ପ୍ରେମରେ ଏମିତି ଅନ୍ଧ ହୋଇଗଲା ଯେ, କଅଁଳ ଶିଶୁର ମୁହଁକୁ ଚାହିଁଲାମି ମା’ । ସହକର୍ମୀ ହାତରେ ଛୁଆକୁ ଧରାଇ ଛୁ ମାରିଲା । ଏମିତି ଘଟଣା ଘଟିଛି ଖୋର୍ଦ୍ଧା ବୋଲଗଡ଼ ଅଞ୍ଚଳରେ । ମଙ୍ଗଳବାର ଅପରାହ୍ନରେ ଅଙ୍ଗନବାଡି କର୍ମୀ ରୋଜାଲିନ ସେଠି ବୋଲଗଡ଼ ବସଷ୍ଟାଣ୍ଡ ନିକଟରେ ତାଙ୍କ ସହକର୍ମୀ ସଞ୍ଜୁଲତା ସିଂଙ୍କୁ ନିଜ ଶିଶୁକନ୍ୟା ସହ ମୋବାଇଲ ଦେଇ ସମ୍ପର୍କୀୟଙ୍କ ନିକଟରୁ ଆସୁଛି କହି ଆଉ ଫେରିନାହାନ୍ତି । ଏବେ ସଞ୍ଜୁଲତା ଶିଶୁକନ୍ୟାକୁ ଧରି ବୋଲଗଡ଼ ଥାନାରେ ଅଭିଯୋଗ କରିବା ପରେ ପୋଲିସ ମାମଲା ରୁଜୁ କରିଛି ।

ରୋଜାଲିନଙ୍କ ସହକର୍ମୀ କହିଛନ୍ତି,''ଆମେ ଏକ ସରକାରୀ କାର୍ଯ୍ୟକ୍ରମରେ ବୋଲଗଡ଼ ଯାଇଥିଲୁ । ହେଲେ ସେଠାରେ ସେ କାର୍ଯ୍ୟକ୍ରମରେ ଯୋଗ ନଦେଇ ତାର ସମ୍ପର୍କୀୟଙ୍କ ଦେହ ଭଲ ନଥିବା କହି ତାଙ୍କୁ ଦେଖା କରିବାକୁ ଯାଇଥିଲେ । ମତେ ଶିଶୁକନ୍ୟା ଓ ଫୋନକୁ ଦେଇ ଯାଇଥିଲେ । କିନ୍ତୁ ଦୀର୍ଘ ସମୟ ବିତିଗଲେ ମଧ୍ୟ ରୋଜାଲିନ ଆଉ ଫେରି ନଥିଲେ । ଶିଶୁକନ୍ୟାକୁ ଧରି ମୁଁ ଘରକୁ ଆସିଥିଲି । ପରେ ସମସ୍ତ କଥା ରୋଜାଲିନଙ୍କ ଶାଶୁକୁ କହିଥିଲି । ରୋଜାଲୀନଙ୍କ ଶାଶୁଙ୍କୁ ଶିଶୁକୁ ଦେବା ପାଇଁ ଚେଷ୍ଟା କରିଥିଲି । ହେଲେ ସେ ମୋଠାରୁ ଝିଅକୁ ନେଇ ନଥିଲେ । ଛୁଆକୁ ନେବାକୁ ସେ ନାରାଜ ହେବା ପରେ ଥାନାରେ ଏତଲା ଦେଇଛି ।'' ବୋଲଗଡ଼ ପୋଲିସ ମାମଲା ରୁଜୁ କରିବା ସହ ଶିଶୁକନ୍ୟାଟିକୁ ସିଡବ୍ଲୁସିକୁ ହସ୍ତାନ୍ତର କରିଛି । 

Powered by Froala Editor