ଭୁବନେଶ୍ୱର : ଅନାସ୍ଥା ପ୍ରସ୍ତାବ ନେଇ ଆଜିଠାରୁ ଲୋକସଭାରେ ବିତର୍କ ଆରମ୍ଭ ହେବ  । ଦିନ ୧୨ଟାରୁ ଅନାସ୍ଥା ପ୍ରସ୍ତାବ ସଂକ୍ରାନ୍ତରେ ଆଲୋଚନା ହେବାକୁ ସମୟ ଧାର୍ଯ୍ୟ ହୋଇଛି  । ବିରୋଧୀ ଦଳ ଏକାଠି ହୋଇ ମୋଦି ସରକାରଙ୍କୁ ଘେରୁଛନ୍ତି  । ଫଳରେ ବିଭିନ୍ନ ପ୍ରସଙ୍ଗ ନେଇ ଶାସକ ଓ ବିରୋଧୀଙ୍କ ମଧ୍ୟରେ କଥା କଟାକଟି ଦେଖିବାକୁ ମିଳିବ  । ଗାଏମୋଟ କହିଲେ ଅନାସ୍ଥା ପ୍ରସ୍ତାବ ସମୟରେ ସଂସଦରେ ସରଗରମ ଆଲୋଚନା ହେବ  ।

ଅପରପକ୍ଷରେ କଂଗ୍ରେସ ନେତା ରାହୁଲ ଗାନ୍ଧୀ ସଦସ୍ୟ ପଦ ଫେରି ପାଇଛନ୍ତି  । ଫଳରେ ସେ ହିଁ କଂଗ୍ରେସ ପକ୍ଷରୁ ଅଧିକ ସମୟ ଆଲୋଚନାରେ ଭାଗ ନେବେ  । ମଣିପୁର ପ୍ରସଙ୍ଗ ଠାରୁ ନେଇ ଦରଦାମ ବୃଦ୍ଧି ପର୍ଯ୍ୟନ୍ତ, ତମାମ ପ୍ରସଙ୍ଗରେ ସଂସଦ କମ୍ପି ଉଠିବ  । ବିରୋଧୀଙ୍କୁ କାଉଂଟର କରିବା ପାଇଁ ବିଜେପି ବି ପ୍ରସ୍ତୁତ ଅଛି  । ବିଜେପିର ବହୁ ଭଲ ବକ୍ତା ଥିବାବେଳେ ସେମାନେ ବି ବିରୋଧୀଙ୍କୁ ଜୋରଦାର ଜବାବ ଦେବେବୋଲି ଆଶା କରାଯାଉଛି  ।

ସୂଚନାଯୋଗ୍ୟଯେ, ସାଧାରଣ ନିର୍ବାଚନ ପୂର୍ବରୁ ମୋଦି ସରକାରଙ୍କ ବିରୋଧରେ କଂଗ୍ରେସ ଅନାସ୍ଥା ପ୍ରସ୍ତାବ ଆଣିଛି  । ତେବେ ଉଭୟ ଲୋକସଭା ଓ ରାଜ୍ୟସଭାରେ ଏନଡ଼ିଏର ପଲା ଭାରି ରହିଥିବାରୁ ସରକାରଙ୍କର ପତନ ଘଟିବ ନାହିଁ  । କିନ୍ତୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ବିରୋଧୀଙ୍କୁ କହିବାର ସୁଯୋଗ ମିଳିବ ବୋଲି କୁହାଯାଇପାରିବ  । ସେହିପରି ୩ ଦିନ ଧରି ଚର୍ଚ୍ଚା ଚାଲିବାର ଥିବାବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଉତର ରଖିବେ  ।

Powered by Froala Editor