ମହାରାଷ୍ଟ୍ର ବନ୍ୟା: ଭୂସ୍ଖଳନରେ ଗଲାଣି ୩୬ ଜୀବନ, ୩୫ ଜଣଙ୍କ ପତ୍ତା ମିଳୁନି
ମୁମ୍ବାଇ: କିଛିଦିନ ହେବ ମହାରାଷ୍ଟ୍ରରେ ପ୍ରବଳ ବର୍ଷା ଜାରି ରହିଛି । ଫଳରେ ବନ୍ୟା ସୃଷ୍ଟି ପରିସ୍ଥିତି ସୃଷ୍ଟି ହୋଇଛି । ଲଗାଣ ବର୍ଷାରେ ବହୁ ଘର ଭୁଶୁଡ଼ି ପଡ଼ିଛି । ସବୁଠାରୁ ଅଧିକ ପ୍ରଭାବିତ ହୋଇଛି ରାଇଗଡ଼ ଜିଲ୍ଲା । ଏଠାରେ ବର୍ଷା ୪୦ ବର୍ଷର ରେକର୍ଡ ଭାଙ୍ଗିଛି । ବନ୍ୟା ବୀଭିଷିକା ଯୋଗୁଁ ରାୟଗଡ଼ ଜିଲ୍ଲାର ମହାଡ଼ରେ ଭୂସ୍ଖଳନ ହୋଇଛି । ଏଥିରେ ୩୬ ଜଣଙ୍କ ମୃତ୍ୟୁ ଘଟିଛି । ଏବେ ବି ୩୫ରୁ ଅଧିକ ବ୍ୟକ୍ତିଙ୍କ ପତ୍ତା ମିଳୁନି । ମୃତକଙ୍କ ମଧ୍ୟରେ ତଲଇର ୩୨ ଜଣ ଥିବା ବେଳେ ସାଖର ବାଡ଼ିର ୪ ଜଣ ରହିଛନ୍ତି । ଏହି ଦୁଇ ସ୍ଥାନରୁ ୧୫ରୁ ଅଧିକ ଜଣଙ୍କୁ ଉଦ୍ଧାର କରାଯାଇଛି । ଏନଡିଆର୍ଏଫ୍, କୋଷ୍ଟଗାର୍ଡ, ବାୟୁସେନା, ଅଗ୍ନିଶମ ବାହିନୀ ଓ ସ୍ଥାନୀୟ ପୁଲିସ୍ ପକ୍ଷରୁ ଉଦ୍ଧାର କାର୍ଯ୍ୟ ଜାରି ରହିଛି । ହେଲିକପ୍ଟର ନିୟୋଜିତ କରାଯାଇଛି । ସେଠାରେ ଏବେ ବି ସ୍ଥିତି ସଙ୍ଗୀନ ରହିଛି ।
ରାୟଗଡ଼ ଜିଲ୍ଲାପାଳ ନିଧି ଚୌଧୁରୀଙ୍କ ସୂଚନା ଅନୁଯାୟୀ, ୨୪ ଘଣ୍ଟା ଭିତରେ ତିନି ସ୍ଥାନରେ ଭୂସ୍ଖଳନ ହୋଇଛି । ଅନେକ ସ୍ଥାନରେ ରାସ୍ତା ଧୋଇ ଯାଇଛି । ଫଳରେ ବହୁ ଅଞ୍ଚଳ ବାହ୍ୟ ଜଗତରୁ ବିଚ୍ଛିନ୍ନ ହୋଇଯାଇଛି । ତେଣୁ ଏନ୍ଡିଆରଏଫ୍ ଟିମ୍ ପହଞ୍ଚିବାରେ ବିଳମ୍ବ ହେବା ସହ ଉଦ୍ଧାର କାର୍ଯ୍ୟ ପ୍ରଭାବିତ ହେଉଥିବା ସେ କହିଛନ୍ତି । ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେ ପରିସ୍ଥିତି ସମୀକ୍ଷା କରିଛନ୍ତି । ତୁରନ୍ତ ଆବଶ୍ୟକ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଛନ୍ତି । ବିପନ୍ନମାନଙ୍କୁ ସାହାଯ୍ୟ ଯୋଗାଇ ଦେବାକୁ କହିଛନ୍ତି । ପୁନେରୁ ଦୁଇଟି ସ୍ୱତନ୍ତ୍ର ଟିମ୍କୁ ରାୟଗଡ଼ ଓ ରତ୍ନଗିରିକୁ ପଠାଯାଇଛି ।
ସ୍ଥିତି ଉପରେ କେନ୍ଦ୍ର ନଜର ରଖିଛି । ମହାରାଷ୍ଟ୍ର ସରକାରଙ୍କ ସହିତ ଅନ୍ୟ ରାଜ୍ୟମାନେ ମଧ୍ୟ କାନ୍ଧ ମିଳାଇଛନ୍ତି । ଓଡ଼ିଶାରୁ ଓଡ୍ରାଫ ଟିମ୍ ମହାରାଷ୍ଟ୍ର ଗସ୍ତ କରିଛନ୍ତି । ବନ୍ୟା ପ୍ରଭାବିତ ଅଞ୍ଚଳରେ ଏମାନେ କାର୍ଯ୍ୟରେ ନିୟୋଜିତ ହୋଇଛନ୍ତି । ବନ୍ୟାରେ ବିଶେଷ ଭାବେ ପ୍ରଭାବିତ ହୋଇଛି ରାଇଗଡ଼, ରତ୍ନଗିରି, କୋହ୍ଲାପୁର, ଥାନେ ଓ ପାଲଘର ଜିଲ୍ଲା । କୋଙ୍କଣ ଡିଭିଜନରେ ବର୍ଷା ଜନିତ ଦୁର୍ଘଟଣାରେ ଏପର୍ଯ୍ୟନ୍ତ ୮ ଜଣ ପ୍ରାଣ ହରାଇଥିବା ବେଳେ ୭୦୦ ଲୋକେ ସୁରକ୍ଷିତ ସ୍ଥାନକୁ ସ୍ଥାନାନ୍ତର ହୋଇଛନ୍ତି । କୋହ୍ଲାପୁରର ଚିଖାଲୀରେ ଫଶି ରହିଥିବା ଲୋକଙ୍କୁ ବାହାରକୁ ଆଣିବା ଲାଗି ଏନଡିଆରଏଫର ୨ ଟିମ୍ ଲଗାତାର ପ୍ରୟାସ ଜାରି ରଖିଛନ୍ତି । ୨୪ ଘଣ୍ଟା ପାଇଁ ଅନେକ ଜିଲ୍ଲାକୁ ବର୍ଷା ଆଲର୍ଟ ଥିବାରୁ ସ୍ଥିତି ବିଗିଡ଼ିବାର ଆଶଙ୍କା ରହିଛି ।
ଅପରପକ୍ଷରେ ବର୍ଷା ଟିକେ କମିଥିବାରୁ ରତ୍ନଗିରିର ଖେଡରେ ଜମି ଥିବା ବନ୍ୟାପାଣି ଧୀରେଧୀରେ ଖସିବାକୁ ଲାଗିଛି । ଚିପଲୁନରେ ଏବେ ବି ପାଣି ଭରି ରହିଛି । ହଜାର ଲୋକ ଏହି ପାଣି ଘେରରେ ଫସି ରହିଛନ୍ତି ।
Powered by Froala Editor