ଚୋରି ଅଭିଯୋଗରେ ଚଳଚ୍ଚିତ୍ର ନିର୍ଦ୍ଦେଶକ କାଜା ହୁସେନ୍ ଗିରଫ
'କଲ୍ଲନ୍ମାରୁଡେ ଭିଡୁ' ଭଳି ଚଳଚ୍ଚିତ୍ର ପାଇଁ ଜଣାଶୁଣା ମାଲାୟାଲମ୍ ଚଳଚ୍ଚିତ୍ର ନିର୍ଦ୍ଦେଶକ କାଜା ହୁସେନ୍ଙ୍କୁ ଚୋରି ଅଭିଯୋଗରେ କେରଳର ପାଲାକ୍କାଡ୍ ରେଳ ଷ୍ଟେସନରୁ ପୁଲିସ ଗିରଫ କରିଛି।
ଶୋରାନୁର ରେଳବାଇ ପୁଲିସ୍ ଷ୍ଟେସନର ଜଣେ ଅଧିକାରୀ ସୂଚନା ଦେଇଛନ୍ତି ଯେ କାଜା ହୁସେନ୍ ମୋବାଇଲ୍ ଫୋନ୍ ଏବଂ ଲାପଟପ୍ ଭଳି ସାମଗ୍ରୀ ଚୋରି କରିଥିବା ଅଭିଯୋଗ ରହିଛି। ପୁଲିସ୍ କହିଛି ଯେ, ଦୁଇ ଦିନ ପୂର୍ବେ 'ମଙ୍ଗାଲୁରୁ ସେଣ୍ଟ୍ରାଲ୍ ଇଣ୍ଟରସିଟି ଏସ୍ଏଫ୍ ଏକ୍ସପ୍ରେସ'ରେ ଯାତ୍ରା କରୁଥିବା ଜଣେ ମହିଳା ଯାତ୍ରୀଙ୍କ ଠାରୁ ୮୦,୦୦୦ ଟଙ୍କା ମୂଲ୍ୟର ମୋବାଇଲ୍ ଫୋନ୍ ଚୋରି କରି ଫେରାର ହୋଇଯିବା ପରଠାରୁ ଅଭିଯୁକ୍ତ ପୁଲିସ୍ ର ନଜରରେ ଥିଲେ। ଚୋରି ଘଟଣା ପରେ, ରେଳବାଇ ପୁଲିସ୍ ଭାରତୀୟ ନ୍ୟାୟ ସଂହିତାର ଧାରା ୩୦୫ (ଆବାସିକ ଘର, ପରିବହନ ସାଧନ କିମ୍ବା ଧର୍ମସ୍ଥଳରେ ଚୋରି) ଅଧୀନରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା; ପରବର୍ତ୍ତୀ ସମୟରେ ରବିବାର ଦିନ ହୁସେନ୍ଙ୍କୁ ଗିରଫ କରାଯାଇଥିଲା। ଜଣେ ଅଧିକାରୀଙ୍କ କହିବାନୁସାରେ, ଜଣେ ମହିଳାଙ୍କ ମୋବାଇଲ୍ ଫୋନ୍ ଚୋରି ହେବା ନେଇ ଦାଖଲ ହୋଇଥିବା ଅଭିଯୋଗ ଆଧାରରେ ତଦନ୍ତ ଆରମ୍ଭ କରାଯାଇଥିଲା ଏବଂ ଫଳସ୍ୱରୂପ ହୁସେନ୍ଙ୍କୁ ଗିରଫ କରାଯାଇଥିଲା।
କାଜା ହୁସେନ୍ ହେଉଛନ୍ତି ୨୦୨୪ ମସିହାରେ ମୁକ୍ତିଲାଭ କରିଥିବା ଉଲ୍ଲେଖନୀୟ ମାଲାୟାଲମ୍ ଚଳଚ୍ଚିତ୍ର 'କାଲାନମାରୁଡେ ଭିଡୁ' ର ନିର୍ଦ୍ଦେଶକ ତଥା ପ୍ରଯୋଜକ। ପୁଲିସ୍ ସୂଚନା ଅନୁଯାୟୀ, ଚଳଚ୍ଚିତ୍ରଟି ବ୍ୟବସାୟିକ ଭାବେ ବିଫଳ ହେବା ପରେ ହୁସେନ୍ ବଡ଼ ଧରଣର ଆର୍ଥିକ କ୍ଷତିର ସମ୍ମୁଖୀନ ହୋଇଥିଲେ ଏବଂ ତାଙ୍କର ଆର୍ଥିକ ସ୍ଥିତି ଅତ୍ୟନ୍ତ ଖରାପ ହୋଇଯାଇଥିଲା। କ୍ଷତି ଭରଣା କରିବା ଏବଂ ଅର୍ଥ ଉପାର୍ଜନ କରିବା ଉଦ୍ଦେଶ୍ୟରେ ସେ ଚୋରିର ପଥ ବାଛିନେଇଥିଲେ ଏବଂ ଟ୍ରେନ୍ରେ ଚୋରି କରିବା ଆରମ୍ଭ କରିଥିଲେ।
Powered by Froala Editor
