ବୁଚା: ଋଷ-ୟୁକ୍ରେନ ଯୁଦ୍ଧକୁ ୪୦ ଦିନ ପୂରିଥିଲେ ମଧ୍ୟ ଥମିବାର ନାଁ ଧରୁନି । ୟୁକ୍ରେନରୁ ଏକ ଭୟଙ୍କର ଦୃଶ୍ୟ ସାରା ବିଶ୍ୱକୁ ସ୍ତବ୍ଧ କରିଦେଇଛି । ୟୁକ୍ରେନ ରାଜଧାନୀ କିବର ଉତ୍ତର ଉପକଣ୍ଠ ସ୍ଥିତ ଏକ ସହର ବୁଚାରୁ ଯେଉଁ ଦୃଶ୍ୟ ଦେଖିବାକୁ ମିଳିଛି ତାହା ଅତ୍ୟନ୍ତ ହୃଦୟ ବିଦାରକ । ଋଷ ସେନା ବୁଚାରେ ଗଣହତ୍ୟା କରିଥିବା ଅଭିଯୋଗ ହୋଇଛି । ରାସ୍ତାରେ କୁଢକୁଢ ଶବ ପଡିଥିବାର ଦୃଶ୍ୟ ଏବେ ଇଣ୍ଟରନେଟ୍ରେ ପ୍ରସାରିତ ହେବାରେ ଲାଗିଛି । ବୁଚା ଲୋକମାନଙ୍କୁ ଋଷ ସୈନିକ ଅତି ବର୍ବର ଭାବେ ଗୁଳି କରି ହତ୍ୟା କରିଛନ୍ତି ବୋଲି ୟୁକ୍ରେନ ଦାବି କରିଛି । ଲୋକଙ୍କ ହାତ ବାନ୍ଧି ସେମାନଙ୍କ ମୁଣ୍ଡ ଏବଂ ପାଟିରେ ଗୁଳି କରାଯାଇଥିବା ଜଣାପଡିଛି ।

 
ଋଷ କ୍ୱିଭରୁ ଏହାର ସୈନ୍ୟ ପ୍ରତ୍ୟାହାର କରିବା ପରେ ଏଭଳି ଛାତିଥରା ଦୃଶ୍ୟ ଦେଖିବାକୁ ମିଳିଛ । ବୁଚା ମେୟର ଆନାଟୋଲି ଫେଡୋରକ୍ କହିଛନ୍ତି, ଋଷ ବାହିନୀ ଜାଣିଶୁଣି ଲୋକଙ୍କୁ ହତ୍ୟା କରିଛନ୍ତି । ବୁଚାରୁ ୩୦୦ରୁ ଅଧିକ ମୃତଦେହ ମିଳିଛି । କିବ୍ ଅଂଚଳରୁ ମୋଟ ୪୧୦ ମୃତଦେହ ଉଦ୍ଧାର କରାଯାଇଥିବା ଜଣାପଡିଛି । ମୃତକଙ୍କ ମଧ୍ୟରୁ ୨ଜଣଙ୍କ ହାତ ବାନ୍ଧି ଦିଆଯାଇଥିଲା ଏବଂ ସେମାନଙ୍କ ମୁଣ୍ଡ ଓ ପାଟିରେ ଗୁଳି କରାଯାଇଥିଲା । ଗୋଟିଏ ଧାଡିରେ ପ୍ରାୟ ୨୦ନାଗରିକଙ୍କ ମୃତ ଦେହ ପଡିଥିବାର ଦୃଶ୍ୟ ଦେଖିବାକୁ ମିଳିଛି ।

ସୂଚନା ଅନୁସାରେ ଋଷ ସେନା ବେସମେଣ୍ଟରେ ଲୁଚିଥିବା ଲୋକଙ୍କୁ ବଳପୂର୍ବକ ବାହାରକୁ ଆଣି ସେମାନଙ୍କୁ ଗୁଳି କରି ହତ୍ୟା କରିଛନ୍ତି । କିବଠାରୁ ୫୦କିମି ପଶ୍ଚିମ ମୋତିଜାନ୍ ସହରର ମେୟର, ତାଙ୍କ ସ୍ୱାମୀ ଏବଂ ପୁଅକୁ ଅତି ନିର୍ମମ ଭାବେ ହତ୍ୟା କରାଯାଇଛି । ମେୟରଙ୍କ ହାତ ପଛପଟୁ ବନ୍ଧା ଯାଇଥିଲା ଏବଂ ତାଙ୍କ ଆଖିରେ ଏକ ପଟି ବନ୍ଧା ଯାଇଥିଲା । ୟୁକ୍ରେନ ଉପ ପ୍ରଧାନମନ୍ତ୍ରୀ ମଧ୍ୟ ମେୟରଙ୍କୁ ହତ୍ୟା କରାଯାଇଥିବା ସ୍ପଷ୍ଟ କରିଛନ୍ତି ।

Powered by Froala Editor