ଅଯୋଧ୍ୟା ରାମ ମନ୍ଦିରରୁ ଦାନ ଅର୍ଥ ଚୋରି ମାମଲାକୁ ପୂର୍ବତନ କେନ୍ଦ୍ର ଗୃହ ସଚିବ ଏସ୍ ଲକ୍ଷ୍ମୀନାରାୟଣନ ସଙ୍ଗିନ ଅଭିଯୋଗ ଆଣିଛନ୍ତି । ମନ୍ଦିରରୁ ୫ କୋଟି ଟଙ୍କାର ସୁନାଖଚିତ ରାମଚରିତ ମାନସକୁ ବି ଚୋରାଇ ନିଆଯାଇଛି । ଲକ୍ଷ୍ମୀନାରାୟଣନ କହିଛନ୍ତି ଯେ ସେ ୨୦୨୪ ଏପ୍ରିଲ ୮ରେ ରାମ ମନ୍ଦିର ଟ୍ରଷ୍ଟକୁ ୧୫୧ କିଲୋ ଓଜନର ରାମଚରିତ ମାନସ ପ୍ରଦାନ କରିଥିଲେ ।  ରାମଚରିତ ମାନସର ୧୦୦୦ ପୃଷ୍ଠାରେ ୨୪ କ୍ୟାରେଟ ସୁନା ଆସ୍ତରଣ ଚଢ଼ାଯାଇଥିଲା । କିନ୍ତୁ ଆଜି ପର୍ଯ୍ୟନ୍ତ ତାହାର ରସିଦ ତାଙ୍କୁ ଦିଆଯାଇ ନାହିଁ । ୩-୪ ମାସ ପରେ ଏହା ମନ୍ଦିରରୁ ଗାଏବ ହୋଇଯାଇଥିଲା ।

ଏସ୍‌ଆଇଟି ଅଧିକାରୀମାନେ ଶନିବାର ରାମ ମନ୍ଦିରରେ ପହଞ୍ଚି ପୂଜାର୍ଚ୍ଚନା କରିଥିଲେ । ଏହାପରେ ମନ୍ଦିର ଦାୟିତ୍ୱରେ ଥିବା କେ ଡି ବାବୁଙ୍କୁ ଅଳଙ୍କାର ଓ ଅନ୍ୟ ମୂଲ୍ୟବାନ ଦାନ ସାମଗ୍ରୀଗୁଡ଼ିକର ଭଣ୍ଡାର, ରକ୍ଷଣାବେକ୍ଷଣ ବାବଦରେ ଜେରା କରିଥିଲେ । ସେମାନେ ଏ ସବୁର ରେକର୍ଡ ମାଗିଛନ୍ତି । 

ଗଣମାଧ୍ୟମ ସହ କଥା ହୋଇ ଏହି ପୂର୍ବତନ ଆଇଏଏସ୍ ଅଧିକାରୀ କହିଛନ୍ତି, ମୁଁ ଅଯୋଧ୍ୟା ପହଞ୍ଚିବା ପରେ ଚମ୍ପତ ରାୟ ମୋତେ ୯ ଘଣ୍ଟା ଅପେକ୍ଷା କରାଇଥିଲେ । ମୁଁ ତାଙ୍କୁ ହାତ ଯୋଡ଼ି କହିଥିଲି, ଏହା ମୋ ଜୀବନର ପୁଞ୍ଜି । ରାମଚରିତ ମାନସକୁ ମନ୍ଦିରରେ ରଖାଯାଉ । ଏହାପରେ ଚମ୍ପତ ରାୟ କହିଥିଲେ ତାଙ୍କ ପାଖକୁ ଅନେକ ଲୋକ ସୁନା ଅଳଙ୍କାର ଏବଂ ବିଭିନ୍ନ ପ୍ରକାର ସାମଗ୍ରୀ ପଠାଉଛନ୍ତି । ସେ ସବୁକୁ ମନ୍ଦିରରେ ପ୍ରଦର୍ଶନ କରାଯାଇ ପାରିବ ନାହିଁ ।

ଏଥିରେ ଟ୍ରଷ୍ଟର ମହାସଚିବ ଚମ୍ପତ ରାୟ ଏବଂ ଟ୍ରଷ୍ଟି ଅନିଲ ମିଶ୍ରଙ୍କ ଇସ୍ତଫା ସଂକ୍ରାନ୍ତରେ ନିଷ୍ପତ୍ତି ନିଆଯିବ । ଏହାଛଡ଼ା ଏସ୍‌ଆଇଟିର ପ୍ରାରମ୍ଭିକ ରିପୋର୍ଟ ଏବଂ ମନ୍ଦିର ପରିଚାଳନା ସହ ଜଡ଼ିତ ବ୍ୟବସ୍ଥା ଉପରେ ବି ଚର୍ଚ୍ଚା ହେବ । ଅନ୍ୟପକ୍ଷରେ ଚମ୍ପତ ରାୟଙ୍କ ଇସ୍ତଫାକୁ ନେଇ ଶଙ୍କରାଚାର୍ଯ୍ୟ ଅଭିମୁକ୍ତେଶ୍ୱରାନନ୍ଦ କହିଛନ୍ତି, ଏତେ ବଡ଼ ଭଗବାନଙ୍କ ଦରବାରରୁ ଚୋରି କରି ଇସ୍ତଫା ଦେଇଦେଲେ ଛୁଟି ମିଳିଯିବ ନାହିଁ । ସରକାର ଯଦି ଏମାନଙ୍କୁ ଜେଲ ନ ପଠାନ୍ତି ତେବେ ଜନତା ଏମାନଙ୍କୁ ପିଟିବେ ।

Powered by Froala Editor