ଭାରତୀୟ କୁସ୍ତି ମହାସଂଘର ଅଧ୍ୟକ୍ଷ ବ୍ରିଜଭୂଷଣ ଶରଣ ସିଂ ତାଙ୍କ ଉପରେ ଲାଗିଥିବା ଯୌନ ଶୋଷଣ ଅଭିଯୋଗୁକୁ ଖୋଲାଖୋଲି ଖଣ୍ଡନ କରିଛନ୍ତି। ସେ କହିଛନ୍ତି ‘ମୁଁ ସମ୍ପୂର୍ଣ୍ଣ ରୂପେ ନିର୍ଦ୍ଦୋଷ, ତେଣୁ ଅପରାଧୀ ହିସାବରେ ଇସ୍ତଫା ଦେବାର ପ୍ରଶ୍ନ ଉଠୁନି। ମୋର କାହା ବିରୋଧରେ କିଛି ଅଭିଯୋଗ ନାହିଁ। ମୁଁ ଯେକୌଣସି ଯାଞ୍ଚର ସମ୍ମୁଖୀନ ହେବାକୁ ପ୍ରସ୍ତୁତ । ନ୍ୟାୟ ବ୍ୟବସ୍ଥା ଉପରେ ଭରସା ଅଛି ଓ ନ୍ୟାୟ ପାଇବି ବୋଲି ଆଶା ରଖିଛି। ’ ଦିଲ୍ଲୀ ପୁଲିସ୍‌ ଗତ ରାତିରେ ଭାରତୀୟ କୁସ୍ତି ମହାସଂଘ ସଭାପତି ବ୍ରିଜ ଭୂଷଣ ଶରଣ ସିଂଙ୍କ ବିରୋଧରେ ୨ଟି ଯୌନ ଉତ୍ପୀଡ଼ନ ମାମଲା ରୁଜୁ କରିଥିବା ବେଳେ ଆଜି ସଫେଇରେ ସେ ଏପରି କହିଛନ୍ତି।

ସୂଚନାଯୋଗ୍ୟ,ବ୍ରିଜ ଭୂଷଣଙ୍କ ଉପରେ କେତେଜଣ ଯୁବତି ଯୌନ ଶୋଷଣ ଅଭିଯୋଗ ଆଣିଥିବା ବେଳେ ସେମାନଙ୍କ ମଧ୍ୟରେ ଜଣେ ନାବାଳିକା ରହିଛନ୍ତି। ବ୍ରିଜଭୂଷଣ ମିଡିଆକୁ କହିଛନ୍ତି, ମୋ ଉପରେ ଯେଉଁ ଅଭିଯୋଗ ଆସିଛି ସେଥିରେ ଜଣେ ନାବାଳିକା ବି ରହିଛନ୍ତି। ଏବେ ମୋର ପ୍ରଶ୍ନ ଯେ ସେହି ନାବାଳିକାଙ୍କୁ ଯାଞ୍ଚ କମିଟି ସାମ୍ନାରେ କାହିଁକି ହାଜର କରାଯାଉନାହିଁ। 

ଏଥିସହ ସେ କହିଛନ୍ତି, ଯେଉଁମାନେ ଧାରଣାରେ ବସିଛନ୍ତି ସେମାନଙ୍କ ଦାବି ସବୁବେଳେ ବଦଳିବାରେ ଲାଗିଛି। ପ୍ରଥମେ ସେମାନେ ମୋର ଇସ୍ତଫା ଦାବି କଲେ। ହେଲେ ଇସ୍ତଫା ଦେବା ଅର୍ଥ ନିଜ ଦୋଷ ସ୍ୱୀକାର କରିବା ଭାବି ମୁଁ ଇସ୍ତଫା ଦେବାକୁ ମନା କଲି । ଏହାପରେ ୪ ମାସ ପର୍ଯ୍ୟନ୍ତ ସେମାନେ ମୋ’ ବିରୋଧରେ ବହୁ ଲୋକଙ୍କୁ ଉସୁକାଇଲେ ଓ ନୂଆ ନୂଆ ଲୋକଙ୍କୁ ନିଜ ସପକ୍ଷରେ ଛିଡ଼ା କରାଇଲେ । ଏବେ ସେମାନେ ମୋ’ ଗିରଫଦାରୀ ଦାବି କରୁଛନ୍ତି ବୋଲି କହିଛନ୍ତି ବ୍ରିଜ ଭୂଷଣ ଶରଣ ସିଂ । ମୁଁ ଏଯାଏ ଏଫଆଇଆର କପି ପାଇନାହିଁ। କପି ପାଇବା ପରେ ପରବର୍ତ୍ତୀ କାର୍ଯ୍ୟପନ୍ଥା ସ୍ଥିର କରାଯିବ ବୋଲି ସେ କହିଛନ୍ତି ।

Powered by Froala Editor