ଜୁନାଗଡ଼: ମମିତା ମେହେର ମୃତୁ୍ୟ ମାମଲାକୁ ନେଇ ଗୃହରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ର ଗତ କିଛି ଦିନ ହେଲା ବାରମ୍ବାର ବିରୋଧୀଙ୍କ ଅକ୍ରୋଶର ଶିକାର ହେଉଆସୁଛନ୍ତି । ଗତ କିଛି ଦିନହେଲା ତାଙ୍କୁ ବିଭିନ୍ନ ସ୍ଥାନରେ କଳାପତକା ପ୍ରଦର୍ଶନ କରାଯାଉଥିବାବେଳେ ଆଜି ଜୁନାଗଡ଼ରେ ତାଙ୍କ ଗାଡ଼ିକୁ ଅଣ୍ଡାମାଡ଼ କରାଯାଇଥିବା ଜଣାଯାଇଛି ।  ବିଜେଡିର ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ସହ ମନ୍ତ୍ରୀ ଶ୍ରୀ ମିଶ୍ର ଯାଉଥିବାବେଳେ ତାଙ୍କ ଗାଡ଼ିକୁ ଅଣ୍ଡାମାଡ଼ କରାଯାଇଛି ।  ଉଭୟେ ଯାଉଥିବା ଗାଡ଼ି ଉପରକୁ କଲେଜ ଛକ ନିକଟରେ ଅଣ୍ଡାମାଡ଼ କରାଯାଇଛି ।  ଉଭୟ ବିଜେଡିର ଏକ ମିଶ୍ରଣ ପର୍ବରେ ଯୋଗଦେବାକୁ ଯାଉଥିବାବେଳେ ଏହି ଅଘଟଣ ଘଟିଛି ।  ଯାହାକୁ ନେଇ ଘଟଣାସ୍ଥଳରେ ଉଭୟ ବିଜେଡି-ବିଜେପି କର୍ମୀଙ୍କ ମଧ୍ୟରେ ଧସ୍ତାଧସ୍ତି ହୋଇଥିବା ଜଣାଯାଇଛି ।

ପ୍ରକାଶ ଯେ,   ଶିକ୍ଷୟିତ୍ରୀ ମମିତା ମେହେର ହତ୍ୟାକାଣ୍ଡ ଘଟଣାକୁ ନେଇ ଗତକାଲି  ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କୁ କଳାପତାକା ପ୍ରଦର୍ଶନ କରାଯାଇଥିଲା । ବିଜେପି ଯୁବ ମୋର୍ଚ୍ଚା ପକ୍ଷରୁ ତାଙ୍କୁ କଳାପତାକା ପ୍ରଦର୍ଶନ  କରାଯାଇଥିଲା । ଭବାନୀପାଟଣାର ନକଟିଗୁଡ଼ାରେ ଗତକାଲି  ସନ୍ଧ୍ୟାରେ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କୁ କଳାପତାକା ପ୍ରଦର୍ଶନ କରାଯାଇଥିଲା। ତାଙ୍କ ସହିତ ବିଜେଡି ବିଧାୟକ ତଥା ଦଳର ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସଙ୍କୁ ମଧ୍ୟ ବିରୋଧ କରାଯାଇଥିଲା ଓ କଳାପତାକା ପ୍ରଦର୍ଶନ କରାଯାଇଥିଲା।

ସୂଚନାଯୋଗ୍ୟ, ବିଜେପି ରାଜ୍ୟ ସାଧାରଣ ସଂପାଦକ ପୃଥ୍ୱୀରାଜ ହରିଚନ୍ଦନ  ଗତକାଲି କହିଛନ୍ତି ଯେ ଯେତେ ଦିନ ପର୍ୟ୍ୟନ୍ତ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କୁ ବହିଷ୍କାର କରା ନ ଯାଇଛି ଓ ଘଟଣାର ସିବିଆଇ ତଦନ୍ତ କରିବାକୁ ସୁପାରିସ ନ କରାଯାଇଛି, ସେତେଦିନ ପର୍ୟ୍ୟନ୍ତ ଦଳ ଆନ୍ଦୋଳନ ଜାରି ରଖିବ। ଆସନ୍ତା ୮ ତାରିଖରୁ ଦଳ ମୁଖ୍ୟମନ୍ତ୍ରୀଙ୍କୁ ସାମାଜିକ ବାସନ୍ଦ କରିବ ବୋଲି ସେ କହିଛନ୍ତି। 

Powered by Froala Editor