ଭାରତ ଓ ସାଉଦି ଆରବ ମଧ୍ୟରେ ଆହୁରି ମଜଭୁତ ହେବ ଦ୍ୱିପାକ୍ଷିକ ସମ୍ପର୍କ, ୫୦ରୁ ଅଧିକ ରାଜିନାମା ସ୍ୱାକ୍ଷରିତ
![ଭାରତ ଓ ସାଉଦି ଆରବ ମଧ୍ୟରେ ଆହୁରି ମଜଭୁତ ହେବ ଦ୍ୱିପାକ୍ଷିକ ସମ୍ପର୍କ, ୫୦ରୁ ଅଧିକ ରାଜିନାମା ସ୍ୱାକ୍ଷରିତ](https://odishanewslens.com/news_gallery/24313_1694499455.jpg)
ଭୁବନେଶ୍ୱର : ଜି-୨୦ ଶିଖର ସମ୍ମିଳନୀ ରବିବାର ଶେଷ ହେବା ପରେ ସୋମବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ସାଉଦି ଆରବର କ୍ରାଉନ ପ୍ରିନ୍ସ ମହମ୍ମଦ ବିନ୍ ସଲ୍ମାନ ଅଲ୍ ସୌଦ ଦ୍ୱିପାକ୍ଷିକ ବୈଠକ କରିଛନ୍ତି । ହାଇଦ୍ରାବାଦ ହାଉସ୍ରେ ଅନୁଷ୍ଠିତ ଏହି ବୈଠକରେ ସୁରକ୍ଷା, ସାମାଜିକ ଓ ସାଂସ୍କୃତିକ ସହଯୋଗ, ଆଇଟି ଓ କନେକ୍ଟିଭିଟି ଭଳି ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଆଲୋଚନା ହୋଇଥିଲା । ସେହିଭଳି ଆଜି ଭାରତ ଓ ସାଉଦି ଆରବ ମଧ୍ୟରେ ପ୍ରାୟ ୫୦ରୁ ଊଦ୍ଧ୍ୱର୍ ରାଜିନାମା ସ୍ୱାକ୍ଷରିତ ହୋଇଛି । ଦ୍ୱିପାକ୍ଷିକ ବୈଠକ ପରେ ପ୍ରଧାନମନ୍ତ୍ରୀ ମୋଦି କହିଥିଲେ, ଭାରତ ଓ ସାଉଦି ମଧ୍ୟରେ ଦ୍ୱିପାକ୍ଷିକ ସମ୍ପର୍କ ଆହୁରି ମଜଭୁତ ହେବାକୁ ଯାଉଛି । ସାଉଦି ଆମର ପ୍ରମୁଖ ସାମରିକ ସହଯୋଗୀ । ଦ୍ୱିପାକ୍ଷିକ ଆଲୋଚନା ପରେ ଯୁଗ୍ମ ସାମ୍ବାଦିକ ସମ୍ମିଳନୀରେ ପ୍ରଧାନମନ୍ତ୍ରୀ କହିଛନ୍ତି, ବିଶ୍ୱର ଦୁଇଟି ବଡ଼ ଅର୍ଥ ବ୍ୟବସ୍ଥା ହୋଇଥିବା ଦୃଷ୍ଟିରୁ ଆମର ଆପୋସ ମାନବୀୟ ଓ ଆଞ୍ଚଳିକ ସ୍ଥିରତା ନିହାତି ଅପରିହାର୍ୟ୍ୟ ।
ସାଉଦି କ୍ରାଉନ ପ୍ରିନ୍ସ କହିଛନ୍ତି ଯେ ଭାରତ ସହ ଆମର ସବୁବେଳେ ସୁସମ୍ପର୍କ ରହିଆସିଛି । କଦାପି ବିବାଦ ଉପୁଜି ନାହିଁ । ସାଉଦି ଆରବର ଆର୍ଥିକ ବିକାଶରେ ଭାରତର ଲୋକଙ୍କର ମହତ୍ତ୍ୱପୂର୍ଣ୍ଣ ଭୂମିକା ରହିଛି । ଦୁଇଦେଶ ମଧ୍ୟରେ ୨୦୨୨-୨୩ରେ ୫,୨୭୫ କୋଟି ଡଲାର ବାଣିଜ୍ୟ କାରବାର ହୋଇଥିଲା । ସେହିଭଳି ଜି-୨୦ ସମ୍ମିଳନୀରେ ଯୋଗଦେବା ପାଇଁ ଭାରତ ଆସିଥିବାରୁ ସେ ସନ୍ତୋଷ ବ୍ୟକ୍ତ କରିଥିଲେ । ମହମ୍ମଦ ବିନ୍ ସଲ୍ମାନ ୧୦୦ ବ୍ୟବସାୟୀ ଓ ୭ ମନ୍ତ୍ରୀଙ୍କ ସହ ପୂର୍ଣ୍ଣ ପ୍ରସ୍ତୁତିରେ ଭାରତ ଗସ୍ତ କରିଥିଲେ ।
Powered by Froala Editor