ନନ୍ଦନକାନନ ଏବେ ଅସୁରକ୍ଷିତ ପ୍ରାଣୀ ଉଦ୍ୟାନରେ ପରିଣତ ହୋଇଛି। ଶନିବାର ନନ୍ଦନକାନନ ସିଂହୀ ଖୁଆଡ଼ରେ ଚିତି ସାପ ପଶି ଦଂଶନ କରିଥିବାରୁ ସିଂହୀର ମୃତ୍ୟୁ ହୋଇଥିଲା। ରବିବାର ନନ୍ଦନକାନନ ପ୍ରାଣୀଉଦ୍ୟାନର ଜଳହସ୍ତୀ ରହୁଥିବା ୬୩ ନଂ ଖୁଆଡ଼ରେ ଏକ ୩ ଫୁଟିଆ ମଗର କୁମ୍ଭୀର ଦେଖିବାକୁ ମିଳିଛି । କୁମ୍ଭୀରକୁ ଦେଖି ଜଳହସ୍ତୀମାନେ ପାଣି ଭିତରୁ ବାହାରକୁ ବାହାରି ଆସିଥିଲେ। ଦୀର୍ଘ ସମୟ ପାଇଁ କୁମ୍ଭୀର ପାଣିରେ ବୁଲିଥିଲା। କିଛି ପର୍ଯ୍ୟଟକ ଏହା ଦେଖି ହୋ-ହଲ୍ଲା କରିଥିଲେ। ସୂଚନା ପାଇ ନନ୍ଦନକାନନ କର୍ତ୍ତୃପକ୍ଷ କୁମ୍ଭୀରକୁ ବାହାରକୁ ଆଣିବାକୁ ପହଞ୍ଚିଥିଲେ।

ଏପରି ଘଟଣା ବାରମ୍ବାର ଘଟୁଥିବାରୁ ଆନିମଲ ଓ୍ବେଲଫେୟାର ଟ୍ରଷ୍ଟ ଏକାମ୍ରର ମୁଖ୍ୟ ପୁରବୀ ପାତ୍ର ନନ୍ଦନକାନନ ନିର୍ଦ୍ଦେଶକ,ଉପନିର୍ଦ୍ଦେଶକ, ଜନ୍ତୁ ବିଭାଗର ରେଞ୍ଜର ଏବଂ ଦାୟିତ୍ୱରେ ଥିବା ଭେଟେନାରି ଡାକ୍ତରଙ୍କୁ ଦାୟୀ କରିଛନ୍ତି। ଚିତି ସାପ ଦଂଶନରେ ସିଂହୀର ମୃତ୍ୟୁ ନେଇ ନନ୍ଦନକାନନ କର୍ତ୍ତୃପକ୍ଷଙ୍କ ନାଁରେ ଥାନାରେ ଲିଖିତ ଅଭିଯୋଗ ହୋଇଛି। ନନ୍ଦନକାନନରେ ସିଂହୀର ମୃତ୍ୟୁ ପଛରେ କର୍ତ୍ତୃପକ୍ଷଙ୍କ ଅବହେଳାକୁ ଦାୟୀ କରିଛି ସଂଗଠନ। ଆବଶ୍ୟକତା ଅନୁଯାୟୀ ଆଣ୍ଟି ଭେନମ ନ ଥିବାରୁ କର୍ତ୍ତୃପକ୍ଷ ଜାଣିଶୁଣି ଚୁପ ବସିଥିଲେ। ତେଣୁ ବନବିଭାଗ କିମ୍ବା ନନ୍ଦନକାନନ କର୍ତ୍ତୃପକ୍ଷ ନୁହେଁ, ବରଂ ପୁଲିସ ଏହାର ନିରପେକ୍ଷ ତଦନ୍ତ କରିବା ଜରୁରୀ ବୋଲି ପୁରବୀ କହିଛନ୍ତି ।

Powered by Froala Editor