କାବୁଲ: ତାଲିବାନ ବାହିନୀ ଆଫଗାନିସ୍ତାନ ଦଖଲ କରିବା ପରଠାରୁ ସେଠାରେ ମହିଳାମାନଙ୍କ ପାଇଁ ଅତି ବିପଜ୍ଜନକ ସ୍ଥିତି ଉପୁଜିଛି । ସବୁଠୁ ବେଶି ବିପଦରେ ମହିଳା, ଶିଶୁ ଏବଂ ବୟସ୍କ ବ୍ୟକ୍ତି ଅଛନ୍ତି । ଆଫଗାନିସ୍ତାନ ଛାଡ଼ିଥିବା ଆମେରିକାର ମହିଳା ସାମ୍ବାଦିକ ହୋଲି ମ୍ୟାକେ ଆଫଗାନିସ୍ତାନରେ ମହିଳାମାନେ ସମ୍ମୁଖୀନ ହେଉଥିବା ବର୍ବରତାକୁ ନେଇ ଏକ ବିସ୍ତୃତ ରିପୋର୍ଟ ପ୍ରକାଶ କରିଛନ୍ତି । ଏହି ରିପୋର୍ଟ ଅନୁଯାୟୀ ତାଲିବାନ ଆତଙ୍କବାଦୀ ଏବେ ଆଫଗାନିସ୍ତାନରେ ଘରକୁ ଘର ବୁଲି ୧୫ ବର୍ଷରୁ ଊର୍ଦ୍ଧ୍ୱ ବାଳିକା ଓ ମହିଳାଙ୍କୁ ବିବାହ ପାଇଁ ଉଠାଇ ଆଣୁଛନ୍ତି । ଆତଙ୍କବାଦୀମାନେ ସେମାନଙ୍କୁ ଦୁଷ୍କର୍ମ କରିବା ସହ ବଳପୂର୍ବକ ବିବାହ କରୁଛନ୍ତି ହୋଲି କହିଛନ୍ତି । ହୋଲି କହିଛନ୍ତି ଯେ ସେ ଦେଶ ଛାଡ଼ିବାରେ ସକ୍ଷମ ହୋଇଥିଲେ ମଧ୍ୟ ତାଙ୍କ ବନ୍ଧୁମାନେ କିନ୍ତୁ ବହୁତ ସଙ୍କଟରେ ଅଛନ୍ତି । ଆଫଗାନିସ୍ତାନରେ ମହିଳାମାନେ ନିଜ ଅଧିକାର ପାଇଁ ବହୁତ କଷ୍ଟରେ ଲଢ଼ୁଛନ୍ତି । ତାଲିବାନର ଅତ୍ୟାଚାର ସୀମା ଟପିଲାଣି । ମହିଳାମାନଙ୍କ ପ୍ରତି ଅକଥନୀୟ ଅତ୍ୟାଚାର ହେଉଛି ଏବଂ ସେମାନଙ୍କୁ ଘର କୋଣରେ ରହିବାକୁ ବାଧ୍ୟ କରାଯାଉଛି । ତାଲିବାନ କ୍ଷମତାକୁ ଆସିବା ମାତ୍ରେ ପ୍ରଥମେ ମହିଳାଙ୍କ ଶିକ୍ଷା ଅଧିକାରକୁ ଛଡ଼ାଇ ନେଇଛି ଏବଂ ଆଗକୁ ତାଲିବାନ ସରକାର ଗଠନ ହେବାପରେ ମହିଳାଙ୍କର ଆଉ କୌଣସି ଅଧିକାର ରହିବ ନାହିଁ । ସାରିଆ ଆଇନ ଉଲ୍ଲଂଘନ ଦର୍ଶାଇ ତାଲିବାନ ଆତଙ୍କବାଦୀ ଯେ କୌଣସି ମହିଳାଙ୍କୁ ଟାର୍ଗେଟ କରୁଛନ୍ତି ।

Powered by Froala Editor