ଆସିଲା ଏକ୍ଜିଟ ପୋଲ୍ ରିପୋର୍ଟ : ଜାଣନ୍ତୁ କିଏ କେଉଁଠି ଗଢ଼ିବେ ସରକାର
ପଶ୍ଚିମବଙ୍ଗରେ ଆଜି ନିର୍ବାଚନ ସରଥିବା ବେଳେ ଆସାମ, ତାମିଲନାଡୁ, କେରଳ ଏବଂ ପୁଡୁଚେରୀରେ ନିର୍ବାଚନ ଶେଷ ହୋଇଛି। ବିଶେଷ କରି ପଶ୍ଚିମବଙ୍ଗ ଏକଜିଟ୍ ପୋଲ ଉପରେ ସମସ୍ତଙ୍କ ନଜର ରହିଛି । କେଉଁଠି କେଉଁ ସରକାର ସେନେଇ ଏକ ଆନୁମାନିକ ସଂକେତ ମିଳିପାରିବ।
ପଶ୍ଚିମବଙ୍ଗ :
କରୋନା ସଂକ୍ରମଣ ଭିତରେ ହାଇଭୋଲଟେଜ୍ ପ୍ରଚାର ଓ ରୋଡ ଶୋ’ କରି ବେଙ୍ଗଲରେ କ୍ଷମତା ଦଖଲ କରିବାକୁ ଉଦ୍ୟମ କରୁଥିବା ବିଜେପିକୁ ଲାଗିବ ଶକ୍ତ ଝଟକା। ବେଙ୍ଗଲରେ ପୁଣି ୫ ବର୍ଷ ପାଇଁ ଶାସନ ମଙ୍ଗ ଧରିବେ ମମତା ବାନାର୍ଜୀ। ଟିଏମସିର ଶତାଧିକ ନେତାଙ୍କ ବିଦ୍ରୋହ ତଥା ଦଳୀୟ କନ୍ଦଳ ସତ୍ତ୍ୱେ ବେଙ୍ଗଲରେ ମମତାଙ୍କ ଯାଦୁ ଦେଖିବାକୁ ମିଳିବ। କେବଳ ରିପବ୍ଲିକ ଟିଭି ଓ ଜନ କି ବାତ୍କୁ ଛାଡ଼ି ଦେଲେ ଆଉ ସବୁ ନ୍ୟୁଜ ଚ୍ୟାନେଲ ମମତା ବାଜିମାତ କରିବେ ବୋଲି ଆକଳନ କରିଛନ୍ତି। ଏହି ଚ୍ୟାନେଲ ପଶ୍ଚିମବଙ୍ଗରେ ବିଜେପି ଶାସକ ଟିଏମସି ଠାରୁ ଅଧିକ ଆସନ ଜିତିବ ବୋଲି ଆକଳନ କରିଥିଲେ ହେଁ କାହାକୁ ସରକାର ଗଠନ ପାଇଁ ମ୍ୟାଜିକ ନମ୍ବର ମିଳିପାରିବ ନାହିଁ ବୋଲି କହିଛି।
ତାମିଲନାଡୁ:
ତାମିଲନାଡୁରେ କ୍ଷମତା ପରିବର୍ତ୍ତନ ହେବାର ସମ୍ଭାବନା ରହିଛି । କ୍ଷମତାସୀନ ଏଆଇଡିଏମକେ କ୍ଷମତାଚ୍ୟୁତ ହେବାର ସମ୍ଭାବନା ଥିବାବେଳେ ଡିଏମକେ କ୍ଷମତା ହାସଲ କରିବାର ସମ୍ଭାବନା ରହିଛି । ବିଭିନ୍ନ ସଂସ୍ଥା ପକ୍ଷରୁ ପ୍ରକାଶିତ ବୁଥବାହୁଡ଼ା ମତ ବା ଏକଜିଟ ପୋଲ ରିପୋର୍ଟରେ ଡିଏମକେ କ୍ଷମତା ଦୌଡ଼ରେ ଆଗୁଆ ଥିବା କୁହାଯାଇଛି । ରିପବ୍ଲିକ-ସିଏନଏକ୍ସ ରିପୋର୍ଟ ଅନୁସାରେ ଡିଏମକେ ୧୬୦-୧୭୦ଟି ଆସନ ଜିତିବ । ସେହିପରି ଏଆଇଡିଏମକେ ୫୮-୬୮ଟି ଆସନ ଜିତିବ ଓ ଅନ୍ୟମାନେ ୪-୬ଟି ଆସନ ଜିତିବେ । ଟୁଡେଜ୍-ଚାଣକ୍ୟର ଏକଜିଟ ପୋଲ ଅନୁସାରେ ଡିଏମକେ ୧୬୪-୧୮୬ଟି ଆସନ ଜିତିବ । ସେହିପରି ଏଆଇଡିଏମକେ ୪୬-୬୮ଟି ଆସନ ଜିତିବ ଓ ଅନ୍ୟମାନେ ୦-୮ଟି ଆସନ ଜିତିବେ ।
କେରଳ:
