ବସ୍କୁ ଧକ୍କା ଦେଲା ଟ୍ରକ୍, ୬ ମୃତ
ନୂଆଦିଲ୍ଲୀ: ଭୟଙ୍କର ଦୁର୍ଘଟଣା। ରାସ୍ତାକଡ଼ରେ ଠିଆ ହୋଇଥିବା ବସ୍କୁ ଦ୍ରୁତ ଗତିରେ ଆସି ଧକ୍କା ଦେଲା ଟ୍ରକ୍। ଫଳରେ ଘଟଣାସ୍ଥଳରେ ହିଁ ଆଖି ବୁଜିଲେ ୬ ଜଣ। ଉତ୍ତରପ୍ରଦେଶରେ ଘଟିଛି ଏଭଳି କିଛି ମର୍ମନ୍ତୁଦ ଦୁର୍ଘଟଣା।
ଉତ୍ତରପ୍ରଦେଶର ଗୋରଖପୁର-କୁଶିନଗର ଜାତୀୟ ରାଜପଥରେ ବିଳମ୍ବିତ ରାତିରେ ରାସ୍ତାକଡ଼ରେ ଠିଆ ହୋଇଥିବା ଦୁଇଟି ଯାତ୍ରୀବାହୀ ବସ୍କୁ ଧକ୍କା ଦେଇଛି ଟ୍ରକ୍। ଦୁର୍ଘଟଣାରେ ୬ ଜଣ ଯାତ୍ରୀଙ୍କ ମୃତ୍ୟୁ ହୋଇଥିବା ବେଳେ ୨୭ ଜଣ ଆହତ ହୋଇଛନ୍ତି। ସୂଚନା ମୁତାବକ ଗୋରଖପୁରରୁ ଏକ ବସ ଯାତ୍ରୀଙ୍କୁ ନେଇ ପଡରୋନା ଯାଉଥିଲା। ଏତିକି ବେଳେ ଜଗଦୀଶପୁରର ମଲ୍ଲପୁର ନିକଟରେ ବସର ଚକା ପଞ୍ଚର ହୋଇଯାଇଥିଲା। ଏହି ବସ୍ରେ ୩୦ରୁ ଅଧିକ ଯାତ୍ରୀ ଥିଲେ। ଡ୍ରାଇଭର ଏବଂ କଣ୍ଡକ୍ଟର ବସକୁ ରାସ୍ତା କଡ଼ରେ ରଖି ଅନ୍ୟ ଏକ ବସ୍କୁ ଡାକିଥିଲେ। ଗୋରଖପୁରରୁ ଏକ ଖାଲି ବସ ଆସି ଯାତ୍ରୀମାନଙ୍କୁ ନେଉଥିଲା। କଣ୍ଡକ୍ଟର କିଛି ଯାତ୍ରୀଙ୍କୁ ଅନ୍ୟ ବସ୍ରେ ବସାଉଥିଲେ। କିଛି ଲୋକ ଦୁଇଟି ବସ ମଧ୍ୟରେ ଛିଡା ହୋଇଥିବା ବେଳେ ଏହି ସମୟରେ ଦ୍ରୁତ ଗତିରେ ଆସି ଏକ ଟ୍ରକ ପଛପଟୁ ଦୁଇ ବସ୍କୁ ଧକ୍କା ଦେଇଥିଲା।
Powered by Froala Editor
