ଛତିଶଗଡ଼ର କବିରଧାମରେ ଅଭାବନୀୟ ଘଟଣା ଘଟିଛି । ବାହାଘରେ ବେଳେ ନବ ଦମ୍ପତିଙ୍କୁ ମିଳିଥିଲା ଗୋଟିଏ ବିରାଟ ହୋମ ଥିଏଟର ମ୍ୟୁଜିକ ସିଷ୍ଟମ। ଏହାକୁ ନବିବାହିତ ଜଣଙ୍କ ଘରେ ମଧ୍ୟ ଲଗାଇଥିଲେ। ହେଲେ ଉକ୍ତ ମ୍ୟୁଜିକ ସିଷ୍ଟମ ବିସ୍ଫୋରଣରେ ନବବିବାହିତ ଯୁବକ ସହ ବଡ଼ ଭାଇର ମୃତ୍ୟୁ ହୋଇଯାଇଛି। ଏଥିରେ ୪ଜଣ ଗୁରୁତର ଆହତ ହୋଇଛନ୍ତି ।

ସୂଚନା ଅନୁଯାୟୀ, ରେଙ୍ଗାଖାର ଥାନା ଅନ୍ତର୍ଗତ ଚମାରୀ ଗାଁର  ୨୨ ବର୍ଷୀୟ ହେମେନ୍ଦ୍ର ମରାବୀଙ୍କ ବିବାହ ଏପ୍ରିଲ୍ ୧ରେ ହୋଇଥିଲା । ସୋମବାର ଦିନ ପରିବାର ଲୋକେ ବାହାଘରରେ ମିଳିଥିବା ଉପହାର ଖୋଲିବାରେ ଲାଗିଥିଲେ। ପରେ ଏକ ଗିଫ୍ଟ ଖୋଲିବାରୁ ସେଥିରୁ ମ୍ୟୁଜିକ ସିଷ୍ଟମ ମିଳିଥିଲା । ମ୍ୟୁଜିକ ସିଷ୍ଟମକୁ ବୋର୍ଡରେ ଲଗାଇ ଯେତେବେଳେ ଅନ୍ କରାଯାଇଥିଲା, ଅଚାନକ ସେତେବେଳେ ଭୟଙ୍କର ବିସ୍ଫୋରଣ ହୋଇଥିଲା । ବିସ୍ଫୋରଣରେ ଘରର ଛାତ ଓ କାନ୍ଥ ଉଡ଼ିଯାଇଥିଲା ବେଳେ ଘଟଣାସ୍ଥଳରେ ମରାବୀଙ୍କ ମୃତ୍ୟୁ ଘଟିଥିଲା ।

ତାଙ୍କ ବଡ଼ ଭାଇ ରାଜକୁମାର ଓ ପରିବାରର ଆଉ ୪ ଜଣ ଗୁରୁତର ଆହତ ହୋଇଥିଲେ। ସମସ୍ତଙ୍କୁ ତୁରନ୍ତ ଜିଲ୍ଲା ହସ୍ପିଟାଲକୁ ନିଆଯାଇଥିଲା। ତେବେ ଚିକିତ୍ସାଧୀନ ଅବସ୍ଥାରେ ରାଜକୁମାର ମଧ୍ୟ ଆଖି ବୁଜିଥିଲେ। ଏବେ ବି ପରିବାରର ଅନ୍ୟମାନେ ହସ୍ପିଟାଲରେ ଚିକିତ୍ସିତ ହେଉଛନ୍ତି।

Powered by Froala Editor