ଭିନ୍ନ ଭିନ୍ନ ନାଁରେ ଦେବାଦେବୀ ହିଁ ପୂଜା ପାଆନ୍ତି । କେଉଁ ମନ୍ଦିରରେ ଭଗବାନ ବିଷ୍ଣୁପୂଜା ପାଉଛନ୍ତି ତ ଆଉ କେଉଁଠି ଭଗବାନ ଶିବ ।  ସବୁ ମନ୍ଦିରରେ ଆମେ ଭକ୍ତି ନୈବେଦ୍ୟ ସ୍ୱୟଂ ଈଶ୍ୱରଙ୍କ ଆଗରେ ହିଁ ସମର୍ପଣ କରିଥାଉ । କିନ୍ତୁ ଆମେ ଯଦି କହିବୁ ଭାରତରେ ଏପରି ମନ୍ଦିର ଅଛି ଯେଉଁଠି ଈଶ୍ୱର ନୁହଁନ୍ତି, ବରଂ ଏମିତି ଜଣଙ୍କୁ ଆରଧନା କରାଯାଏ ଯାହାଙ୍କୁ କେହି କେବେ ଭକ୍ତି ଦୂରର କଥା, ଶ୍ରଦ୍ଧା ବି କରନ୍ତି ନାହିଁ । ସେ କିଏ ଜାଣନ୍ତି? ସେ ହେଉଛନ୍ତି ମହାଭାରତର ମୁଖ୍ୟ ଖଳନାୟକ ଦୁର୍ଯ୍ୟୋଧନ, ଯାହାଙ୍କ ପାଇଁ ପାଣ୍ଡବମାନଙ୍କ ଜୀବନର ଅନେକ ବର୍ଷ ବନବାସରେ ବିତିଥିଲା । ଯାହାଙ୍କ ପାଇଁ ମହାଭାରତ ଯୁଦ୍ଧ ହୋଇଥିଲା ଭାଇ ଭାଇ ଯେ ଚିର ଶତ୍ରୁ ହୋଇପାରନ୍ତି ଦୁର୍ଯ୍ୟୋଧନ ହିଁ ସବୁଠୁ ବଡ ଉଦାହରଣ । ପୁରାଣ ବର୍ଣ୍ଣିତ ଏମିତି ଜଣେ ଚରିତ୍ର ପୁଣି କେଉଁ ମନ୍ଦିରରେ ପୂଜା ପାଆନ୍ତି ତାହା ହୁଏ ବିଶ୍ୱାସଯୋଗ୍ୟ ହୋଇନପାରେ । ତେବେ ଏମିତି ଏକ ମନ୍ଦିର ଅଛି କେରଳରେ । ଏହି ମନ୍ଦିରର ନାଁ ମାଲାନଦ । ଏହି ମନ୍ଦିରକୁ ପେରୁଭିରୁଥି ମାଲାନଦ ମନ୍ଦିର ବୋଲି ମଧ୍ୟ କୁହାଯାଏ । ମନ୍ଦିରଟି କେରଳର କୋଲାମ ଜିଲ୍ଲାର ପୋରୁଭାଜି ଗ୍ରାମରେ ଅବସ୍ଥିତ । ପ୍ରତିବର୍ଷ ଏହି ମନ୍ଦିରରେ ଏକ ଉତ୍ସବ ବେଶ୍ ଜାକଜମକରେ ଆୟୋଜିତ ହୋଇଥାଏ । ଏହି ଉତ୍ସବର ନାଁ ମାଲାକୁଦ୍ଦା । 

କିମ୍ବଦନ୍ତୀ ଅନୁସାରେ ଦୁର୍ଯ୍ୟୋଧନ ପାଣ୍ଡବଙ୍କ ପିଛା କରି ଥକି ଯିବା ପରେ ଏହି ସ୍ଥାନରେ ଅଟକି ଯାଇଥିଲେ । ସେତେବେଳକୁ ତୃଷ୍ଣାରେ ତାଙ୍କ ତଣ୍ଟି ଶୁଖିଯାଇଥିଲା । କ୍ଷୁଧାର ଜ୍ୱାଳା ତାଙ୍କୁ ଆଗକୁ ପାଦ ପକାଇବାକୁ ଦେଉନଥାଏ । ସେହି ସମୟରେ କୁରୁୱା ଜନଜାତିର ଜଣେ ବୃଦ୍ଧ ତାଙ୍କ କ୍ଷୁଧା, ତୃଷ୍ଣା ନିବାରଣ କରିଥିଲେ । ତାଙ୍କୁ ସେହି ସମୟରେ ଆଶ୍ରୟ ମଧ଼୍ୟ ଦେଇଥିଲେ । ବୃଦ୍ଧଙ୍କର ଆତିଥେୟରେ ମୁଗ୍ଧ ହୋଇଥିଲେ ଦୁର୍ଯ୍ୟୋଧନ । ଜଣେ ନୀଚ ଜାତିର ହୋଇଥିବା ଜାଣି ମଧ୍ୟ ଦୁର୍ଯ୍ୟୋଧନ ସେହି ବୃଦ୍ଧଙ୍କ ମହାନୀୟତା ଆଗରେ ମୁଣ୍ଡ ନୁଆଁଇଥିଲେ ଏବଂ ତାଙ୍କୁ ଆଲିଙ୍ଗନ ମଧ୍ୟ କରିଥିଲେ । 

