ମେସର୍ସ ରୁଙ୍ଗଟା ମେଟାଲସ ପ୍ରାଇଭେଟ ଲିମିଟେଡ଼ କମ୍ପାନୀ ମୟୁରଭଞ୍ଜ ଜିଲ୍ଲା ବାମନଘାଟି ଉପଖଣ୍ଡର ରାଇରଙ୍ଗପୁର ସହର ପୁରୁଣାପାଣି ପଞ୍ଚାୟତ ଆନଦ ପୁର ଓ ଦାଣ୍ଡବସ ଗ୍ରାମରେ ୧୨ ଶହ କୋଟି ଟଙ୍କାର ପୁଞ୍ଜି ବିନିଯୋଗରେ ବୃହତ ଇସ୍ପାତ କାରଖାନା ପ୍ରତିଷ୍ଠା କରିବାକୁ ପ୍ରସ୍ତାବ ରଖିଛି। ଆସନ୍ତା ୧୨ ତାରିଖରେ ମୁଖ୍ୟମନ୍ତ୍ରୀ ମୟୁରଭଞ୍ଜ ଗସ୍ତରେ ଆସୁଥିବା ବେଳେ ଏହା ପୂର୍ବରୁ ବା ସେହିଦିନ ଏହି ଶିଳ୍ପ ସ୍ଥାପନ ନେଇ ବିଧିବଦ୍ଧ ଘୋଷଣା କରିପାରନ୍ତି ବୋଲି ଆଶା କରାଯାଉଛି। କମ୍ପାନୀ ପକ୍ଷରୁ ରାଜ୍ୟ ସରକାରଙ୍କୁ ପ୍ରସ୍ତାବ ଦିଆଯିବା ପରେ ଶିଳ୍ପ ସ୍ଥାପନ ନେଇ କାର୍ଯ୍ୟ ତ୍ୱରାନ୍ୱିତ ହେବା ସହ ଆଶା ଉଜ୍ଜୀବିତ ହୋଇଛି।

ଉଲ୍ଲେଖଯୋଗ୍ୟ ଯେ ମୟୁରଭଞ୍ଜ ତଥା ବାମନଘାଟି ଉପଖଣ୍ଡର ସୁକନ୍ୟା ଦ୍ରୌପଦୀ ମୁର୍ମୁ ରାଷ୍ଟ୍ରପତି ହେବା ପରେ ଉଦ୍ୟୋଗପତି ମାନେ ଏ ଅଞ୍ଚଳରେ ଶିଳ୍ପ ପ୍ରତିଷ୍ଠା କରିବାକୁ ଆଗ୍ରହ ପ୍ରକାଶ କରୁଥିବା ସୂଚନା ମିଳିଛି। ରୁଙ୍ଗଟା କମ୍ପାନୀ ରାଇରଙ୍ଗପୁର ବୃହତ ପୁରୁଣାପାଣି ପଞ୍ଚାୟତ ପୁରୁଣାପାଣି ,ଆନନ୍ଦପୁର ଓ ଦାଣ୍ଡବୋଷ ଗାଁର ୬ ଶହ ଏକର ଜମିରେ ଇସ୍ପାତ କାରଖାନା କରିବାର ପ୍ରସ୍ତାବ ରହିଛି। ଏଥିପାଇଁ ମୋଟ ୭୫୦ ଏକର ଜମି ଆବଶ୍ୟକ ହେଉଥିବା ବେଳେ ପ୍ରଶାସନ ଓ ତହସିଲ ତରଫରୁ ୬୦୦ ଏକର ଜମି ଯୋଗାଇ ଦିଆଯିବ ବୋଲି ରିପୋର୍ଟରେ କୁହାଯାଇଛି। ଏ ନେଇ ୧୦ଜଣିଆ ଦଳ ସମ୍ପୃକ୍ତ ତିନି ରାଜସ୍ବ ଗ୍ରାମ ପ୍ରଦର୍ଶନ କରି ନିରୂପଣ କରିଛନ୍ତି।

