ଓଲିଉଡ୍ ଅଭିନେତ୍ରୀଙ୍କ ଘରେ ଗାଡ଼ି ଭଙ୍ଗାରୁଜା

କଟକ: ଓଲିଉଡ୍ର ଜଣେ ଆଗ ଧାଡ଼ିର ଅଭିନେତ୍ରୀଙ୍କ ଘରେ ଗାଡ଼ି ଭଙ୍ଗାରୁଜା । ଘଟଣା ଘଟିଛି କଟକ ବିଡ଼ାନାସୀରେ । ପ୍ରେମ ବ୍ୟାପାରକୁ କେନ୍ଦ୍ରକରି ଜଣେ ଯୁବକ ଏଭଳି କାଣ୍ଡ ଭିଆଇ ଥିବା ଆଲୋଚନା ହେଉଛି ।
ବିଡ଼ାନାସୀ ବନ୍ଧ ଛକରେ ରହୁଥିବା ଏହି ଅଭିନେତ୍ରୀ ଜଣଙ୍କ ବେଶ୍ ଜଣାଶୁଣା । ସେ ଏକାଧିକ ଚଳଚ୍ଚିତ୍ରରେ ଅଭିନୟ କରିଛନ୍ତି । ଶନିବାର ସକାଳେ ଏକ କାର୍ରେ କିଛି ଯୁବକ ଅଭିନେତ୍ରୀ ରହୁଥିବା ଆପାର୍ଟମେଣ୍ଟ ନିକଟକୁ ଆସିଥିଲେ । କାର୍ରୁ ଜଣେ ଯୁବକ ଓହ୍ଲାଇ ଅଶ୍ଳୀଳ ଭାଷାରେ ଗାଲିଗୁଲଜ କରିଥିଲେ । ଏପରିକି ଫିଙ୍ଗା ଫୋପଡ଼ା କରିବା ସହିତ ଆପାର୍ଟମେଣ୍ଟ ତଳେ ଥିବା ଅଭିନେତ୍ରୀଙ୍କ ଗାଡ଼ି ଭଙ୍ଗାରୁଜା କରିଥିଲେ । ଅଭିନେତ୍ରୀ ଜଣଙ୍କୁ ଇଙ୍ଗିତ କରି ଗାଳି କରିଥିଲେ । କିଛି ସମୟ ଯୁବକମାନେ ଏମିତି ଉତ୍ପାତ କରିବା ପରେ ଘଟଣାସ୍ଥଳରୁ ଫେରାର୍ ହୋଇଯାଇଥିଲେ ।
ଏହି ଘଟଣା ପରେ ଉକ୍ତ ଆପାର୍ଟମେଣ୍ଟର ଜଣେ ଯୁବକ ତଳକୁ ଆସିଥିଲେ । ତାଙ୍କ ଗାଡ଼ି ମଧ୍ୟ ଯୁବକମାନେ ଭଙ୍ଗାରୁଜା କରିଥିବା ଦେଖିଥିଲେ । ଏହାପରେ ସେହି ଯୁବକ ଓ ଅଭିନେତ୍ରୀ ବିଡ଼ାନାସୀ ଥାନାକୁ ଯାଇ ଏତଲା ଦେଇଛନ୍ତି । ଅଭିନେତ୍ରୀ ଜଣକ ସିଧାସଳଖ ଏହି ମାମଲା ଠାରୁ ଦୂରେଇ ରହି ସେହି ଯୁବକଙ୍କ ଜରିଆରେ ଅଭିଯୋଗ କରିଛନ୍ତି ।
ଏହି ଘଟଣାକୁ ନେଇ ଏବେ ବିଡ଼ାନାସୀ ଅଞ୍ଚଳରେ ବିଭିନ୍ନ କଥା ଆଲୋଚନା ହେଉଛି । ଅଭିନେତ୍ରୀ ଜଣକ କୁଆଡ଼େ ସେଠାରେ ତାଙ୍କ ପୁରୁଷ ବନ୍ଧୁଙ୍କ ସହିତ ରହୁଥିଲେ । କିଛି ଦିନ ପୂର୍ବରୁ ଦୁହିଁଙ୍କ ବ୍ରେକ୍ଅପ୍ ହୋଇଯାଇଛି । ଫଳରେ ପୁରୁଷ ବନ୍ଧୁ ଜଣକ ସେ ସ୍ଥାନ ଛାଡ଼ି ପଳାଇଛନ୍ତି । ଆଉ ଏହି ପ୍ରେମ ସମ୍ପର୍କ ତୁଟିବା ଘଟଣାରେ ସେହି ପୁରୁଷ ବନ୍ଧୁ ଜଣକ ନିଜର କିଛି ସାଙ୍ଗମାନଙ୍କ ସହିତ ଆସି ଗାଳିମନ୍ଦ କରିବା ଓ ଭଙ୍ଗାରୁଜା କରିଥିବା ଆଲୋଚନା ହେଉଛି ।
ତେବେ ଏଠାରେ ପ୍ରଶ୍ନ ଉଠୁଛି ଯଦି ଅଭିନେତ୍ରୀଙ୍କ ସହିତ ଯଦି ତାଙ୍କର ବିବାଦ ଥିଲା ତେବେ ସେ ଅନ୍ୟ ଜଣେ ପୁରୁଷଙ୍କ ଗାଡ଼ି ଭାଙ୍ଗିଲେ କାହିଁକି? ଏହା ପଛରେ ଆଉ କ’ଣ ରହସ୍ୟ ରହିଛି? ଅଭିନେତ୍ରୀଙ୍କ ସହିତ ତାଙ୍କର ସମ୍ପର୍କ କିଭଳି? ଏଭଳି ଅନେକ କିଛି କଥା ଏବେ ଚର୍ଚ୍ଚା ହେଉଛି । ଏନେଇ ଅଭିନେତ୍ରୀ ଜଣଙ୍କ କିଛି ସ୍ପଷ୍ଟ କରି ନାହାନ୍ତି । ପୁଲିସ୍ ମଧ୍ୟ ମୁହଁ ଖୋଲିନି । ଗଣମାଧ୍ୟମ ସମ୍ମୁଖରେ ବେଶ୍ ମାପିଚୁପି ଉତ୍ତର ରଖୁଛି ପୁଲିସ୍ ।
Powered by Froala Editor