ସେହି ସ୍ଥାନରୁ ବିଦାୟ ନେବା ବେଳେ ଦୁର୍ଯ୍ୟୋଧନ ଉକ୍ତ ବୃଦ୍ଧଙ୍କୁ କହିଥିଲେ କୁରୁକ୍ଷେତ୍ର ଯୁଦ୍ଧର ସମାପ୍ତି ପରେ ସେ ନିଶ୍ଚିତ ଭାବେ ଏହି ଜାଗାକୁ ଫେରିବେ ଏବଂ ବୃଦ୍ଧଙ୍କୁ ଦେଖା କରିବେ । କିନ୍ତୁ ଯୁଦ୍ଧର ଅନ୍ତିମ ପରିଣତି ହୋଇଥିଲା ଭିନ୍ନ । ଦୁର୍ଯ୍ୟୋଧନ କୁରୁକ୍ଷେତ୍ର ଯୁଦ୍ଧରେ ପ୍ରାଣ ହରାଇଥିଲେ । ଦୁର୍ଯ୍ୟୋଧନ ସେହି ବୃଦ୍ଧ ବ୍ୟକ୍ତିଙ୍କୁ ଦେଇଥିବା କଥା ସିନା ରଖିପାରି ନଥିଲେ । କିନ୍ତୁ ପରବତ୍ତୀ ସମୟରେ ବୃଦ୍ଧଜଣଙ୍କୁ କୁଆଡେ ସ୍ୱପ୍ନରେ ଦେଖା ଦେଇଥିଲେ । ବୃଦ୍ଧ ବ୍ୟକ୍ତି ଦୁର୍ଯ୍ୟୋଧନଙ୍କୁ ସ୍ୱପ୍ନରେ ଦେଖି ତାଙ୍କୁ ସାକ୍ଷାତ ଈଶ୍ୱର ବୋଲି ବିଶ୍ୱାସ କରିଥିଲେ । ଦୁର୍ଯ୍ୟୋଧନଙ୍କ ଉଦ୍ଦେଶ୍ୟରେ ନିକଟସ୍ଥ ଏକ ବରଗଛ ମୂଳରେ ତପସ୍ୟା ଆରମ୍ଭ କରିଥିଲେ । ସେହି ସ୍ଥାନରେ ହିଁ ଏକ ମନ୍ଦିର ତିଆରି କରି ଦୁର୍ଯ୍ୟୋଧନଙ୍କୁ ପୂଜା କରିବାକୁ ଲାଗିଲେ । ତେବେ ବୃଦ୍ଧ ମନ୍ଦିର ତିଆରି କଲାବେଳେ ଦୁର୍ଯ୍ୟୋଧନଙ୍କ ଚେହେରା କିପରି ତାହା ଠଉରାଇ ପାରିନଥିଲେ । ତେଣୁ ମନ୍ଦିରରେ କାହାର ବିଗ୍ରହ ପ୍ରତିଷ୍ଠା କରିନଥିଲେ । 

ବିଶ୍ୱାସ କରାଯାଏ ସେହି ମନ୍ଦିରରେ ତେଣୁ କୌଣସି ମୂତ୍ତି ପୂଜା ପାଆନ୍ତି ନାହିଁ । କେବଳ ଦୁର୍ଯ୍ୟୋଦନଙ୍କ ଉଦ୍ଦେଶ୍ୟରେ ହିଁ ଏହି ମନ୍ଦିର ସ୍ଥାପନା ହେଇଥିଲା । ପୂଜା ମଧ୍ୟ ତାଙ୍କରି ଉଦ୍ଦେଶ୍ୟରେ କରାଯାଏ । ଆଜି ବି ଏହି ମନ୍ଦିରର ପୂଜକ ହେଉଛନ୍ତି କୁରୁୱା ଜନଜାତିର ଲୋକ । କୁରୁୱା ଜନଜାତି ବ୍ୟତୀତ ଏହି ମନ୍ଦିରରେ ଆଉ କୌଣସି ସଂପ୍ରଦାୟର ଲୋକ ପୂଜା କରନ୍ତି ନାହିଁ । ଯଦିଓ ଅନ୍ୟମାନେ ମନ୍ଦିରକୁ ଯାଇପାରନ୍ତି । ତେବେ ପୂଜା କରିବାର ଅଧିକାର ରହିଛି କେବଳ କୁରୁୱା ଜନଜାତିର ଳୋକଙ୍କ ପାଖରେ । 

ଭାବୁଛନ୍ତି କି, ଏଭଳି ମନ୍ଦିର କେବଳ କେରଳରେ ଅବସ୍ଥିତ । ଭାରତର ଅନ୍ୟ କୌଣସି ସ୍ଥାନରେ ଏଭଳି ଅଜବ ମନ୍ଦିର ନଥିବ । କିନ୍ତୁ ନା, ଗଡୱାଲ୍ ରେ ମଧ୍ୟ ଏମିତି ଏକ ମନ୍ଦିର ଅଛି ଯେଉଁଠାରେ ଦୁର୍ଯ୍ୟୋଧନଙ୍କୁ ପୂଜା କରାଯାଏ । 

Powered by Froala Editor