ସୂଚନାଯୋଗ୍ୟ ଯେ ବାମନଘାଟି ଉପଖଣ୍ଡରେ ଗୋରୁମୋହିଷାଣି, ବାଦାମପାହାଡ଼ ଓ ସୁଲେଇପାଟ ଅଞ୍ଚଳରେ ରହିଛି ମୋଟ ୧୧ଟି ଲୁହାପଥର ଖଣି। ଏଠାକାର ଲୁହାପଥର ନେଇ ଟାଟା କମ୍ପାନୀ ଜାମସେଦପୁରରେ ବୃହତ ଇସ୍ପାତ କାରଖାନା ପ୍ରତିଷ୍ଠା କରିଥିଲା। ମାତ୍ର ବହୁ ଦାବି ଓ ଆନ୍ଦୋଳନ ପରେ ବି ଜିଲ୍ଲାରେ ଇସ୍ପାତ କାରଖାନା ପ୍ରତିଷ୍ଠା ହୋଇପାରିନି। ଏହି ଅଞ୍ଚଳର ଉଚ୍ଚ ମାନର ଲୁହାପଥର ଝାଡ଼ଖଣ୍ଡର ବିଭିନ୍ନ କାରଖାନା ପାଇଁ ପଠାଯାଉଛି। ଶହେ ବର୍ଷରୁ ଅଧିକ କାଳ ଟାଟା କମ୍ପାନୀ(ଟିସ୍କୋ)ର ମାତୃଖଣି ଗୋରୁମୋହିଷାଣି ତଥା ବାଦାମପାହାଡ଼ ଓ ସୁଲେଇପାଟ ଲୁହାଖଣିରେ କାର୍ଯ୍ୟ ଚାଲୁଥିଲେ ହେଁ ଏଯାବତ ଏହି ଖଣି ବହୁଳ ଉପଖଣ୍ଡରେ ଗୋଟିଏ ହେଲେ ଖଣିଜ ସମ୍ପଦ ଭିତ୍ତିକ ଶିଳ୍ପ ସ୍ଥାପନ ହୋଇପାରି ନାହିଁ।

ସେହିପରି ବିଗତ ଅଶି ଦଶକରେ ତତ୍କାଳୀନ ମୁଖ୍ୟମନ୍ତ୍ରୀ ଜାନକୀ ବଲ୍ଲଭ ପଟ୍ଟନାୟକଙ୍କ ହଜାରେ ଦିନରେ ହଜାରେ ଶିଳ୍ପ ଡ଼ାକରାରେ ବାମନଘାଟି ଉପଖଣ୍ଡରେ ଛୋଟବଡ଼ ଅନେକ କାରଖାନା ପ୍ରତିଷ୍ଠା ହୋଇଥିଲେ ହେଁ ଦୁଇ,ତିନୋଟିକୁ ଛାଡିଦେଲେ ସବୁଠି ତାଲା ଝୁଲୁଛି। ଅସନବଣି ଶିଳ୍ପାଞ୍ଚଳ ଏବେ ଶିକ୍ଷାନୁଷ୍ଠାନ ଅଞ୍ଚଳ ହୋଇପଡିଛି। କାରଖାନା ସବୁ ବନ୍ଦ ହୋଇଯିବାରୁ ଅଞ୍ଚଳର ଅର୍ଥନୀତି ଗୁରୁତର ପ୍ରଭାବିତ ହୋଇଛି। କର୍ମନିଯୁକ୍ତି ଅଭାବରେ ବେକାର ଯୁବକ ଯୁବତୀ ଝାଡ଼ଖଣ୍ଡ, ପଶ୍ଚିମବଙ୍ଗ, ଛତିଶଗଡ଼ ତଥା ସୁଦୂର କର୍ଣ୍ଣାଟକ, ତାମିଲନାଡୁ, ଗୁଜୁରାଟ ଓ କେରଳ ଆଦି ରାଜ୍ୟରେ ଦାଦନ ଖଟିବାକୁ ବାଧ୍ୟ ହେଉଛନ୍ତି। ଏପରିସ୍ଥଳେ ରୁଙ୍ଗଟା କମ୍ପାନୀ ରାଇରଙ୍ଗପୁର ସହର ଉପଖଣ୍ଡର ବୃହତ ଇସ୍ପାତ କାରଖାନା ପ୍ରତିଷ୍ଠା କଲେ କର୍ମ ନିଯୁକ୍ତିର ବ୍ୟାପକ ସୁଯୋଗ ସୃଷ୍ଟି ହେବା ସହ ଅଞ୍ଚଳରେ ଅର୍ଥନୈତିକ ପ୍ରଗତିର ଯୁଗ ସୃଷ୍ଟି ହେବ ବୋଲି ମତ ପ୍ରକାଶ ପାଇଛି।

Powered by Froala Editor