ନୂଆଦିଲ୍ଲୀ: ବିଧାନସଭା ନିର୍ବାଚନରେ ଐତିହାସିକ ବିଜୟ ପରେ  ଦିଲ୍ଲୀରେ ସରକାର ଗଢ଼ିବାକୁ ଯାଉଥିବା ବିଜେପି ଏଣିକି ଆପ୍‌କୁ ଜୋରଦାର ଟାର୍ଗେଟ୍‌ କରିବ । ପୂର୍ବର ଦୁର୍ନୀତି ମାମଲାଗୁଡ଼ିକର  ତଦନ୍ତ ସକାଶେ ନୂଆ ବିଜେପି ସରକାର  ରଣନୀତି ବନାଇବ । ଏହି କ୍ରମରେ ପ୍ରଥମ  କ୍ୟାବିନେଟ୍‌ ବୈଠକରେ ଦିଲ୍ଲୀ ସରକାର ଏସ୍‌ଆଇଟି ଗଠନ କରିବ । ଦିଲ୍ଲୀ ବିଜେପି  ରବିବାର ଏହି ଘୋଷଣା କରିଛି । ପ୍ରଦେଶ ବିଜେପି ମୁଖ୍ୟ ବୀରେନ୍ଦ୍ର  ସଚଦେବା କହିଛନ୍ତି, ଦୁର୍ନୀତି ପାଇଁ ଦଳ ‘ଶୂନ  ସହିଷ୍ଣୁତା’ ନୀତି ଆପଣାଉଛି । ଯେଉଁମାନେ  (ଆପ୍‌ ନେତା) ସ୍କାମ୍‌ରେ ସମ୍ପୃକ୍ତ ଅଛନ୍ତି,  ସେମାନଙ୍କୁ ଉତ୍ତରଦାୟୀ ହେବାକୁ ପଡ଼ିବ ।  ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦୁର୍ନୀତି ବିରୋଧରେ  ଶୂନ ସହିଷ୍ଣୁତା ନୀତି ଆପଣାଇବାକୁ ବାରମ୍ବାର  କହୁଛନ୍ତି । ତେଣୁ ନୂଆ ବିଜେପି ସରକାରର  ପ୍ରଥମ କ୍ୟାବିନେଟ୍‌ ବୈଠକରେ ସିଏଜି ରିପୋର୍ଟ ଉପସ୍ଥାପନ ହେବ । ସମସ୍ତ ଦୁର୍ନୀତି ମାମଲାର  ତଦନ୍ତ ଲାଗି ଆମେ ଏକ ସ୍ୱତନ୍ତ୍ର ତଦନ୍ତକାରୀ  କମିଟି (ଏସ୍‌ଆଇଟି) ଗଠନ କରିବୁ । 

ସଚଦେବା କହିଛନ୍ତି, ଦିଲ୍ଲୀର  ଭୋଟରମାନେ ବିକାଶ ପାଇଁ ବିଜେପିକୁ  ସମର୍ଥନ ଜଣାଇଛନ୍ତି । ମୋଦିଙ୍କ ନେତୃତ୍ୱ  ଉପରେ ସେମାନଙ୍କର ଯଥେଷ୍ଟ ଭରସା ରହିଛି ।  ନିର୍ବାଚନରେ କଂଗ୍ରେସର ବିଫଳତାକୁ ନେଇ  ସଚଦେବା କହିଛନ୍ତି, ଐତିହାସିକ ଦୃଷ୍ଟିକୋଣରୁ  ଏକ ବଡ଼ ଦଳ ହୋଇଥିଲେ ସୁଦ୍ଧା ଏହାକୁ ବଡ଼  ବିଫଳତାର ସାମ୍ନା କରିବାକୁ ପଡ଼ିଛି । ଦଳକୁ  ଆହୁରି କଠିନ ପରିଶ୍ରମ କରିବାକୁ ପଡ଼ିବ ।  ବିଜେପି ନେତା ତଥା ରାଜୌରି ଗାର୍ଡେନ  ବିଧାୟକ ମାନଜିନ୍ଦର ସିଂହ ସିରସା କହିଛନ୍ତି,  ଦିଲ୍ଲୀକୁ ନଷ୍ଟ କରି ଦିଆଯାଇଛି । ଅରବିନ୍ଦ  କେଜ୍‌ରିୱାଲ ହଜାର ହଜାର କୋଟି ଟଙ୍କାର  ଦୁର୍ନୀତି କରିଛନ୍ତି । ଏହାର ପର୍ଦ୍ଦାଫାସ ଲାଗି  ଗୃହରେ ସିଏଜି ରିପୋର୍ଟ ଆଗତ କରାଯିବ ।

Powered by Froala Editor