ଗୋପାଳପୁର: ଗଞ୍ଜାମ ଜିଲା ଗୋଳନ୍ଥରା ଥାନା ଅଞ୍ଚଳର ଏକ ଘରୋଇ କଲେଜର ହଷ୍ଟେଲରେ ରହୁଥିବା ଜନୈକା ଛାତ୍ରୀଙ୍କ ମୃତଦେହ ପୋଲିସ ଜବତ କରିଛି। ଛାତ୍ରୀ ଜଣକ ହେଲେ ବୁଗୁଡା ଥାନା ଅନ୍ତର୍ଗତ ଘୋଡ଼ାପଡ଼ା ଗ୍ରାମର ସ୍ବର୍ଗତ ଗଣେଶ ଭୋଳଙ୍କ ଝିଅ ଶ୍ରୀତି ଭୋଳ (୨୦)। ସେ ଉକ୍ତ ହଷ୍ଟେଲରେ ରହି ବିସିଏ ଦ୍ୱିତୀୟ ବର୍ଷରେ ଅଧ୍ୟୟନ କରୁଥିବା ଜଣାପଡିଛି। ଏନେଇ ଜାଣିିବା ପରେ ବ୍ରହ୍ମପୁର ଏସ୍‌ପି ଘଟଣାସ୍ଥଳ ପରିଦର୍ଶନ କରି କଲେଜ କର୍ତ୍ତୃପକ୍ଷଙ୍କ ସହ ଆଲୋଚନା କରିଛନ୍ତି।
ଖବରରୁ ଜଣାପଡ଼ିଛି, ଗୋଳନ୍ଥରା ଥାନା ଅନ୍ତର୍ଗତ ଗୋଳନ୍ଥରାସ୍ଥିତ ଗାନ୍ଧୀ କଲେଜରେ ଶ୍ରୀତି ଓ ତାଙ୍କ ଭଉଣୀ ଜ୍ୟୋତି ଭୋଳ ଅଧ୍ୟୟନ କରୁଥିଲେ। ଦୁଇଭଉଣୀ ହଷ୍ଟେଲରେ ଅନ୍ୟ ୫ ଜଣ ସାଙ୍ଗଙ୍କ ସହ ରହୁଥିଲେ। ଶନିବାର ସକାଳେ ରୁମ୍‌ ପାର୍ଶ୍ୱରେ ଥିବା ଏକ ରୁମରେ ଶ୍ରୀତି ସିଲିଂ ଫ୍ୟାନରେ ବେକରେ ଏକ ଲୁଗା ବାନ୍ଧି ଝୁଲି ପଡ଼ିଥିବା ଦେଖିତ୍ବାକୁ ମିଳିଥିଲା। ତୁରନ୍ତ ଏ ସମ୍ପର୍କରେ ଜ୍ୟୋତି ସହପାଠୀ ଓ କଲେଜ କର୍ତ୍ତୃପକ୍ଷଙ୍କୁ ଜଣାଇଥିଲେ। ତାଙ୍କୁ ଉଦ୍ଧାର କରି ବ୍ରହ୍ମପୁର ବଡ଼ ମେଡିକାଲକୁ ନିଆଯାଇଥିଲା। ସେଠାରେ ଡାକ୍ତର ଶ୍ରୀତିଙ୍କୁ ମୃତ ଘୋଷଣା କରିଥିଲେ। ଘଟଣାସ୍ଥଳକୁ ବ୍ରହ୍ମପୁର ଏସ୍‌ପି ଡା. ସର୍ବଣା ବିବେକ ଏମ୍‌ ଓ ଗୋଳନ୍ଥରା ପୋଲିସ ପହଞ୍ଚି ତଦନ୍ତ କରିଛନ୍ତି।

Powered by Froala Editor