ମହାରାଷ୍ଟ୍ର: ଆଜି ସକାଳେ ମହାରାଷ୍ଟ୍ରର ଅମରାବତୀ ଜିଲ୍ଲା ମହିଳା ହସ୍ପିଟାଲରେ ଭୟଙ୍କର ଅଗ୍ନିକାଣ୍ଡ ଘଟିଛି । ହସ୍ପିଟାଲର ଶିଶୁ ବିଭାଗ (NICU)ରେ ଅଗ୍ନିକାଣ୍ଡ ଘଟି 3 ଜଣ ନବଜାତ ଶିଶୁଙ୍କ ମୃତ୍ୟୁ ଘଟିଛି । ସେହିପରି ଅନେକ ଶିଶୁ ନିଆଁରେ ପୋଡ଼ି ଯାଇ ଗୁରୁତର ଆହତ ହୋଇଛନ୍ତି । ଅଗ୍ନିକାଣ୍ଡ ଯୋଗୁଁ ହସ୍ପିଟାଲ ଭିତରେ ଆତଙ୍କ ସୃଷ୍ଟି ହୋଇଥିଲା । ଅଗ୍ନିକାଣ୍ଡର କାରଣ ବର୍ତ୍ତମାନ ସୁଦ୍ଧା ଅସ୍ପଷ୍ଟ ରହିଛି । ପ୍ରାରମ୍ଭିକ ସୂଚନା ଅନୁଯାୟୀ, ଆଜି ଭୋର 3:30ଟା ସମୟରେ ଅମରାବତୀ ଜିଲ୍ଲା ମହିଳା ହସ୍ପିଟାଲର ହସ୍ପିଟାଲର ତୃତୀୟ ମହଲାରେ ଥିବା ଏକ ନବଜାତ ସଘନ ଯତ୍ନ ୟୁନିଟ୍ (NICU)ରେ ହଠାତ୍ ଏକ ଭେଣ୍ଟିଲେଟର ବିସ୍ଫୋରଣ ହୋଇଥିଲା । ଅଗ୍ନିକାଣ୍ଡ ସମୟରେ 9 ଜଣ ଶିଶୁଙ୍କୁ NICUରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା । ଡ୍ୟୁଟିରେ ଥିବା ମହିଳା କର୍ମଚାରୀମାନେ ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲେ, କିନ୍ତୁ ନିଆଁ ତୀବ୍ର ବେଗରେ ସମଗ୍ର ୱାର୍ଡରେ ବ୍ୟାପି ଯାଇଥିଲା । ତେବେ ହସ୍ପିଟାଲ କର୍ମଚାରୀମାନେ NICUରୁ 6 ଜଣ ଶିଶୁଙ୍କୁ ଉଦ୍ଧାର କରିବାରେ ସଫଳ ହୋଇଥିଲେ । ମାତ୍ର ଏହି ଘଟଣାରେ 3 ଜଣ ନବଜାତ ଶିଶୁ ଗୁରୁତର ପୋଡ଼ି ଆହତ ହୋଇଥିଲେ । ସେମାନଙ୍କ ମୃତ୍ୟୁ ହୋଇଛି ବୋଲି ହସ୍ପିଟାଲର ଜଣେ ଅଧିକାରୀ କହିଛନ୍ତି ।
ଅମରାବତୀ ଜିଲ୍ଲା ମହିଳା ହସ୍ପିଟାଲର ତୃତୀୟ ମହଲାରେ 39 ଶଯ୍ୟା (ପ୍ରତ୍ୟେକ ଶଯ୍ୟାରେ 13) ବିଶିଷ୍ଟ ତିନୋଟି NICU ୱାର୍ଡ ରହିଛି। ଏହି ୟୁନିଟ୍‌ ମଧ୍ୟରୁ ଗୋଟିଏରେ ଅଗ୍ନିକାଣ୍ଡ ଘଟିଛି । ଯେଉଁ ୟୁନିଟରେ ନିଆଁ ଲାଗିଥିଲା ସେହି ସମୟରେ 9 ନବଜାତ NICUରେ ଥିଲେ । ଅନ୍ୟ NICUରେ ଥିବା ନବଜାତ ଶିଶୁମାନଙ୍କୁ ମଧ୍ୟ ସୁରକ୍ଷିତ ଭାବରେ ଉଦ୍ଧାର କରାଯାଇଛି । କେଉଁ କାରଣରୁ ଅଗ୍ନିକାଣ୍ଡ ଘଟିଥିଲା ପୋଲିସ ତାହାର ତଦନ୍ତ କରୁଛି ।

Powered by Froala Editor