ପ୍ରାୟ ୩୬.୭୫ଲକ୍ଷ ହିତାଧିକାରୀ ଏବେ ମାସିକ ଭତ୍ତା ପାଉଛନ୍ତି । ଗତ ଫେବୃୟାରୀ ମାସରେ ରାଜ୍ୟର ତତକାଳୀନ ବିଜେଡି ସରକାର ଏହି ହିତାଧିକାରୀଙ୍କ ମାସିକ ଭତ୍ତା ପରିମାଣ ବୃଦ୍ଧି କରିଥିଲେ। ଏଥିରେ ୬୦-୭୯ବର୍ଷର ବୟସ୍କଙ୍କୁ ହଜାର ଟଙ୍କା, ୮୦ବର୍ଷରୁ ଅଧିକଙ୍କୁ ୧୨ଶହ, ବିଧବା, କୁଷ୍ଠ ରୋଗୀ, ଏଚ୍‌ଆଇଭି ଆକ୍ରାନ୍ତଙ୍କ ମଧ୍ୟ ହଜାର ଟଙ୍କା ପାଉଛନ୍ତି। 

ମନ୍ତ୍ରୀ ଶ୍ରୀ ଗଣ୍ଡ କହିଛନ୍ତି ଯେ, ରାଜ୍ୟରେ ବାର୍ଦ୍ଧକ୍ୟ, ବିଧବା ଓ ଭିନ୍ନକ୍ଷମ ଭତ୍ତା ପରିମାଣ ମାସକୁ ୩ହଜାର ଟଙ୍କା କରିବା ପାଇଁ ପଦକ୍ଷେପ ନିଆଯାଉଛି । ଏହି ଭତ୍ତା ପାଇଁ କେତେ ଟଙ୍କା ବଜେଟରେ ରହିଛି ସେନେଇ ଅର୍ଥ ବିଭାଗ ସହ ଆଲୋଚନା କରାଯିବ । ଅର୍ଥ ବିଭାଗର ମତାମତ ମିଳିବା ପରେ ଖୁବଶୀଘ୍ର ଭତ୍ତା ବୃଦ୍ଧି ନିଷ୍ପତ୍ତି ନିଆଯିବ ବୋଲି ମନ୍ତ୍ରୀ ଶ୍ରୀ ଗଣ୍ଡ କହିଛନ୍ତି ।

Powered by Froala Editor