ଫେକ୍ ନ୍ୟୁଜ୍ ପ୍ରସାରଣ କରି ବିଶୃଙ୍ଖଳା କରୁଥିଲେ : ବନ୍ଦ ହେଲା ୧୮ଟି ୟୁଟ୍ୟୁବ୍ ଚ୍ୟାନେଲ୍
ଫେକ ନ୍ୟୁଜ ପ୍ରସାରଣ କରୁଥିବା ଅଭିଯୋଗରେ ସୂଚନା ଓ ପ୍ରସାରଣ ମନ୍ତ୍ରଣାଳୟ ୧୮ଟି ଭାରତୀୟ ୟୁଟ୍ୟୁବ ଚ୍ୟାନେଲକୁ ବନ୍ଦ କରି ଦେଇଛି। ଏଆରପି ନ୍ୟୁଜ, ଏଓପି ନ୍ୟୁଜ ଓ ନ୍ୟୁଜ ୨୩ ହିନ୍ଦୀ ଭଳି ୧୮ଟି ଚ୍ୟାନେଲ ବ୍ୟାନ ହୋଇଛି। ସେହିପରି ମନ୍ତ୍ରଣାଳୟ ପାକିସ୍ତାନରୁ ପରିଚାଳିତ ହେଉଥିବା ୪ଟି DuniyaMeryAagy, Ghulam NabiMadni, HAQEEQAT TV, HAQEEQAT TV 2.0 ୟୁଟ୍ୟୁବ ଚ୍ୟାନେଲ ଗୁଡ଼ିକ ଉପରେ ରୋକ ଲଗାଇଛି।
ମନ୍ତ୍ରଣାଳୟ କହିଛି ଯେ ଏହି ୟୁଟ୍ୟୁବ ଚ୍ୟାନେଲଗୁଡ଼ିକ ବିଭିନ୍ନ ଜାତୀୟ ଟିଭି ଚ୍ୟାନେଲର ଲୋଗୋ ଓ ମିଥ୍ୟା ଥମ୍ବନେଲ ବ୍ୟବହାର କରି ଲୋକମାନଙ୍କୁ ବିଭ୍ରାନ୍ତ କରୁଥିଲେ। ବ୍ଲକ ହୋଇଥିବା ୟୁଟ୍ୟୁବ ଚ୍ୟାନେଲଗୁଡ଼ିକର ଦର୍ଶକଙ୍କ ସଂଖ୍ୟା ୨୬୦ କୋଟି ଥିଲା। ଚ୍ୟାନେଲଗୁଡ଼ିକ ଫେକ ନ୍ୟୁଜର ପ୍ରସାରଣ କରୁଥିଲେ। ଏହାପରେ ଏଗୁଡ଼ିକ ସୋଶାଲ ମିଡିଆରେ ଭାଇରାଲ କରୁଥିଲେ। ଏପରି ମିଥ୍ୟା ଖବର ଜାତୀୟ ସୁରକ୍ଷା, ଭାରତର ବୈଦେଶିକ ସମ୍ପର୍କ ଓ ଆଇନ ଶୃଙ୍ଖଳା ସ୍ଥିତି ପ୍ରତି ବିପଦ ସୃଷ୍ଟି କରିଥିଲା।
ଭାରତୀୟ ଆର୍ମଡ ଫୋର୍ସ, ଜମ୍ମୁ-କଶ୍ମୀର ଓ ଭାରତ ବିରୋଧୀ ବିଷୟବସ୍ତୁକୁ ଆଧାର କରି ଚ୍ୟାନେଲ ଗୁଡ଼ିକ ନିୟମିତ ମିଥ୍ୟା ଖବର ପ୍ରସାରଣ କରୁଥିଲେ। ପରବର୍ତ୍ତୀ ଅବସ୍ଥାରେ ଏହି ଖବର ଗୁଡ଼ିକୁ ପାକିସ୍ତାନରୁ ପରିଚାଳିତ ସୋଶାଲ ମିଡିଆ ଆକାଉଣ୍ଟରୁ ଭାଇରାଲ କରାଯାଉଥିଲା।
ତେଣୁ ମନ୍ତ୍ରଣାଳୟ ନୂଆ ଆଇଟି ଆଇନ ୨୦୨୧ରେ ଥିବା ଜରୁରିକାଳୀନ କ୍ଷମତାକୁ ବ୍ୟବହାର କରି ଏପ୍ରିଲ ୪ରେ ୨୨ଟି ନ୍ୟୁଜ ଭିତ୍ତିକ ୟୁଟ୍ୟୁବ ଚ୍ୟାନେଲ, ୩ଟି ଟ୍ୱିଟର ଆକାଉଣ୍ଟ, ଗୋଟିଏ ଫେସବୁକ ଆକାଉଣ୍ଟ ଓ ଗୋଟିଏ ନ୍ୟୁଜ ୱେବସାଇଟକୁ ବ୍ଲକ କରିବାକୁ ନିର୍ଦ୍ଦେଶନାମା ଜାରି କରିଛନ୍ତି।
Powered by Froala Editor
