ଭୁବନେଶ୍ୱର: ଆଜି ମହାନଦୀ ଜଳବିବାଦ ଟ୍ରିବ୍ୟୁନାଲ ଭର୍ଚୁଆଲରେ ଶୁଣାଣି କରିବେ । ଏଥି ପାଇଁ ଓଡ଼ିଶା ତରଫରୁ ଶୁକ୍ରବାର ମହାନଦୀ ଅବବାହିକାରେ ଭୂତଳ ଜଳ ଉପଲବ୍ଧତା ସଂକ୍ରାନ୍ତରେ ବିଶେଷଜ୍ଞ ଗୁଲାବ ପ୍ରସାଦଙ୍କ ସତ୍ୟପାଠ ଦାଖଲ କରାଯାଇଛି । ସେହିଭଳି ଛତିଶଗଡ ସରକାର ମଧ୍ୟ ସତ୍ୟପାଠ ଦାଖଲ କରିଛନ୍ତି ।

ମହାନଦୀ ଜଳବିବାଦ ନେଇ ମିଳିତ ସୂଚନା ଫର୍ମାଟ୍‌ ଦାଖଲ ନିମନ୍ତେ ଟ୍ରିବ୍ୟୁନାଲ ପକ୍ଷରୁ ବାରମ୍ବାର ନିର୍ଦ୍ଦେଶ ଦିଆଯାଇଛି । ମିଳିଥିବା ସୂଚନା ଅନୁସାରେ ଏହାକୁ ଚୂଡାନ୍ତ କରିବା ପାଇଁ ବିଶେଷଜ୍ଞମାନଙ୍କ ବୈଠକ ୩ ଥର ହେଲାଣି । ଏ ପର୍ୟ୍ୟନ୍ତ ଏହା ଚୂଡାନ୍ତ ହୋଇପାରିନି । ବଡ଼ କଥା ହେଲା ଗତ ମେ ୧୪ ତାରିଖରେ ହୋଇଥିବା ଶୁଣାଣିରେ ଟ୍ରିବ୍ୟୁନାଲ ମହାନଦୀରେ ଜଳପ୍ରବାହ ସମ୍ପର୍କରେ ତଥ୍ୟ ଦେବା ପାଇଁ କେନ୍ଦ୍ର ସରକାରଙ୍କ ନୀତି ଆୟୋଗ, ଏନଡିଏମଏ, କେନ୍ଦ୍ର ବିଜ୍ଞାନ ଓ ବୈଷୟିକ ଜ୍ଞାନ କୌଶଳ ମନ୍ତ୍ରଣାଳୟକୁ ନିର୍ଦ୍ଦେଶ ଦେଇଥିଲେ ।

କିନ୍ତୁ ନୀତି ଆୟୋଗ ପାଖରେ ମହାନଦୀ ଜଳ ପ୍ରବାହ ସମ୍ପର୍କିତ କୌଣସି ତଥ୍ୟ ନାହିଁ ବୋଲି ଟ୍ରିବ୍ୟୁନାଲକୁ ନୀତି ଆୟୋଗର ଜଳସଂପଦ ପରାମର୍ଶଦାତା ଅବଗତ କରାଇଛନ୍ତି । ଏନଡିଏମଏ ତରଫରୁ ମଧ୍ୟ ଏଯାବତ୍‌ କୌଣସି ତଥ୍ୟ ଟ୍ରିବ୍ୟୁନାଲରେ ଦାଖଲ ହୋଇନି । କେବଳ କେନ୍ଦ୍ର ବିଜ୍ଞାନ ଓ ବୈଷୟିକ ଜ୍ଞାନ କୌଶଳ ମନ୍ତ୍ରଣାଳୟ ଏ ନେଇ ତଥ୍ୟ ଦାଖଲ କରିଛି । ଶନିବାର ଶୁଣାଣିରେ ଟ୍ରିବ୍ୟୁନାଲ କଣ ମତ ରଖୁଛନ୍ତି ତା ଉପରେ ନଜର ରହିଛି ।

ସୂଚନାଯୋଗ୍ୟ ଯେ ଜଷ୍ଟିସ୍‌ ଏମଏମ୍‌ ଖାନୱାଲିକରଙ୍କ ଦ୍ୱାରା ଗଠିତ ୩ ଜଣିଆ ଖଣ୍ଡପୀଠ ମାମଲାର ଶୁଣାଣି କରିବେ । ସୁପ୍ରିମକୋର୍ଟଙ୍କ ନିର୍ଦ୍ଦେଶ କ୍ରମେ ୨୦୧୮ ମାର୍ଚ୍ଚ ୧୨ରେ ଏହି ଟ୍ରିବ୍ୟୁନାଲ ଗଠିତ ହୋଇଥିଲା । 

Powered by Froala Editor