ରବର ଜଙ୍ଗଲରେ ଯବାନଙ୍କୁ ଆକ୍ରମଣ : ମାଡ଼ ମାରି ପିଠିରେ ଲେଖିଲେ ପିଏଫଆଇ
କେରଳର କୋଲମରେ ସେନାର ଜଣେ ଯବାନଙ୍କୁ କେତେଜଣ ଦୁର୍ବୃତ୍ତ ଆକ୍ରମଣ ସହ ଅସଦାଚରଣ କରିଛନ୍ତି। କୁହାଯାଉଛି ଯେ ଏହି ଯବାନଙ୍କୁ ୬ ଜଣ ଅଜ୍ଞାତ ବ୍ୟକ୍ତି ଆକ୍ରମଣ କରିଥିଲେ ଏବଂ ପରେ ତାଙ୍କୁ ଅତି ନିର୍ମମ ଭାବେ ମାଡ ମରାଯାଇଥିଲା। ଏହା ପରେ ଯବାନଙ୍କ ସାର୍ଟ ଚିରି ଦିଆଯାଇଥିଲା ଏବଂ ତାଙ୍କ ପିଠିରେ ନିଷିଦ୍ଧ ସଂଗଠନ ପିଏଫଆଇର ନାମ ଲେଖାଯାଇଥିଲା।
ରବିବାର ରାତିରେ ଯବାନ ଜଣକ ତାଙ୍କ ଘରେ ଥିବାବେଳେ ଏହି ଘଟଣା ଘଟିଥିଲା। ଆକ୍ରମଣର ସମ୍ମୁଖୀନ ହୋଇଥିବା ଶାଇନ୍ କୁମାରଙ୍କ କହିବା ଅନୁଯାୟୀ, ପ୍ରଥମେ ଦୁଇ ଜଣ ତାଙ୍କ ଘରେ ପ୍ରବେଶ କଲେ ଏବଂ ପରେ ଜବରଦସ୍ତ ତାଙ୍କୁ ନିକଟସ୍ଥ ରବର ଜଙ୍ଗଲକୁ ନେଇଗଲେ । ଜଙ୍ଗଲରେ ୬ ଜଣ ଲୋକ ତାଙ୍କ ଉପରେ ସଂଘବଦ୍ଧ ଆକ୍ରମଣ କରିଥିଲେ। ସେମାନେ ଯବାନଙ୍କ ହାତ ବାନ୍ଧିଦେଇ ପିଠିରେ କଳା ଓ ସବୁଜ ରଙ୍ଗରେ ପିଏଫ୍ଆଇ ଲେଖିଥିଲେ। ପିଏଫ୍ଆଇ ବେଆଇନ ଘୋଷିତ ଇସ୍ଲାମିକ୍ ସଂଗଠନ ପପୁଲାର ଫ୍ରଣ୍ଟ୍ ଅଫ୍ ଇଣ୍ଡିଆ ହୋଇପାରେ ବୋଲି କୁହାଯାଉଛି।
ଯବାନ ଜଣକ ରାଜସ୍ଥାନରେ ଡ୍ୟୁଟି କରୁଥିବାବେଳେ ଛୁଟିରେ କେରଳରେ ଥିବା ତାଙ୍କ ଘରକୁ ଆସିଥିଲେ । ଏହି ସଂଗୀନ ଘଟଣା ପରେ ପୁଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
Powered by Froala Editor
