ନୂଆଦିଲ୍ଲୀ: ଦକ୍ଷିଣ ଆଫ୍ରିକା ଦେଶ ମରୋକ୍କୋରେ ହୋଇଥିବା ଭୂମିକମ୍ପରେ ମୃତ୍ୟୁ ସଂଖ୍ୟା ବୃଦ୍ଧି ପାଇଛି । ବର୍ତ୍ତମାନ ସୁଦ୍ଧା ୨ହଜାରରୁ ଅଧିକ ଲୋକ ପ୍ରାଣ ହରାଇଥିବା ସୂଚନା ମିଳିଛି । ଅନେକ ଲୋକ ଧ୍ବଂସାବଶେଷ ତଳେ ଚାପି ରହିଥିବାରୁ ମୃତ୍ୟୁ ସଂଖ୍ୟା ବଢିପାରେ ବୋଲି ଆଶଙ୍କା କରାଯାଉଛି । ସେହିପରି ଆହତଙ୍କ ସଂଖ୍ୟା ୧୨ଶହ ପାର୍ କରିଛି । ଆହତଙ୍କ ମଧ୍ୟରେ ଅନେକଙ୍କ ଅବସ୍ଥା ସଂକଟାପନ୍ନ ରହିଛି ।       
ମରକ୍କୋ ଜିଓଲୋଜିକାଲ ସେଣ୍ଟର ଭୂକମ୍ପର ତୀବ୍ରତା ରିକ୍ଟର ସ୍କେଲରେ ୭.୨ ଦର୍ଶାଇଛି । ଏହାର କେନ୍ଦ୍ରସ୍ଥଳ ଆଟଲାସ ପର୍ବତ ନିକଟବର୍ତ୍ତୀ ଇଘିଲ ନାମକ ଏକ ଗ୍ରାମ ଦର୍ଶାଯାଇଛି, ଯାହା କି ମାରାକେଶ ସହରଠାରୁ ୭୧ କିଲୋମିଟର ଦୂରରେ ଅବସ୍ଥିତ । ଭୂପୃଷ୍ଠରୁ ୧୮.୫ କିଲୋମିଟର ଗଭୀରତାରେ ଏହା ଅନୁଭୂତ ହୋଇଥିଲା । ଏହାର ପ୍ରଭାବ ପର୍ତ୍ତୁଗାଲ ଓ ଆଲଜେରିଆରେ ବି ଅନୁଭୂତ ହୋଇଛି । ଶୁକ୍ରବାର ବିଳମ୍ବିତ ରାତିରେ ଆସିଥିବା ଏହି ଭୟଙ୍କର ଭୂକମ୍ପ ଯୋଗୁ ଅନେକ କୋଠା ତାସ୍‌ଘର ଭଳି ଗଳିପଡ଼ିଥିଲା । ଚାହୁଁ ଚାହୁଁ ଚାରିଆଡ଼ ଧୂଳିମୟ ହୋଇଯାଇଥିଲା । ତେବେ ଏହି ଭୂକମ୍ପର ତୀବ୍ରତା ୬.୮ ଥିବା ନେଇ ଆମେରିକାର ଜିଓଲୋଜିକାଲ ସର୍ଭେ ପକ୍ଷରୁ କୁହାଯାଇଛି । ସେପଟେ ଭୂମିକମ୍ପରେ ପ୍ରାଣ ହରାଇଥିବା ଲୋକଙ୍କୁ ପ୍ୟାରିସ୍‌ର ଏଫିଲ୍ ଟାଓ୍ବାରର ଲାଇଟ୍ ବନ୍ଦ କରି ଟ୍ରିବ୍ୟୁଟ୍ ଦିଆଯାଇଛି ।

Powered by Froala Editor