ଭୁବନେଶ୍ବର: ନୂଆପଡାରେ ଦେଖା ଦେଇଥିବା ବାଘ ଆତଙ୍କ ଏକ ପ୍ରକାର ଶେଷ ହୋଇଛି। ଜଣେ ମହିଳାଙ୍କୁ ମାରିବା ସହ ଜଣେ ଶିଶୁ ଏହି କଲରାପତରିଆ ବାଘ ଆକ୍ରମଣରେ ଆହତ ହେବା ପରେ ବନବିଭାଗ ସେହି ବାଘକୁ କାବୁ କରିବାରେ ସଫଳ ହୋଇଛି। ସଦର ରେଞ୍ଜ ଧରମବନ୍ଧା ସେକ୍ସନରେ ଏହି କଲରାପତରିଆ ବାଘ ଆତଙ୍କ ସୃଷ୍ଟି କରିଥିଲା।

ସୂଚନା ଅନୁଯାୟୀ, ନୂଆପଡ଼ା ସଦର ବ୍ଲକ ଧରମବନ୍ଧା ଥାନା ଅନ୍ତର୍ଗତ ସିଲିଆରି ବାହାରା ଗ୍ରାମର ତୁଳାରାମ ମାଝିଙ୍କ ପତ୍ନୀ ପୂର୍ବତନ ୱାର୍ଡମେମ୍ବର ରାମେଶ୍ୱରୀ ମାଝୀ(୪୫) ଶୌଚ ହେବାପାଇଁ ନିଜ ଘର ପଛପଟକୁ ଯାଇଥିଲେ। କିନ୍ତୁ ଅନେକ ସମୟ ପରେ ସେ ଘରକୁ ଫେରି ନଥିଲେ। ଫଳରେ ଘର ଲୋକେ ତାଙ୍କୁ ଖୋଜାଖୋଜି କରିଥିଲେ ସୁଦ୍ଧା ରାତିତମାମ ତାଙ୍କର ଖୋଜଖବର ମିଳି ନଥିଲା। ସକାଳୁ କିଛି ଲୋକ ଜଙ୍ଗଲ ଆଡକୁ ଯିବା ସମୟରେ ପ୍ରଥମେ ରାମେଶ୍ୱରୀଙ୍କ ମୁଣ୍ଡ ଗୋଟିଏ ସ୍ଥାନରେ ପଡ଼ିଥିବାର ଦେଖିବାକୁ ପାଇଥିଲେ। ଏହାସହ କିଛି ଦୂରରେ ଗୋଟିଏ କଲରାପତରିଆ ବାଘ ରାମେଶ୍ୱରୀଙ୍କ ମୃତଶରୀରକୁ ଧରି ଖାଉଥିବାର ଦେଖିବାକୁ ପାଇଥିଲେ। ଲୋକେ ବାଘକୁ ଘଉଡାଇବା ପାଇଁ ଚେଷ୍ଟା କରିବାରୁ ଲୋକଙ୍କ ଆଡକୁ ଝାମ୍ପି ଆସିଥିଲା। ଲୋକେ ଗ୍ରାମକୁ ଆସି ଖବର ଦେବାରେ ଗ୍ରାମବାସୀ ସଂଘବଦ୍ଧ ଭାବରେ ଠେଙ୍ଗାବାଡି ଧରି ଯିବାରେ ବାଘ ମୃତଶରୀର ଛାଡି ପଳାଇଥିଲା।

ତେବେସଦର ବ୍ଲକ ଧରମବନ୍ଧା ଥାନା ଅଞ୍ଚଳରେ ମଣିଷଖିଆ ବାଘ କବଳରୁ ଶନିବାର ଏକ ଶିଶୁ ଅଳ୍ପକେ ବର୍ତ୍ତି ଯାଇଛି।ଧରମବନ୍ଧା ଥାନା ଅନ୍ତର୍ଗତ କୋଦୋପାଲି ଗ୍ରାମର ରାମ ଧରୁଆଙ୍କ ୫ବର୍ଷର ପୁଅ ନୀଳକଣ୍ଠ ଗାଁ ଦାଣ୍ଡରେ ମା ପାଖରେ ବସି ଖେଳୁଥିଲା। ଏହି ସମୟରେ ଅତର୍କିତ ଭାବେ ବାଘ ନୀଳକଣ୍ଠକୁ ଟାଣି ନେଇ ଦୌଡି ପଳାଇଥିଲା। ଏହା ଦେଖି ତାଙ୍କ ମା’ ପାଟି କରିବାରୁ ଆଖପାଖ ପଡୋଶୀ ଠେଙ୍ଗାବାଡି ଧରି ବାଘକୁ ଦୌଡାଇଥିଲେ। ଜଣେ ଯୁବକ ଫୋଫାଡିିଥିବା ଠେଙ୍ଗା ବାଘ ଦେହରେ ବାଜିବା ପରେ ସେ ନୀଳକଣ୍ଠକୁ ଛାଡି ଦେଇ ପଳାଇ ଯାଇଥିଲା। ଶିଶୁଟି ଅନେକ ଆଘାତପ୍ରାପ୍ତ ହୋଇଛି। ଗ୍ରାମବାସୀ ତୁରନ୍ତ ତାକୁ ଜିଲା ମୁଖ୍ୟ ଚିକିତ୍ସାଳୟକୁ ଆଣିଥିଲେ।

Powered by Froala Editor