ବଲିଉଡ ଅଭିନେତା ଶାହରୁଖ ଖାନଙ୍କ ସ୍ତ୍ରୀ ଗୌରୀ ଖାନଙ୍କ ବିରୋଧରେ ଉତ୍ତରପ୍ରଦେଶର ଲକ୍ଷ୍ନୌରେ ମାମଲା ରୁଜୁ ହୋଇଛି। ମୁମ୍ବାଇର ବାସିନ୍ଦା ଜଶୱନ୍ତ ଶାହା ଗୌରୀଙ୍କ ନାଁରେ ଏହି ଅଭିଯୋଗ ଆଣିଛନ୍ତି। (ଆଇପିସି)ର ଧାରା ୪୦୯ ଅନୁଯାୟୀ, ଗୌରୀଙ୍କ ବିରୋଧରେ ମାମଲା ରୁଜୁ ହୋଇଛି। ଅଭିଯୋଗ ଅନୁଯାୟୀ, ଯେଉଁ କମ୍ପାନୀ ପାଇଁ ସେ ବ୍ରାଣ୍ଡ ଆମ୍ବାସାଡର ଥିଲେ, ସେହି କମ୍ପାନୀ ୮୬ ଲକ୍ଷ ଟଙ୍କା ଦେବା ସତ୍ତ୍ୱେ ଫ୍ଲାଟର ମାଲିକାନା ଦେଇନାହାଁନ୍ତି। 

ରିପୋର୍ଟ ଅନୁଯାୟୀ, ତୁଲସିଆନି କନଷ୍ଟ୍ରକସନ୍ ଆଣ୍ଡ ଡେଭଲପର୍ସ ଲିମିଟେଡ୍ ସିଏମଡି ଅନିଲ କୁମାର ତୁଲସିଆନି, ଡାଇରେକ୍ଟର୍ ମହେଶ ତୁଲସିଆନି ଏବଂ କମ୍ପାନୀର ବ୍ରାଣ୍ଡ୍ ଆମ୍ବାସାଡର ଗୌରୀ ଖାନଙ୍କ ବିରୋଧରେ ଏହି ମାମଲା ରୁଜୁ ହୋଇଛି।

ଏଫ୍ଆଇଆର୍ ଅନୁଯାୟୀ, ବିଲଡରମାନେ ଲକ୍ଷ୍ନୌର ସୁଶାନ୍ତ ଗଲ୍ଫ ସିଟି ଅଞ୍ଚଳର ତୁଲସିଆନି ଗଲ୍ଫ ଭ୍ୟୁରେ ଥିବା ଏକ ଫ୍ଲାଟ ପାଇଁ  ଜଶୱନ୍ତଙ୍କଠାରୁ ପ୍ରାୟ ୮୬ ଲକ୍ଷ ଟଙ୍କା ନେଇଥିଲେ। ଟଙ୍କା ନେବା ପରେ ମଧ୍ୟ ସେମାନେ ଫ୍ଲାଟକୁ ଅନ୍ୟ କାହାକୁ ଦେଇଥିଲେ। ଏଫଆଇଆରରେ ଗୌରୀ ଖାନଙ୍କ ନାମ ଯୋଡିବାର କାରଣ ବର୍ଣ୍ଣନା କରି ଜଶୱନ୍ତ କହିଛନ୍ତି, ବ୍ରାଣ୍ଡ୍ ଆମ୍ବାସାଡର ଗୌରୀ ଖାନଙ୍କ ପ୍ରଚାର- ପ୍ରସାର ଦ୍ୱାରା ପ୍ରଭାବିତ ହେବା ପରେ ସେ ଫ୍ଲାଟ ବୁକ୍ କରିଥିଲେ।

Powered by Froala Editor