ବ୍ରହ୍ମପୁର: ଇଣ୍ଡିଆ ବୁକ୍ ଅଫ୍ ରେକର୍ଡ-୨୦୨୧ ଟାଇଟଲ୍ ହାସଲ କରିଛନ୍ତି ଜଣେ ଓଡ଼ିଆ ଝିଅ । ସେ ହେଲେ ବ୍ରହ୍ମପୁର ସାନଖେମୁଣ୍ଡି ତୁଳସୀପଦର ଗ୍ରାମର ସାଧୁ ନାହାକ ସୁକନ୍ୟା ମନସ୍ୱିନୀ । ମହାଭାରତ ଯୁଦ୍ଧର ବଡ଼ ବଡ଼ ପେନ୍‌ସିଲ୍ ଆର୍ଟ ଯୋଗୁଁ ତାଙ୍କୁ ଏହି ସ୍ୱୀକୃତି ମିଳିଛି ।

ମନସ୍ୱିନୀଙ୍କ ମା’ ଜଣେ ଅଙ୍ଗନବାଡ଼ି କର୍ମୀ । ସେ ତାଙ୍କ ପରିବାର ସହ ଦିଗପହଣ୍ଡିରେ ରହୁଛନ୍ତି । ପିଲାଦିନରୁ ମନସ୍ୱିନୀଙ୍କ କଳାକୃତି ପ୍ରତି ଆଗ୍ରହ ଥିଲା । ଅବସର ସମୟରେ ସେ ଏହା କରୁଥିଲେ । ଯୁକ୍ତତିନି ଉତ୍ତୀର୍ଣ୍ଣ ପରେ ମନସ୍ୱିନୀ ଏଥିପ୍ରତି ଅଧିକ ସମୟ ଦେଇଥିଲେ । ମା’ଙ୍କୁ ସାହାଯ୍ୟ କରିବା ସହିତ ଅବକାଶ ସମୟରେ ଆର୍ଟ ସହ ମେହେନ୍ଦୀ ଡିଜାଇନ କରୁଥିଲେ ।

ନିଜର ୟୁଟ୍ୟୁବ୍‌ ଆକାଉଣ୍ଟ ଖୋଲି ନୂଆ ପ୍ରଣାଳୀ ଓ କୌଶଳରେ ଡିଜାଇନ ପ୍ରସ୍ତୁତ କରି ୟୁଟ୍ୟୁବ୍‌ ଆକାଉଣ୍ଟରେ ପୋଷ୍ଟିଂ କରୁଥିଲେ । ଏଥିରେ ଦର୍ଶକଙ୍କ ଲାଇକ୍‌ ଓ ସେୟାର ବଢ଼ିବାରୁ ମହାଭାରତ ଯୁଦ୍ଧ କ୍ଷେତ୍ରକୁ ପେନ୍‌ସିଲ ଆର୍ଟ କରି ୟୁଟ୍ୟୁବ୍‌ ଆକାଉଣ୍ଟରେ ପୋଷ୍ଟିଂ କରିଥିଲେ । ଏଥିରେ ମଧ୍ୟ ଦର୍ଶକଙ୍କ ଉଚ୍ଚ ପ୍ରଶଂସା ମିଳିବା ପରେ ଇଣ୍ଡିଆ ବୁକ୍‌ ଅଫ ରେକର୍ଡରେ ସ୍ଥାନ ପାଇବାକୁ ଆବେଦନ କରିଥିଲେ । ରବିବାର ଇଣ୍ଡିଆ ବୁକ୍‌ ଅଫ ରେକର୍ଡରେ ସ୍ଥାନ ପାଇଛି ମନସ୍ୱିନୀଙ୍କ କଳାକୃତି ।

Powered by Froala Editor