ପେମେଣ୍ଟ୍ ଲାଗି ଡଲାର ବଦଳରେ ଟଙ୍କାକୁ ବ୍ୟବହାର କରିବା ଆଲୋଚନା ଚାଲିଛି: ନିର୍ମଳା ସୀତାରମଣ
ନୂଆଦିଲ୍ଲୀ: ଦ୍ବିପାକ୍ଷିକ କାରବାରରେ ପେମେଣ୍ଟ୍ ଲାଗି ଡଲାର ବଦଳରେ ଟଙ୍କାକୁ ବ୍ୟବହାର କରିବା ପାଇଁ ୨୨ଟି ଦେଶ ସହ ଆଲୋଚନା ଚାଲିଛି ବୋଲି ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି। ସେ କହିଛନ୍ତି ଯେ ଯେଉଁ ଦେଶଗୁଡ଼ିକ ପାଖରେ କମ୍ ଡଲାର ରହିଛି ସେମାନେ ଆମ ପାଖରେ ପହଞ୍ଚିଛନ୍ତି। ଟଙ୍କା ଜରିଆରେ ନେଣଦେଣର କ’ଣ ସମ୍ଭାବନା ରହିଛି ତାହା ଜାଣିବାକୁ ସେମାନେ ପ୍ରୟାସ କରୁଛନ୍ତି। ଡଲାରର ପ୍ରଭାବ ଦୂର କରିବା ଲାଗି ଆନ୍ତର୍ଜାତିକ କାରବାରରେ ଟଙ୍କାକୁ ବ୍ୟବହାର କରିବା ପାଇଁ ଭାରତ ଉଦ୍ୟମ ଆରମ୍ଭ କରିଛି। ଏଥିପାଇଁ ବିଦେଶୀ ରାଷ୍ଟ୍ରଗୁଡ଼ିକୁ ଯେକୌଣସି ଭାରତୀୟ ବ୍ୟାଙ୍କରେ ଟଙ୍କା ଭଷ୍ଟ୍ରୋ ଖାତା ଖୋଲିବାକୁ ପଡ଼ୁଛି। ସେହି ଖାତା ଜରିଆରେ କାରବାର ହେଉଛି।
ବିଦେଶୀ ରାଷ୍ଟ୍ରର ବ୍ୟାଙ୍କ ଓ ଭାରତୀୟ ବ୍ୟାଙ୍କ ମଧ୍ୟରେ କାରବାର ସମ୍ପାଦିତ ହେଉଛି। ଏଭଳି ୨୨ଟି ଦେଶ ସହ ଟଙ୍କାରେ କାରବାର କରିବା ଲାଗି ପ୍ରୟାସ ଜାରି ରହିଛି। ଭାରତୀୟ ରିଜର୍ଭ ବ୍ୟାଙ୍କ ପକ୍ଷରୁ ୧୮ଟି ଦେଶର ବ୍ୟାଙ୍କକୁ ଭାରତୀୟ ବ୍ୟାଙ୍କରେ ଟଙ୍କା ଭଷ୍ଟ୍ରୋ ଖାତା ଖୋଲିବାକୁ ଅନୁମତି ଦିଆଯାଇଛି। ବ୍ରିକ୍ସ ରାଷ୍ଟ୍ରଗୁଡ଼ିକଠାରୁ ମଧ୍ୟ ଟଙ୍କାରେ ଦ୍ବିପାକ୍ଷିକ କାରବାର ନେଇ ସକାରାତ୍ମକ ପ୍ରତିକ୍ରିୟା ମିଳିଛି। ଜାତୀୟ ମୁଦ୍ରା ଆଦାନପ୍ରଦାନ ଜରିଆରେ କିଭଳି କାରବାର ହୋଇପାରିବ ସେବିଷୟରେ ବହୁ ଦିନରୁ ବ୍ରିକ୍ସ ସମୂହ ଅଧୀନରେ ଥିବା ଦେଶଗୁଡ଼ିକୁ ବିଚାର କରୁଛନ୍ତି ବୋଲି କିଛି ଦିନ ପୂର୍ବେ ବୈଦେଶିକ ସଚିବ ବିନୟ କ୍ବାତ୍ରା କହିଥିଲେ।
Powered by Froala Editor