କେରଳରେ ଜାରି ରହିବ ମୁଖ୍ୟମନ୍ତ୍ରୀ ପିନରାୟୀ ବିଜୟନଙ୍କ ଜଲୱା। କେରଳର ୧୪୦ ବିଧାନସଭା ଆସନରୁ ବିଜୟନଙ୍କ ଲେଫ୍ଟ ଡେମୋକ୍ରାଟିକ୍ ଫ୍ରଣ୍ଟ(ଏଲଡିଏଫ) ୧୦୪ରୁ ୧୨୦ଟି ଆସନରେ ଜିତି ପୁଣି ସରକାର ଗଠନ କରିବ। ସେହିପରି କଂଗ୍ରେସ ନେତୃତ୍ୱାଧୀନ ୟୁଡିଏଫ ୨୦ରୁ ୩୬ଟି ଓ ବିଜେପି ନେତୃତ୍ୱାଧୀନ ଏନଡିଏ କେବଳ ଶୂନରୁ ୨ଟି ଆସନ ଜିତିବାକୁ ସକ୍ଷମ ହେବ। ଇଣ୍ଡିଆ ଟୁଡେ-ଆକ୍ସିସ ମାଇଁ ଇଣ୍ଡିଆ ପକ୍ଷରୁ କରାଯାଇଥିବା ଏକଜିଟ୍ ପୋଲରେ ଏପରି ଆକଳନ କରାଯାଇଛି।
ତେବେ ମେ’ ୨ ତାରିଖରେ ହିଁ ଅସଲ ଚିତ୍ର ସାମ୍ନାକୁ ଆସିବ। କାରଣ ମେ’୨ରେ ଭୋଟ ଗଣତି ସହ ନିର୍ବାଚନ କମିଶନ ଫଳାଫଳ ଘୋଷଣା କରିବେ। ରାଜ୍ୟର ୧୪୦ଟି ଆସନରେ ଏପ୍ରିଲ ୬ରେ ଭୋଟିଂ ହୋଇଥିଲା। ଇଣ୍ଡିଆ ଟୁଡେ ୨୮,୧୨୪ ଜଣଙ୍କ ଲୋକଙ୍କ ମତକୁ ନେଇ ଏପରି ଆକଳନ କରିଛି।
ଆସାମ:
ଇଣ୍ଡିଆ ଟୁଡେ-ମାଇ ଆକ୍ସିସ୍ ମାଇ ଇଣ୍ଡିଆ ଏକଜିଟ ପୋଲ ଅନୁସାରେ ଆସାମରେ ପୁଣି ବିଜେପି କ୍ଷମତାକୁ ପ୍ରତ୍ୟାବର୍ତ୍ତନ କରିବ । ରାଜ୍ୟର ମୋଟ ୧୨୬ ଆସନ ମଧ୍ୟରୁ ବିଜେପି ୭୫-୮୫ଟି ଆସନ ଜିତିବାର ସମ୍ଭାବନା ଥିବାବେଳେ କଂଗ୍ରେସ ୪୦-୫୦ଟି ଆସନ ଜିତିବ ଓ ଅନ୍ୟମାନେ ୧-୨ ଟି ଆସନ ଜିତିବାର ସମ୍ଭାବନା ରହିଛି । ସେହିପରି ଟୁଡେଜ ଚାଣକ୍ୟ ଅନୁସାରେ ବିଜେପି ୬୧-୭୯ଟି ଆସନ ଜିତିବାକୁ ଥିବାବେଳେ କଂଗ୍ରେସ ୪୭-୬୫ଟି ଆସନ ଜିତିବ ଓ ଅନ୍ୟମାନେ ୦-୩ଟି ଆସନ ଜିତିବାର ସମ୍ଭାବନା ରହିଛି ।
ପୁଡୁଚେରୀ :
କେନ୍ଦ୍ର ଶାସିତ ଅଞ୍ଚଳ ପୁଡୁଚେରୀରେ କ୍ଷମତାକୁ ଫେରିପାରିବ ନାହିଁ କଂଗ୍ରେସ। ବିଧାନସଭା ନିର୍ବାଚନ ପୂର୍ବରୁ ଦଳୀୟ ବିଧାୟକଙ୍କ ବିଦ୍ରୋହ ଯୋଗୁ ଅଧାରୁ ଭାଙ୍ଗିଥିବା କଂଗ୍ରେସ ସରକାରକୁ ମେ’ ୨ରେ ଜୋରଦାର ଝଟକା ଲାଗିପାରେ। କାରଣ ଏକଜିଟ୍ ପୋଲ ଆକଳନ ଅନୁଯାୟୀ, ପୁଡୁଚେରୀରେ ବିଜେପି ନେତୃତ୍ୱାଧୀନ ଏନଡିଏ ସରକାର ଗଠନ କରିବ। କଂଗ୍ରେସ ମେଣ୍ଟ ଦ୍ୱିତୀୟ ସ୍ଥାନରେ ରହିବ। ପୁଡୁଚେରୀର ୩୦ଟି ବିଧାନସଭା ଆସନ ପାଇଁ ଏପ୍ରିଲ ୬ରେ ଭୋଟିଂ ହୋଇଥିଲା। ଏଠାରେ ସରକାର ଗଠନ ପାଇଁ ମ୍ୟାଜିକ ନମ୍ବର ୧୬। ମେ’ ୨ରେ ଭୋଟ ଗଣତି ସହ ଫଳାଫଳ ପ୍ରକାଶ ପାଇବ।
Powered by Froala Editor
