ନୂଆଦିଲ୍ଲୀ : ଲକରରେ ନୁହେଁ, ଘରେ ହିଁ ରଖନ୍ତୁ ସୁନା  । ଅର୍ଥନୀତିଜ୍ଞମାନେ ଏଭଳି ପରାମର୍ଶ ଦେଇଛନ୍ତି  । ବର୍ତମାନ ପରିସ୍ଥିତିରେ ଲୋକମାନେ ସୁନା କିଣି ନିଜ ପାଖରେ ରଖିବା ଦରକାର । ସମ୍ପ୍ରତି କରୋନା ଯୋଗୁଁ ବିଶ୍ୱ ଅର୍ଥନୀତି ବିଗିଡ଼ିଯାଇଛି  । ଯଦି ଏହା ଅଧିକ ପ୍ରଭାବିତ ହୁଏ ତେବେ ସରକାର ଲୋକଙ୍କ ସୁନାକୁ ହାତେଇ ପାରନ୍ତି  । ଯେଉଁ ଦେଶରେ ସରକାରଙ୍କ ଉପରେ ଲୋକମାନଙ୍କର ବିଶ୍ୱାସ ନଥିବ ସେମାନେ ଲକରରେ ନରଖି ସୁନା ସବୁ ନିଜ ପାଖରେ ରଖିବାର ଆବଶ୍ୟକତା ରହିଛି । ନଚେତ ସେମାନେ ଭବିଷ୍ୟତରେ ହଇରାଣରେ ପଡ଼ିପାରନ୍ତି । ଅବଶ୍ୟ ଭାରତରେ ଏଭଳି ଆଶଙ୍କା କମ ରହିଛି  । ସୁନା ପ୍ରତି ଭାରତୀୟମାନଙ୍କର ଦୁର୍ବଳତା ଥିବାରୁ ସରକାର ଏଭଳି ପଦକ୍ଷେପ ଗ୍ରହଣ କରିବେ ନାହିଁ ବୋଲି ଅର୍ଥନୀତିଜ୍ଞ ଜିମ ରିକାଡର଼୍ସ ମତବ୍ୟକ୍ତ କରିଛନ୍ତି ।

ସେହିପରି ମାତ୍ର ୪ ବର୍ଷରେ ସୁନା ଦର ୧୦ ଗୁଣା ବଢ଼ିବ ବୋଲି ଆଶଙ୍କା ବ୍ୟକ୍ତ କରିଛନ୍ତି ଅର୍ଥନୀତିଜ୍ଞ ଜିମ ରିକାଡର଼୍ସ  । ସେ କହିଛନ୍ତିଯେ, ୨୦୨୫ ସୁଦ୍ଧା ସୁନା ଦାମ ୧୦ ଗୁଣା ବୃଦ୍ଧି ପାଇବ  । ୧୯୭୧ରେ ସୁନା କରେନ୍ସି ବଜାରରୁ ମୁକ୍ତ ହୋଇଥିଲା  । ଫଳରେ ୧୯୮୦ ସୁଦ୍ଧା ତାହା ୨୦ ଗୁଣା ବୃଦ୍ଧି ପାଇଥିଲା  । ୧୯୯୧ରୁ ୨୦୦୧ ମଧ୍ୟରେ ସୁନା ଦର ୬୭୦% ବଢି ଯାଇଥିଲା  । ଅର୍ଥାତ ୧୯୭୧ରୁ ୨୦୦୧ ମଧ୍ୟରେ ସୁନା ଦର ୧୫ ଗୁଣା ବଢ଼ିଥିଲା  । ୨୦୧୫ରେ ତୃତୀୟ ବୁଲ ମାର୍କେଟ ଆରମ୍ଭ ହୋଇଯାଇଛି  । ଫଳରେ ୨୦୨୫ ସୁଦ୍ଧା ତାହା ୧୦ ଗୁଣା ବୃଦ୍ଧି ପାଇବ ବୋଲି ସେ ଆକଳନ କରିଛନ୍ତି  । ସେୟାର ବଜାର କମିଲେ ସୁନା ଦର ବଢ଼ିବ  । ୨୦୨୨ ବେଳକୁ ବଜାରରେ ଅସ୍ଥିରତା ବଢ଼ିଯିବ  । ବିଶ୍ୱରେ ଏବେ ୩୪ ହଜାର ମେଟ୍ରିକ ଟନ ସୁନା ଥିବାବେଳେ ସୁନାରେ ନିବେଶ କରିବାକୁ ନିବେଶକମାନେ ଆଗ୍ରହ ପ୍ରକାଶ କରୁଛନ୍ତି । ବିଶେଷକରି ଆମେରିକାର ଅର୍ଥନୀତି କରୋନା ମାଡ଼ ଯୋଗୁଁ ବିପର୍ଯ୍ୟସ୍ତ ହୋଇପଡ଼ିଛି  ।୨୦୨୫ ସୁଦ୍ଧା ଡଲାର ମୂଲ୍ୟ ୧୦ରୁ ୧୫ ଗୁଣା ହ୍ରାସ ପାଇବ  । ଫଳରେ ସୁନା ଦର ବୃଦ୍ଧି ପାଇବା ନିଶ୍ଚିତ ବୋଲି ସେ କହିଛନ୍ତି  । ଡଲାର ମୂଲ୍ୟ କମିଲେ ବିଶ୍ୱରେ ମାନ୍ଦାବସ୍ଥା ପରିସ୍ଥିତି ସୃଷ୍ଟି ହେବବୋଲି ସେ ଆଶଙ୍କା ବ୍ୟକ୍ତ କରିଛନ୍ତି  ।

Powered by Froala Editor