ରଥଖଳା ହାଲଚାଲ, ତିନି ରଥରେ ଲାଗିଲା ପ୍ରଭା
ପୁରୀ: ଶୁକ୍ରବାର ତିନିରଥରେ ଶ୍ରୀଜୀଉଙ୍କ ସିଂହାସନ ପଛପଟେ ପ୍ରଭା ସଂଯୋଗ କରାଯାଇଛି । ସେଥିରେ ରୂପକାରମାନେ ନୃସିଂହ ମୂର୍ତ୍ତି ଖୋଦେଇ କରିଥିବା ବେଳେ ଚିତ୍ରକାର ରଙ୍ଗ କରିଛନ୍ତି । ଦୁଆର ବେଢ଼ାରେ କନାପକା ଶେଷ ହୋଇଛି । ମଗରବତୀ ଗୁଡ଼ିକରେ ମଗରପଟି ପକାଯାଇଛି । ଦରଜି ସେବକମାନେ ଯୋଡେଇ କାର୍ଯ୍ୟ ଶେଷ କରିଛନ୍ତି । କଳାଛତି ଓ ଧଳାଛତି ସମେତ ଓଲାରରେ କନା ପକାଯାଇଛି । ତିନି ରଥ ତଳେ ଲାଗିବାକୁ ଥିବା ବ୍ରେକରେ ରବର ଲଗାଯାଇ ରଙ୍ଗ କରାଯାଇଛି । କେତେକ ଅଖରେ ଫାଟ ଦେଖା ଦେଇଥିବାରୁ ଲୁହା ବଳା ଲଗାଯାଇଛି । ଆଗାମୀ ୧୨ ତାରିଖ ଶ୍ରୀଗୁଣ୍ଡିଚା ଯାତ୍ରାଦିନ ନିର୍ଦ୍ଧାରିତ ସମୟ ପୂର୍ବରୁ ଚତୁର୍ଦ୍ଧାମୂର୍ତ୍ତିଙ୍କ ପହଣ୍ଡି ଅନୁଷ୍ଠିତ ହେବ ବୋଲି ଶ୍ରୀମନ୍ଦିର ମୁଖ୍ୟ ପ୍ରଶାସକ ଡଃ କି୍ରଷନ କୁମାର ଗଣମାଧ୍ୟମକୁ ସୂଚନା ଦେଇଛନ୍ତି । ସେ କହିଲେ ରାଜ୍ୟ ସରକାରଙ୍କ ନିଦେ୍ର୍ଧଶ ଅନୁଯାୟୀ ଏ ପର୍ଯ୍ୟନ୍ତ ସେବାୟତ ଏବଂ ମନ୍ଦିର ପ୍ରଶାସନ କର୍ମଚାରୀଙ୍କ ସମେତ ପ୍ରାୟ ୨ ହଜାର ଲୋକଙ୍କ କରୋନା ପରୀକ୍ଷା କରାଯାଇଛି । ମନ୍ଦିର ପ୍ରଶାସନ ପକ୍ଷରୁ ସବୁ ସେବାୟତଙ୍କୁ ନୂଆ ଗାମୁଛା ଏବଂ ତୁଣ୍ଡି ଯୋଗାଇ ଦିଆଯିବ । ରଥଯାତ୍ରାରେ କରୋନା କଟକଣା କଡ଼ାକଡ଼ି କାର୍ଯ୍ୟକାରୀ କରାଯିବ ବୋଲି ସେ କହିଛନ୍ତି ।
Powered by Froala Editor
