ନୂଆଦିଲ୍ଲୀ: ୨୧ ବର୍ଷ ପୂର୍ବରୁ ବିବାହ କରିପାରିବେନି ଯୁବତୀ । ବିବାହର ସର୍ବନିମ୍ନ ବୟସ ସୀମାରେ ପରିବର୍ତ୍ତନ କଲେ କେନ୍ଦ୍ର ସରକାର । ଜାତି ଓ ଧର୍ମ ନିର୍ବିଶେଷରେ ସବୁ ଝିଅଙ୍କ ପାଇଁ ଏହି ନିୟମ ଲାଗୁ ହେବ । ବିବାହ ପାଇଁ ଝିଅମାନଙ୍କ ସର୍ବନିମ୍ନ ବୟସ ସୀମା ବୃଦ୍ଧି ସଂକ୍ରାନ୍ତ ପ୍ରସ୍ତାବକୁ କେନ୍ଦ୍ର କ୍ୟାବିନେଟ୍ ଅନୁମୋଦନ କରିଛି । ଯାହାଦ୍ବାରା ଏଣିକି ଯୁବତୀଙ୍କ ବିବାହ ବୟସ ସୀମା ୧୮ ବର୍ଷରୁ ୨୧ ବର୍ଷକୁ ବୃଦ୍ଧି ପାଇବ । ଏଥିପାଇଁ ସରକାର ଜୁନ୍ ୨୦୨୦ରେ ଜୟା ଜେଟଲୀଙ୍କ ଅଧ୍ୟକ୍ଷତାରେ ଏକ ଟାସ୍କ ଫୋର୍ସ ଗଠନ କରିଥିଲେ । ଯେଉଁଥିରେ ନୀତି ଆୟୋଗର ସଦସ୍ୟ ଡା. ବିକେ ପଲ୍ ମଧ୍ୟ ସାମିଲ ଥିଲେ ।  ଟାସ୍କ ଫୋର୍ସ ଗତ ମାସରେ ହିଁ ପ୍ରଧାନମନ୍ତ୍ରୀଙ୍କ କାର୍ୟ୍ୟାଳୟ ଓ ମହିଳା-ବାଲ ବିକାଶ ମନ୍ତ୍ରଣାଳୟଙ୍କୁ ନିଜ ରିପୋର୍ଟ ପ୍ରଦାନ କରିଥିଲେ ।
ରିପୋର୍ଟରେକୁହାଯାଇଛି ଯେ, ଝିଅମାନଙ୍କ ବିବାହ ବିଳମ୍ବ ହେଲେ ପରିବାର, ମହିଳା, ଶିଶୁ ଏବଂ ସମାଜ ପାଇଁ ସକାରାତ୍ମକ ଆର୍ଥିକ ଓ ସାମାଜିକ ପ୍ରଭାବ ପଡିଥାଏ । ବିବାହ ବୟସ ବଢିବା ଯୋଗୁଁ ମହିଳାଙ୍କ ସ୍ବାସ୍ଥ୍ୟ ଉପରେ ସକାରାତ୍ମକ ପ୍ରଭାବ ପଡିବ । ରିପୋର୍ଟରେ ଏହି ପରାମର୍ଶ ଦିଆଯାଇଛି ଯେ, ମହିଳାଙ୍କ ବିବାହ ବୟସକୁ ୧୮ ରୁ ବଢାଇ ୨୧ ବର୍ଷ କରାଯାଉ । କିନ୍ତୁ ଏକ ସଠିକ୍ ପର୍ୟ୍ୟାୟରେ, ଏହାର ଅର୍ଥ ଏହିକି ଯେ, ସବୁ ରାଜ୍ୟ ଗୁଡିକୁ ପୁରା ସମୟ ଓ ସ୍ବତନ୍ତ୍ରତା ଦିଆଯାଉ । ଯାହାଦ୍ବାରା ସେମାନେ ତୃଣମୂଳସ୍ତରରୁ ଏହି କାମ ଆରମ୍ଭ କରିପାରିବେ, କାହିଁକିନା ଏହି ନିୟମକୁ ଗୋଟିଏ ରାତିରେ ଲାଗୁ କରାଯାଇପାରିବ ନାହିଁ ।ସରକାର ଝିଅଙ୍କ ପାଇଁ ସ୍କୁଲ ଓ କଲେଜର ସଂଖ୍ୟା ବଢାନ୍ତୁ । ଏବଂ ଉପାନ୍ତ ଅଞ୍ଚଳମାନଙ୍କରେ ଝିଅମାନଙ୍କୁ ସ୍କୁଲ ପର୍ୟ୍ୟନ୍ତ ପହଞ୍ଚାଇବା ପାଇଁ ମଧ୍ୟ ବ୍ୟବସ୍ଥା କରନ୍ତୁ । ଝିଅମାନଙ୍କୁ କୁଶଳୀ ବିଦ୍ୟା ସହ ବ୍ୟବସାୟ ଟ୍ରେନିଂ ଦେବାକୁ ପ୍ରସ୍ତାବ ଦିଆଯାଇଥିଲା । ଏହାସହ ବିବାହ ବୟସ ବଢାଇବା ନେଇ ସଚେତନତା ଅଭିଯାନ କରିବାକୁ ମଧ୍ୟ କୁହାଯାଇଥିଲା ।
ଗତବର୍ଷ ସ୍ବାଧୀନତା ଦିବସ ଅବସରରେ ପ୍ରଧାନମନ୍ତ୍ରୀ ମୋଦି ନିଜ ଭାଷଣରେ ଝିଅଙ୍କ ସର୍ବନିମ୍ନ ବିବାହ ବୟସ ସମ୍ପର୍କରେ ଉଲ୍ଲେଖ କରିଥିଲେ । ସେ କହିଥିଲେ ଝିଅମାନଙ୍କୁ କୁପୋଷଣରୁ ରକ୍ଷା କରିବାକୁ ହେଲେ ସେମାନଙ୍କ ବିବାହ ଉଚିତ୍ ବୟସରେ ହେବା ଆବଶ୍ୟକ । ଶେଷରେ ଏ ସମ୍ପର୍କିତ ପ୍ରସ୍ତାବ ଉପରେ ମୋହର ମାରିଛି କେନ୍ଦ୍ର କ୍ୟାବିନେଟ୍ ।

Powered by Froala Editor