ସ୍କୁଲ ନଯିବାକୁ ଜିଦ୍‌ କରିଥିଲେ ପୁଅ । ବାପା ଆକାଟ କରିବାରୁ ପୁଅ ନିଜ ଦେହରେ ନିଆଁ ଲଗାଇ ଆତ୍ମହତ୍ୟା ଉଦ୍ୟମ କରିଥିଲେ । ଯାହାଫଳରେ ତାଙ୍କୁ ଗୁରୁତର ଭାବେ ପ୍ରଥମେ ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଥିଲା । ପରେ ଅବସ୍ଥା ଗୁରୁତର କଟକ ବଡ଼ ମେଡିକାଲକୁ ସ୍ଥାନାନ୍ତରିତ କରାଯାଇଛି । ଯାଜପୁର ଜିଲ୍ଲା ଟମକା ଥାନା ସମରପିଟା ଗାଁରୁ ଆସିଛି ଏପରି ଏକ ଘଟଣା ।

ଟମକା ଥାନା ସମର ପିଟା ଗାଁର ପ୍ରଦୀପ ମହାରଣାଙ୍କ ୧୨ ବର୍ଷର ନାବାଳକ ପୁଅ ଗୋବିନ୍ଦ, ଡାହାଣୀ ଗାଡ଼ିଆ ଅରବିନ୍ଦ ପୂର୍ଣ୍ଣାଙ୍ଗ ଶିକ୍ଷା କେନ୍ଦ୍ରରେ ସପ୍ତମ ଶ୍ରେଣୀରେ ପାଠ ପଢ଼ୁଥିଲେ। ସେ ସେଠାରେ ଥିବା ହଷ୍ଟେଲ୍‌ରେ ରହୁଥିଲେ। ତେବେ ଦଶହରା ଛୁଟିରେ ସେ ଘରକୁ ଆସିଥିଲେ। ଆଜି ସ୍କୁଲ ଖୋଲିଥିଲା। ସେଥିପାଇଁ ସ୍କୁଲ ଯିବାକୁ ଗୋବିନ୍ଦଙ୍କୁ ତାଙ୍କ ବାପା-ମାଆ କହିଥିଲେ। ହେଲେ ଆଜି ସ୍କୁଲ ଯିବ ନାହିଁ ବୋଲି ଗୋବନ୍ଦ କହିଥିଲେ। ଗଜଲକ୍ଷ୍ମୀ ପୂଜା ଦେଖିଲା ପରେ ସ୍କୁଲ ଯିବି ବୋଲି କହିଥିଲେ। ସନ୍ଧ୍ୟା ବେଳେ ଠାକୁର ଦେଖି ହଷ୍ଟେଲ୍‌ରେ ଛାଡ଼ିବାକୁ ଗୋବିନ୍ଦଙ୍କୁ କହିଥିଲେ ତାଙ୍କ ବାପା। ଏଥିରେ ଗୋବିନ୍ଦ ରାଜି ହୋଇଥିଲେ। ମାଆ ଗୀତାଞ୍ଜଳି ପୁଅର ବହି ବସ୍ତାନି ସଜାଡ଼ି ପୋଖରୀକୁ ଲୁଗା ଧୋଇବା ପାଇଁ ଯାଇଥିଲେ। ଆଉ ତା’ ବାପା କାମ କରିବା ପାଇଁ ଯାଇଥିଲେ। ହଠାତ ଘରେ ନିଆଁ ଜଳୁଥିବା ଦେଖିବାକୁ ମିଳିଥିଲା। ପୋଖରୀ ଆଡିରୁ ଧାଇଁ ଯାଇଥିଲେ ତାଙ୍କ ମାଆ। ଗୋବିନ୍ଦ ନିଆଁରେ ଛଟପଟ ହେଉଥିବା ଦେଖି ମା’ ପାଖ ଲୋକଙ୍କୁ ଡାକ ପକାଇଥିଲେ । ପରେ ଆମ୍ୱୁଲାନ୍ସରେ ତାକୁ ଗୁରୁତର ଅବସ୍ଥାରେ ଦାନଗଦି ମେଡ଼ିକାଲରେ ଭର୍ତ୍ତି କରିଥିଲେ।

Powered by Froala Editor