ନର୍ସିଂ ଛାତ୍ରୀଙ୍କ ଝୁଲନ୍ତା ମୃତଦେହ ଉଦ୍ଧାର
ଭୁବନେଶ୍ୱର: ଇନଫୋସିଟି ଥାନା ଅଧିନ ଏକ ଘରୋଇ କଲେଜ ହଷ୍ଟେଲରୁ ନର୍ସିଂ ଛାତ୍ରୀଙ୍କ ଝୁଲନ୍ତା ମୃତଦେହ ଉଦ୍ଧାର କରାଯାଇଛି । ସେ ହେଲେ ଶ୍ରେଷ୍ଠା ବେରା(୨୩) । ଘର ପଶ୍ଚିମବଙ୍ଗ । ଏଠାରେ ରହି ବିଏସଏସି ନର୍ସିଂ ଶେଷ ବର୍ଷରେ ପଢୁଥିଲେ । ଆତ୍ମହତ୍ୟା କାରଣ ଅସ୍ପଷ୍ଟ ଥିବା ବେଳେ ଛାତ୍ରୀଙ୍କୁ ରାଗିଂ ହୋଇଥିବା ନେଇ ସନେ୍ଦହ କରାଯାଉଛି । ସୂଚନା ଅନୁଯାୟୀ, ଶ୍ରେଷ୍ଠା ଗତ ୧୬ ତାରିଖରେ ଗାଁକୁ ଛୁଟିରେ ଯାଇଥିଲେ । ଆଜି ସକାଳେ ହଷ୍ଟେଲକୁ ଫେରିଥିଲେ । ଶ୍ରେଷ୍ଠା ରୁମ କବାଟ ବନ୍ଦ କରି ଭିତରେ ରହିଥିଲେ । ମଧ୍ୟାହ୍ନ ସାଢେ଼ ୧୨ଟା ସମୟରେ ତାଙ୍କ ସହପାଠୀ ଆସି କବାଟ ବାଡେଇଥିଲେ । ହେଲେ ସେ ଖୋଲି ନଥିଲେ । ସେ ଏନେଇ ହଷ୍ଟେଲର ୱାଡେନଙ୍କୁ ଜଣାଇଥିଲେ । ୱାଡେ଼ନ ଆସି କବାଟ ବାଡେ଼ଇଥିଲେ ମଧ୍ୟ ଶ୍ରେଷ୍ଠାଙ୍କ କୌଣସି ଉତ୍ତର ମିଳିନଥିଲା । ପରେ କବାଟ ଭଙ୍ଗା ଯାଇଥିଲା । ଶ୍ରେଷ୍ଠା ଫ୍ୟାନରେ ଝୁଲି ଆତ୍ମହତ୍ୟା କରିଥିବା ଦେଖିବାକୁ ମିଳିଥିଲା । ଖବର ପାଇ ପୁଲିସ ପହଞ୍ଚି ତଦନ୍ତ ଆରମ୍ଭ କରିଥିଲା ।
ପ୍ରାଥମିକ ତଦନ୍ତ ପରେ ଥାନାର ଭାରପ୍ରାପ୍ତ ଅଧିକାରୀ ପ୍ରମୋଦ ପଟ୍ଟନାୟକ କହିଛନ୍ତି ଶ୍ରେଷ୍ଠାଙ୍କ ସାଙ୍ଗମାନଙ୍କଠାରୁ କିଛି ତଥ୍ୟ ମିଳିଛି । ସେ ପ୍ରାୟ ସମୟ ମାନସିକ ଦୁଶ୍ଚିନ୍ତାରେ ରହୁଥିଲେ । ନିଦ ଔଷଧ ସେବନ କରୁଥିଲେ । ରାତି ସମୟରେ ଅନିଦ୍ରା ରହୁଥିଲେ, ହେଲେ କ୍ଲାସରେ ଶୋଇ ପଡ଼ୁଥିଲେ । ଗତ ମାସେ ଭିତରେ ତାଙ୍କର ପ୍ରାୟ ୧୦ କେଜି ଓଜନ କମି ଯାଇଥିଲା । ଏଥିପାଇଁ ଡ଼ାକ୍ତରଙ୍କର ପରାମର୍ଶ ମଧ୍ୟ ନେଉଥିଲେ । ତାଙ୍କ ପରିବାର ଲୋକେ ପହଞ୍ଚିଲେ ପରେ ଅସଲ କାରଣ ଜଣାପଡ଼ିବ ବୋଲି ଶ୍ରୀ ପଟ୍ଟନାୟକ କହିଥିଲେ । ଅନ୍ୟପଟେ ରାଗିଂକୁ ନେଇ ପୁଲିସ ମଧ୍ୟ ତନାଘନା କରୁଛି ।
Powered by Froala Editor