ଚଣ୍ଡିଗଡ଼: ଜହ୍ଲାଦ ଅଧ୍ୟାପକଙ୍କ ଜଘନ୍ୟ କାଣ୍ଡ । ପରୀକ୍ଷାରେ ଫେଲ୍ କରିବାକୁ ଧମକ ଦେଇ ଛାତ୍ରୀଙ୍କୁ ଗଣଦୁଷ୍କର୍ମ । ନିଜର ସହଯୋଗୀଙ୍କ ସହ ମିଶି ୫ ବର୍ଷ ଧରି ପୀଡ଼ିତାଙ୍କୁ ଦୁଷ୍କର୍ମ କରୁଥିଲେ ଅଧ୍ୟାପକ । କାହାରିକୁ କହିଲେ ଅଶ୍ଲୀଳ ଭିଡିଓ ଭାଇରାଲ କରିବାକୁ ଧମକ ଦେଉଥିଲେ । ୫ ବର୍ଷ ଭିତରେ ପୀଡ଼ିତା ୫ ଥର ଗର୍ଭବତୀ ହୋଇଥିବା ବେଳେ ଅଭିଯୁକ୍ତ ସବୁଥର ତାଙ୍କର ଗର୍ଭପାତ କରାଇଥିଲା । ଶେଷରେ ଅତ୍ୟାଚାର ଅସହ୍ୟ ହେବାରୁ ଥାନାର ଦ୍ବାରସ୍ଥ ହୋଇଛନ୍ତି ପୀଡ଼ିତା ଛାତ୍ରୀ । ହରିୟାଣାର ପଲୱଲ ଜିଲ୍ଲାରେ ଏଭଳି ଅମାନବୀୟ ଘଟଣା ଘଟିଛି ।
ପୀଡ଼ିତାଙ୍କ ଅଭିଯୋଗ ଅନୁଯାୟୀ, ସେ ଆଇଟିଆଇରେ ପଢ଼ୁଥିଲେ । କଲେଜ ଇନଚାର୍ଜ ନୀରଜର ତାଙ୍କ ଉପରେ ଖରାପ ନଜର ଥିଲା । ଅନେକ ଥର ନୀରଜ ଛାତ୍ରୀଙ୍କୁ ଅସଦାଚରଣ କରିବାକୁ ଚେଷ୍ଟା କରିଥିଲା । ହେଲେ ସେ ଏହାକୁ ପ୍ରତିବାଦ କରୁଥିଲେ । ଏଥିରେ ରାଗି ଯାଇ ଅଭିଯୁକ୍ତ ଛାତ୍ରୀଙ୍କୁ ପ୍ରାକ୍ଟିକାଲରେ ଫେଲ୍ କରି ଦେଇଥିଲା । ପାସ୍ କରିବାକୁ ହେଲେ ତାଙ୍କୁ ଅଜୟ ନାମକ ଆଉ ଜଣେ ଯୁବକଙ୍କ ଘରକୁ ଆସିବାକୁ କହିଥିଲା ।
ପୀଡିତା ଛାତ୍ରୀ ଅଜୟର ଘରେ ପହଞ୍ଚିବା ପରେ ସେଠାରେ ନୀରଜ ଓ ଅଜୟ ମିଶି ତାଙ୍କୁ କୋଲ୍ଡ ଡ୍ରିଙ୍କସରେ ନିଶାଦ୍ରବ୍ୟ ମିଶାଇ ପିଆଇଥିଲେ । ପୀଡ଼ିତା ବେହୋସ୍ ହୋଇଯିବା ପରେ ଦୁହେଁ ତାଙ୍କ ସହ ଗଣଦୁଷ୍କର୍ମ କରିଥିଲେ ଏବଂ ଏହି ସମୟରେ ଭିଡିଓ ଉତ୍ତୋଳନ କରିଥିଲେ । ପୀଡିତାଙ୍କ ହୋସ୍ ଆସିବା ପରେ ସେ କିଛି ବୁଝି ପାରିନଥିଲେ । ଦୁଇ ଅଭିଯୁକ୍ତ ତାଙ୍କୁ ଭିଡିଓ ଦେଖାଇ ଭାଇରାଲ କରିଦେବାକୁ ଧମକ ଦେଇଥିଲେ । ଏହାପରେ ଦୁହେଁ ବ୍ଲାକମେଲ୍‌ କରି ପୀଡ଼ିତାଙ୍କୁ ଖିବଲେଶ ନାମକ ଆଉ ଜଣେ ଯୁବକଙ୍କ କ୍ବାର୍ଟରକୁ ଡକାଇଥିଲେ । ସେଠାରେ ନୀରଜ, ଅଜୟ ଓ ଖିବଲେଶ ମିଶି ତାଙ୍କ ସହ ଅପ୍ରାକୃତିକ ଯୌନ ସମ୍ପର୍କ ସ୍ଥାପନ କରିଥିଲେ । ଏତିକିରେ ସେମାନଙ୍କର ପାଶବିକତା ସରି ନଥିଲା । ବାରମ୍ବାର ସେମାନେ ପୀଡିତାଙ୍କୁ ବ୍ଲାକମେଲ୍‌ କରି ଗଣଦୁଷ୍କର୍ମ କରିଥିଲେ ।

Powered by Froala Editor