ପ୍ରେମିକାଙ୍କୁ ବେଆଇନ ଭାବରେ ବିବାହ କରି ପ୍ରେମିକଙ୍କୁ ମହଙ୍ଗା ପଡ଼ିଛି । ବାଂଲାଦେଶରେ ବିବାହ କରି ଭାରତ ଫେରିବା ବାଟରେ ବିଏସ୍‌ଏଫ୍ ଯବାନମାନେ ଦମ୍ପତିଙ୍କୁ ଗିରଫ କରିଛନ୍ତି । ଯୁବକଙ୍କ ନାମ ଜୟକାନ୍ତ ଚନ୍ଦ୍ର ରାୟ (୨୪) ଏବଂ ଯୁବତୀଙ୍କ ନାମ ପରିନିତି (୧୮) । ଯୁବକ ଜଣକ ନଦିଆ ଜିଲ୍ଲାର ଶାନ୍ତିପୁର ପୁଲିସ ଷ୍ଟେସନ ଅନ୍ତର୍ଗତ ବଲଭପୁର ଗାଁର ।

ପଚରାଉଚରା ବେଳେ ସେମାନେ କହିଛନ୍ତି, ଉଭୟଙ୍କ ପରିଚୟ ଫେସବୁକ୍ ମାଧ୍ୟମରେ ହୋଇଥିଲା । ପରେ ସମ୍ପର୍କ ପ୍ରେମରେ ପରିଣତ ହୋଇଥିଲା । ଶେଷରେ ଉଭୟ ନିଷ୍ପତ୍ତି ନେଇଥିଲେ ପରସ୍ପର ଜୀବନ ସାଥୀ ହେବାକୁ । ଶେଷରେ ଏହାକୁ ସେମାନେ ବାସ୍ତବରେ ପରିଣତ କରିଛନ୍ତି । ଯୁବତୀ ଜଣଙ୍କ ହେଉଛନ୍ତି ବାଂଲାଦେଶ ନେରଲିର ପରିନିତି ।

ପରିନିତିଙ୍କୁ ବିବାହ କରିବା ପାଇଁ ଜୟକାନ୍ତ ବାଂଲାଦେଶ ଯାଇ ତାଙ୍କୁ ବିବାହ କରିବାକୁ ସ୍ଥିର କଲେ । ତା’ପରେ ଆପୁ ନାମକ ଜଣେ ଦଲାଲଙ୍କ ସାହାଯ୍ୟରେ ଜୟକାନ୍ତ ବେଆଇନ ଭାବେ ସୀମା ପାର ହୋଇ ମାର୍ଚ୍ଚ ୮ ରେ ବାଂଲାଦେଶରେ ପହଞ୍ଚିଥିଲେ ।

ସେଠାରେ ସେ ମାର୍ଚ୍ଚ ୧୦ରେ ପରିନିତିଙ୍କୁ ବିବାହ କରିଥିଲେ । ଜୁନ୍ ୨୫ ପର୍ଯ୍ୟନ୍ତ ସେ ବାଂଲାଦେଶରେ ପରିନିତିଙ୍କ ଘରେ ରହିଥିଲେ । ପରିନିତି କହିଛନ୍ତି ଯେ ସୀମା ପାର ହେବା ପାଇଁ ସେ ରାଜୁ ମଣ୍ଡଳ ନାମକ ବାଂଲାଦେଶୀ ଦଲାଲକୁ ୧୦ ହଜାର ବାଂଲାଦେଶୀ ଟାକା ଦେଇଛନ୍ତି । ଆଉ ବିଏସଏଫର କମାଣ୍ଡିଂ ଅଧିକାରୀ ସଞ୍ଜୟ ପ୍ରସାଦ ସିଂ କହିଛନ୍ତି ଯେ ଅବୈଧ ଭାବେ ସୀମା ପାର ହୋଇ ଆସୁଥିବାବେଳେ ଉଭୟଙ୍କୁ ଗିରଫ କରାଯାଇଥିଲା । ଜୁନ୍‌ ୨୬ରେ ଗୁଇନ୍ଦା ସୂଚନା ମିଳିବା ପରେ ମାଧୁପର ସୀମାରେ ମୁତୟନ ୮୨ ବାଟାଲିୟନ ଯବାନମାନେ ଆଲର୍ଟ ହୋଇଯାଇଥିଲେ । ପୁଙ୍ଖାନୁପୁଙ୍ଖ ପଚରାଉଚରା ପରେ ପ୍ରେମ ସମ୍ପର୍କ ସାମ୍ନାକୁ ଆସିଥିଲା । ଅଧିକ ଆଇନଗତ କାର୍ଯ୍ୟାନୁଷ୍ଠାନ ପାଇଁ ବିଏସଏଫ ଉଭୟଙ୍କୁ ଭୀମପୁର ପୁଲିସ ଷ୍ଟେସନକୁ ହସ୍ତାନ୍ତର କରିଛି ।

Powered by Froala Editor