ବାଲେଶ୍ୱର: ‘ ଅନ୍ବେଶା ଇନ୍ ଇଣ୍ଡିଆ ଏଲଟିଡି’ ଚିଟଫଣ୍ଡ କମ୍ପାନୀର ୩ଜଣ ଅଧିକାରୀଙ୍କୁ ଜେଲ ଦଣ୍ଡରେ ଦଣ୍ଡିତ କରାଯାଇଛି । ସମସ୍ତ ସାକ୍ଷ୍ୟ, ପ୍ରମାଣପତ୍ରକୁ ଆଧାର କରି ବାଲେଶ୍ଵରର ସ୍ବତନ୍ତ୍ର ଚିଟପଣ୍ଡ ଅଦାଲତର ବିଚାରପତି ବିଶ୍ୱଜିତ ଦାସ ଏହି ରାୟ ପ୍ରଦାନ କରିଛନ୍ତି।
ସୂଚନା ମୁତାବକ ଏହି ଚିଟଫଣ୍ଡ ସଂସ୍ଥା ବାଲେଶ୍ୱର ସହରରର ସହଦେବଖୁଣ୍ଟା ଅଞ୍ଚଳରେ ଖୋଲିଥିଲା । ତେବେ ଲୋକଙ୍କୁ ଅଳ୍ପଦିନରେ ଅଧିକ ଟଙ୍କା ଫେରାଇବାର ମିଛ ପ୍ରତିଶ୍ରୁତି ଦେଇ ବାଲେଶ୍ୱର ସମେତ ବିଭିନ୍ନ ଅଞ୍ଚଳରୁ ଟଙ୍କା ଆଦାୟ କରୁଥିଲେ । ତେବେ ସଦର ବ୍ଲକ ଅନ୍ତର୍ଗତ ଶେଖପାଟଣା ଅଞ୍ଚଳର ଜଗନ୍ନାଥ ବାରିକ ନାମକ ଜଣେ ଜମାକାରୀ ଉକ୍ତ ସଂସ୍ଥାରେ ଆରଡି ଆକାରରେ ଟଙ୍କା ରଖିଥିଲେ । ଏହି ଟଙ୍କା ମେଚୁରିଟି ବି ହୋଇଯାଇଥିଲା । ମାତ୍ର ୧୨ ପ୍ରତିଶତ ସୁଧ ସହ ମୂଳ ଧନ ନ ମିଳିବାରୁ ସେ ସହଦେବଖୁଣ୍ଟାରେ ଥିବା କାର୍ୟ୍ୟାଳୟକୁ ଯାଇଥିଲେ। ସେଠାରେ କାର୍ୟ୍ୟାଳୟ ବନ୍ଦ ହୋଇଥିବାବେଳେ ତାଙ୍କ ସହ ଅନ୍ୟ ଜମାକାରୀ ଠକାମୀରେ ଶିକାର ହୋଇଥିବା ଜାଣିବାକୁ ପାଇଥିଲେ।

ପରେ ଏ ନେଇ ସେ ସହଦେବଖୁଣ୍ଟା ଥାନାରେ କମ୍ପାନୀର ୮ ଜଣଙ୍କ ନାମରେ ଅଭିଯୋଗ କରିଥିଲେ। ପରବର୍ତ୍ତୀ ସମୟରେ ପୁଲିସ ସମସ୍ତଙ୍କୁ ଗିରଫ କରିଥିଲା । ସେବେଠାରୁ ଏହି ମାମଲା ଚିଟଫଣ୍ଡ ଅଦାଲତରେ ବିଚରାଧୀନ ଥିଲା । ୧୬ ସାକ୍ଷୀ, ୫୪ ଦସ୍ତାବିଜର ପ୍ରମାଣକୁ ଆଧାର କରି କମ୍ପାନୀର ଡାଇରେକ୍ଟର କୃଷ୍ଣଚନ୍ଦ୍ର ସାହୁଙ୍କୁ ୫ ବର୍ଷ ଜେଲ ସହ ୨ ଲକ୍ଷ ଟଙ୍କା ଜରିମାନା,  ଅନାଦେୟ ୨ ବର୍ଷ ଅଧିକ ଜେଲ, ଅଫିସ କର୍ମଚାରୀ ଅଭିମନ୍ୟୁ ମହାପାତ୍ରଙ୍କୁ ୩ ବର୍ଷ ଜେଲ, ୧୦ ହଜାର ଜରିମାନା, ବ୍ରାଞ୍ଚ ମ୍ୟାନେଜର ପ୍ରଣୟ କୁମାର ବେହେରାଙ୍କୁ ୩ବର୍ଷ ଜେଲ, ୧୦ ହଜାର ଟଙ୍କାର ଜରିମାନା ହୋଇଛି । 

Powered by Froala Editor