ଡାହାଣୀ ସନ୍ଦେହ; ମହିଳାଙ୍କୁ ଖଣ୍ଡାରେ ହାଣିଲା
ରାଇରଙ୍ଗପୁର: ଅନ୍ଧବିଶ୍ୱାସ ଦୂର କରିବା ପାଇଁ ଉଭୟ ରାଜ୍ୟ ଓ କେନ୍ଦ୍ର ସରକାର ଅନେକ ଯୋଜନା କରିଛନ୍ତି । ସ୍ୱେଚ୍ଛାସେବୀମାନେ ଏନେଇ ସଚେତନ କରୁଛନ୍ତି । ହେଲେ କିଛି ସୁଫଳ ମିଳୁନି । ମୟୂରଭଞ୍ଜ ଜିଲ୍ଲା ଜାମଦା ଥାନା ତେନ୍ଦ୍ରା ଗ୍ରାମର ଡିପା ସାହିରେ ଡାହାଣୀ ସନ୍ଦେହରେ ଜଣେ ମହିଳାଙ୍କୁ ମରଣାନ୍ତକ ଆକ୍ରମଣ କରାଯାଇଛି । ଗୁରୁତର ଅବସ୍ଥାରେ ତାଙ୍କୁ ପ୍ରଥମେ ରାଇରଙ୍ଗପୁର ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଅବସ୍ଥା ଗୁରୁତର ହେବାରୁ ତାଙ୍କୁ ବାରିପଦା ଡାକ୍ତରଖାନାକୁ ସ୍ଥାନାନ୍ତର କରାଯାଇଛି । ତାଙ୍କ ଶରୀରରେ ଗଭୀର ଆଘାତ ଲାଗିଛି ।
ତେନ୍ଦ୍ରା ଗ୍ରାମର ବର୍ଜୁ ତିରିଆର ଦୁଇ ଯାଁଳା ସନ୍ତାନଙ୍କର କିଛି ଦିନ ତଳେ ମୃତ୍ୟୁ ହୋଇଥିଲା । ବର୍ଜୁ ମନରେ ସନ୍ଦେହ ସୃଷ୍ଟି ହୋଇଥିଲା ଯେ ସେଇ ସାହିର ପାଲ ସିଙ୍କୁ ନାମକ ମହିଳା ଗୁଣି ଗାରେଡି କରି ଛୁଆମାନଙ୍କୁ ମାରିଦେଇଛି । ଫଳରେ ରବିବାର ରାତି ପ୍ରାୟ ୮ଟା ବେଳକୁ ପାଲକୁ ବର୍ଜୁ ଖଣ୍ଡାରେ ଅତର୍କିତ ଆକ୍ରମଣ କରିଥିଲା । ପୁଲିସ୍ ଅଭିଯୁକ୍ତ ବର୍ଜୁକୁ ଗିରଫ କରି ତଦନ୍ତ ଜାରି ରଖିଛି ।
Powered by Froala Editor
