କଟକ : କଟକରେ ରବିବାର ବିଜେପି ରାଷ୍ଟ୍ରୀୟ ମୁଖପାତ୍ର ତଥା ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କ ‘ଆମ ପରିବାର’ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଭର୍ଚୁଆଲ ମୋଡରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଅପରାଜିତାଙ୍କ ଅନୁଗତ କୁହାଯାଉଥିବା ବିଜେପିର କିଛି ନେତା ଭାଗ ନେଇଛନ୍ତି । ଅନ୍ୟ କେତେଜଣ ବରିଷ୍ଠ ନେତା ଏହାକୁ ସାଂସଦଙ୍କ ବ୍ୟକ୍ତିଗତ କାର୍ଯ୍ୟକ୍ରମ କହି ଦୂରେଇ ଯାଇଛନ୍ତି । କାର୍ଯ୍ୟକ୍ରମରେ ବିଜେପି ନେତା ଓ କର୍ମୀମାନେ ଦୁଇଭାଗ ହୋଇଯାଇଥିବାରୁ ଏହା ଦଳର ଆଭ୍ୟନ୍ତରୀଣ କନ୍ଦଳକୁ ପଦାରେ ପକାଇଥିବା ନେଇ ଚର୍ଚ୍ଚା ଜୋର ଧରିଛି ।
ମିଳିଥିବା ସୂଚନା ଅନୁସାରେ, ଏହି ଭର୍ଚୁଆଲ ବୈଠକରେ ଜିଲ୍ଲାରୁ ୫ଟି ହ୍ୱାଟସଆପ ଗ୍ରୁପ୍ ମାଧ୍ୟମରେ ଅପରାଜିତାଙ୍କ ବହୁ ସମର୍ଥକଙ୍କୁ ଯୋଡ଼ି ହୋଇଥିଲେ । ଏହି ଗ୍ରୁପରେ ବରିଷ୍ଠ ବିଜେପି ନେତା ନୟନ ମହାନ୍ତି, ନଗର ବିଜେପି ସଭାପତି ଲଲାଟେନ୍ଦୁ ବଡୁଙ୍କ ସମେତ ଜିଲ୍ଲାର ଅନେକ ବରିଷ୍ଠ ନେତା ଓ ପଦାଧିକାରୀ ସଭ୍ୟ ଅଛନ୍ତି । ବୈଠକରେ କଟକ ଜିଲ୍ଲାରେ ‘ଆମ ପରିବାର’ର ସଙ୍ଗଠନ ସୁଦୃଢ଼ କରିବା ସହିତ ଜିଲ୍ଲାର ବିଭିନ୍ନ ସମସ୍ୟା ନେଇ ଅପରାଜିତା ଚର୍ଚ୍ଚା କରିଥିଲେ । ‘ଆମ ପରିବାର’ର ଆବାହକ ମନ୍ମଥ ମଲ୍ଲିକ୍, ନିକୁଞ୍ଜ ପଟ୍ଟନାୟକ, ଜୀବନ ସାହୁ, ରାଜ୍ୟ ସଂଯୋଜକ ନିଶିକାନ୍ତ ନାୟକଙ୍କ ସହିତ ସୀମନ୍ତିନୀ ଜେନା, ଦେବାଶିଷ ନାୟକ, ଅଶୋକ ପଟ୍ଟନାୟକ, ମୌସୁମୀ ମହାପାତ୍ର, ଅଜୟ ସ୍ୱାଇଁ, ସରୋଜ ରଣା, ରାଜକୁମାର ସ୍ୱାଇଁ, ଏସ.କେ ଜେନା, ନନ୍ଦିନୀ ଶତପଥୀ, ଶ୍ରୀମନ୍ତିନୀ ବେହେରା, ଡାକ୍ତର ହଳଧର ସାହୁ, ସମୀର ସାମଲ, ପ୍ରକାଶ ସେଠୀ, ପିୟୂଷ ରଞ୍ଜନ ପରିଡ଼ା, ଗୀତା ଦାସ, ବିକ୍ରମ ଦାସ, ବିବେକାନନ୍ଦ ନାୟକ, ଜଗଦାନନ୍ଦ ତ୍ରିପାଠୀ, ପ୍ରଦୀପ୍ତ ଜେନା, ପୂର୍ବତନ କର୍ପୋରେଟର ଚିତ୍ତ ଦାସ ପ୍ରମୁଖ ଯୋଗ ଦେଇଥିଲେ । ଶେଷରେ ବରିଷ୍ଠ ବିଜେପି ନେତା ରବି ମିଶ୍ର ଧନ୍ୟବାଦ ଅର୍ପଣ କରିଥିଲେ । ଅନ୍ୟପକ୍ଷରେ, ଦଳର ଅନେକ ବରିଷ୍ଠ ନେତା ଓ କାର୍ଯ୍ୟକର୍ତ୍ତା ଏହାକୁ ଅପରାଜିତାଙ୍କ ବ୍ୟକ୍ତିଗତ କାର୍ଯ୍ୟକ୍ରମ କହି ବୈଠକରେ ଯୋଗଦେଇ ନ ଥିଲେ । ଏ ସମ୍ପର୍କରେ ଦଳର ଜଣେ ବରିଷ୍ଠ ନେତା କହିଛନ୍ତି, ‘ହ୍ୱାଟ୍ସଆପ ଗ୍ରୁପରେ ସହର ତଥା ଜିଲ୍ଲାର ଅନେକ ବରିଷ୍ଠ ନେତା ଓ ସେମାନଙ୍କ ସମର୍ଥକ ନାହାନ୍ତି । ତେଣୁ, ଏହା ଦଳୀୟ କାର୍ଯ୍ୟକ୍ରମ ନୁହେଁ ।’ ସୂଚନାଯୋଗ୍ୟ, ଏହା ପୂର୍ବରୁ ଶ୍ରୀମତୀ ଷଡ଼ଙ୍ଗୀଙ୍କ ନେତୃତ୍ୱରେ ରାୟଗଡ଼ା, କୋରାପୁଟ୍, ଯାଜପୁର, ପୁରୀ, ମୟୂରଭଞ୍ଜ ଜିଲ୍ଲାରେ ‘ଆମ ପରିବାର’ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।

Powered by Froala Editor